ଲାଠୋର,୬ା୨(ଡି.ଏନ.ଏ.):ବଲାଙ୍ଗୀର ଜିଲା ଖପ୍ରାଖୋଲ ବ୍ଳକ କରୁଆଝର ପଞ୍ଚାୟତ ଅଧୀନ ମସିଣା ଗ୍ରାମର ଦେବରାଜ ଶଗଡ଼ିଆ(୬୦)ଙ୍କ ଗ୍ରାଜୁଏଟ ଝିଅ କୁନ୍ତଳା ଚଳିତ ବର୍ଷ ଦାଦନ ଖଟିବାକୁ ଆନ୍ଧ୍ରପ୍ରଦେଶ ଯାଇଛନ୍ତି। ତାଙ୍କ ସହ +୨ ପାଠ ପଢିଥିବା ଭଉଣୀ ଶୁଶିଲା ଏବଂ ମା’ ତେଜବନ୍ତି ଶଗଡ଼ିଆ(୫୫) ବି ଯାଇଛନ୍ତି। ପୋଷ୍ଟ ଗ୍ରାଜୁଏଟ ଭାଇ ଅଙ୍କୁର ଶଗଡ଼ିଆ ନାମିଲନାଡ଼ୁରେ ଦାଦନ ଶ୍ରମିକଭାବେ କାମ କରୁଛନ୍ତି। ଘରେ କେବଳ ବୃଦ୍ଧ ବାପା ଦେବରାଜ ରହିଛନ୍ତି। ୫ଡ଼ିସମିଲ ଘର ଡ଼ିହକୁ ଛାଡ଼ିଦେଲେ ସମ୍ପତି କହିଲେ କିଛି ନାହିଁ। ପିଲାମାନଙ୍କୁ ମଣିଷ କରିବା ପାଇଁ ଶଗଡିଆ ଦମ୍ପତି ଗତ ୩୦ବର୍ଷ ହେଲା ଦାଦନ ଖଟିବାକୁ ଯାଇ ଜାହା ରୋଜଗାର କରୁଥିଲେ ସେଥିରେ ପରିବାର ଚଳାଇବା ସହ ପିଲାଙ୍କୁ ଉଚ୍ଚ ଶିକ୍ଷିତ କରିଥିଲେ। ହେଲେ ଭାଗ୍ୟର ବିଡ଼ମ୍ବନା ଉଚ୍ଚ ଶିକ୍ଷିତ ଝିଅପୁଅ ସରକାରୀ କିମ୍ବା ବେସରକାରୀ ସଂସ୍ଥାରେ କର୍ମ ସଂସ୍ଥାନ ପାଇଲେ ନାହିଁ। ଚରିମ ଦାରଦ୍ର୍ୟ ଭିତରେ ଜୀବନ କାଟୁଥିବା ଏହି ଗରିବ ପରିବାର ପାଖରେ ବାସଗୃହଟିଏ ନାହିଁ। ସେମାନେ ରହୁଥିବା ମାଟି ଛପର ଘର ଭାଙ୍ଗି ଯାଇଛି। ୨୦୨୧-୨୨ ମସିହାରେ ଦେବରାଜ ଶଗଡ଼ିଆଙ୍କୁ ବ୍ଳକ ପକ୍ଷରୁ ଏକ ଗାଈ ଗୁହାଳ ଯୋଗାଇ ଦିଆଯାଇଥିଲା। ସେହି ଗୁହାଳରେ ଆଜିଯାଏ ପରିବାର ଲୋକେ ମୁଣ୍ଡ ଗୁଞ୍ଜିଛନ୍ତି। ଏତେ ସବୁ ସତ୍ତ୍ୱେ ସଦ୍ୟ ଘୋଷିତ ଆବାସ ଯୋଜନା ତାଲିକାରେ ଏହି ଗରିବ ପରିବାରର ନାମନାହିଁ। ଏଥିପୂର୍ବରୁ ଆବାସ ଯୋଜନାରେ ଘର ଯୋଗାଇ ଦେବାକୁ ୨୦୧୬-୧୭ ମସିହାରେ ସେମାନେ ଆବେଦନ କରିଥିଲେ ହେଁ କୌଣସି ସୁଫଳ ମିଳିଲା ନାହିଁ। ୨୦୧୯-୨୦ ମସିହାରେ ଆବାସ ଯୋଜନାରେ ବି ଏହି ପରିବାର ସାମିଲ ହୋଇ ପାରିଲା ନାହିଁ। ଏବେ ନିଜସ୍ବ ଉଦ୍ୟମରେ ଘର ନିର୍ମାଣ କରିବା ପାଇଁ ଦେବରାଜଙ୍କ ଦୁଇ ଝିଅ ଏବଂ ପୁଅ ଅଣ୍ଟା ଭିଡ଼ିଛନ୍ତି। ଏଠାରେ କାମ ମିଳୁ ନ ଥିବାରୁ ଦାଦନ ଖଟି ଯିବାକୁ ନିଷ୍ପତ୍ତି ଗ୍ରହଣ କରି ଚଳିତ ବର୍ଷ ଆନ୍ଧ୍ରପ୍ରଦେଶକୁ ଦାଦନ ଖଟିବାକୁ ଯାଇଛନ୍ତି। ବୃଦ୍ଧ ବାପା ଘରେ ରହିଛନ୍ତି। ଏ ନେଇ ବିଡିଓ ରଶ୍ମିରଞ୍ଜନ ରାଉତଙ୍କୁ ପଚାରିବାରୁ ଆବାସ ଯୋଜନା ତାଲିକାରେ ନାମ ନଥିଲେ ଘର ଯୋଗାଇ ଦେବା ସମ୍ଭବ ନୁହେଁ। ତେବେ ତାଲିକାଭୁକ୍ତ ହୋଇ ନ ଥିବା ଯୋଗ୍ୟ ବ୍ୟକ୍ତିଙ୍କ ତାଲିକା କରାଯାଇଛି। ସରକାରୀ ଆଲଟମେଣ୍ଟ ଆସିଲେ ସେମାନଙ୍କୁ ପ୍ରାଥମିକତାଭିତ୍ତିରେ ଗୃହ ଯୋଗାଇ ଦେବା ବ୍ୟବସ୍ଥା କରାଯିବ ବୋଲି ସେ କହିଛନ୍ତି।
