କଟକ ଅଫିସ,୨୯ା୧୧: ଅନୁଗୋଳ ଜିଲା କଳାକେନ୍ଦ୍ରଠାରେ ଥିବା ଜିମ୍କୁ ମ୍ୟୁନିସିପାଲିଟି କାର୍ଯ୍ୟନିର୍ବାହୀ ଅଧିକାରୀ ତାଲାପକାଇବା ଘଟଣାରେ ହାଇକୋର୍ଟ ରିପୋର୍ଟ ତଲବ କରିଛନ୍ତି। ଜେନେରାଲ ୟୁଥ ମାସ୍ ଆସୋସିଏଶନ ପକ୍ଷରୁ ଆଗତ ଏକ ଜନସ୍ବାର୍ଥ ମାମଲାର ଶୁଣାଣି କରି ବିଚାରପତି ସାବିତ୍ରୀ ରଥ ପ୍ରତିପକ୍ଷଙ୍କୁ ନୋଟିସ ଜାରି କରିବା ସହ ଜିମ୍ ଖୋଲିବା ନେଇ ଯଦି ଆବେଦନକାରୀଙ୍କ ପକ୍ଷରୁ ଅନୁଗୋଳ ଜିଲାପାଳ ଏବଂ ମ୍ୟୁନିପାଲିଟି କାର୍ଯ୍ୟନିର୍ବାହୀ ଅଧିକାରୀଙ୍କ ନିକଟରେ ଆବେଦନ କରାଯାଏ, ତେବେ ଉକ୍ତ ଆବେଦନର ତ୍ୱରିତ ଶୁଣାଣି କରିବାକୁ ନିର୍ଦ୍ଦେଶ ଦିଆଯାଇଛି। ମାମଲାର ପରବର୍ତ୍ତୀ ଶୁଣାଣି ଆସନ୍ତା ୧୧ରେ ହେବ।
ଢେଙ୍କାନାଳ ପୂର୍ବତନ ଏମ୍ପିଙ୍କ ସାଂସଦ ପାଣ୍ଠିରୁ ଅନୁଗୋଳ ଜିଲା କଳାକେନ୍ଦ୍ରର ପ୍ରଥମ ମହଲାରେ ଏକ ଜିମ୍ ନିର୍ମାଣ କରାଯାଇଥିଲା। ଗୃହ ନିର୍ମାଣ ପାଇଁ ପ୍ରଥମେ ୧୫ଲକ୍ଷ, ନିର୍ମାଣ କାର୍ଯ୍ୟରେ ବିଳମ୍ବ ହେବାରୁ ଆଉ ୬ଲକ୍ଷ ଟଙ୍କା ମଞ୍ଜୁର ହୋଇଥିଲା। ଶେଷରେ ଜିମ୍ ଉପକରଣ ପାଇଁ ୨୨ଲକ୍ଷ ୫୦ହଜାର ଟଙ୍କା ପ୍ରଦାନ କରାଯାଇଥିଲା। ଏହି ନିର୍ମାଣ କାର୍ଯ୍ୟ ମ୍ୟୁନିସିପାଲିଟି ନିର୍ବାହୀ ଅଧିକାରୀଙ୍କ ତତ୍ତ୍ୱାଧାନରେ କରାଯାଇଥିଲା। ଗୃହ ନିର୍ମାଣ ଶେଷ ହେବା ପରେ ୩।୯।୨୦୧୮ରେ ସ୍ଥାନୀୟ ଜେନେରାଲ ୟୁଥ ମାସ୍ ଆସୋସିଏଶନକୁ ଅନୁଗୋଳ ମ୍ୟୁନିସିପାଲିଟି ଦ୍ୱାରା ହସ୍ତାନ୍ତର କରାଯାଇଥିଲା। ସେତେବେଳେ ଏନେଇ ଉଭୟ ମ୍ୟୁନିସିପାଲିଟି ଏବଂ ଜେନେରାଲ ୟୁଥ ମାସ୍ ମଧ୍ୟରେ ଏକ ଚୁକ୍ତି ମଧ୍ୟ ସ୍ବାକ୍ଷର ହୋଇଥିଲା। ଚୁକ୍ତି ଅନୁଯାୟୀ ମ୍ୟୁନିସିପାଲିଟି କର୍ତ୍ତୃପକ୍ଷ ଉକ୍ତ ଜିମ୍ର କାର୍ଯ୍ୟକାରୀ ଏଜେନ୍ସି ଭାବେ କାମ କରିବେ ଏବଂ ଜେନେରାଲ ୟୁଥ ମାସ୍ ଆସୋସିଏଶନ ଏହାକୁ ବ୍ୟବହାର କରି ସ୍ଥାନୀୟ ଅଞ୍ଚଳବାସୀଙ୍କୁ ଶାରୀରିକ ବ୍ୟାୟାମ ପ୍ରଶିକ୍ଷଣ ଦେବେ। ସେହି ଅନୁସାରେ ଜିମ୍ ପକ୍ଷରୁ ଲୋକମାନଙ୍କୁ ସେବା ଯୋଗାଇ ଦିଆଯାଉଥିଲା। ହେଲେ ଗତ ୨ତାରିଖରେ ବିନା କୌଣସି ପୂର୍ବ ନୋଟିସ୍ରେ ମ୍ୟୁନିସିପାଲର କାର୍ଯ୍ୟନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା ଉକ୍ତ ଜିମ୍କୁ ତାଲା ପକାଇ ଦେବାସହ ସେଠାରେ ଲାଗିଥିବା ଫଳକକୁ ଉପାଡ଼ି ଦେଇଥିଲେ। ଏହାକୁ ଜିମ୍ ପକ୍ଷରୁ ପ୍ରତିବାଦ କରାଯାଇଥିଲେ ସୁଦ୍ଧା ମ୍ୟୁନିସିପାଲ ପ୍ରଶାସନ କିଛି ଶୁଣି ନ ଥିଲେ। ଶେଷରେ ଜେନେରାଲ ୟୁଥ ମାସ୍ ଆସୋସିଏଶନର ସମ୍ପାଦକ ପ୍ରିୟବ୍ରତ ମହାପାତ୍ର ଗତ ୧୭ତାରିଖରେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଏନେଇ ହାଇକୋର୍ଟରେ ଏକ ମାମଲା(ନଂ.୩୧୬୫୨/୨୦୨୦) ରୁଜୁ ହୋଇ ଗତ ୨୫ତାରିଖରେ ଶୁଣାଣି ହୋଇଥିଲା। ଇତିମଧ୍ୟରେ ପୌର ନିର୍ବାହୀ ଅଧିକାରୀ ପଣ୍ଡାଙ୍କ ବଦଳି ହୋଇଯାଇଛି। ପଣ୍ଡାଙ୍କୁ ପଚାରିବାରେ ସେ କହିଛନ୍ତି, ଜିଲାପାଳ ପାୈର କାଉନ୍ସିଲର ପ୍ରଶାସକ ଅଛନ୍ତି। ଜେନେରାଲ ୟୁଥ ମାସ୍ ସହ ଠିକ୍ଭାବେ ଚୁକ୍ତି ହୋଇ ନ ଥିଲା। ତେଣୁ ଏହା ପୌର କାଉନ୍ସିଲରେ ଖାରଜ ହୋଇଯାଇଥିଲା। ଜିଲାପାଳଙ୍କ ନିର୍ଦ୍ଦେଶ ତଥା ପାୈର ଆଇନ ଅନୁସାରେ ଏବେ ଉକ୍ତ ଜିମ୍କୁ ଜେନେରାଲ ୟୁଥ ମାସ୍ଠାରୁ ଅଣାଯାଇ ପୌର ପ୍ରଶାସନ ଏହାକୁ ଚଳାଉଛି। ହାଇକୋର୍ଟରେ ଏନେଇ ମାମଲା ହୋଇଥିବା ନେଇ ସେ କିଛି ଜାଣି ନାହାନ୍ତି ବୋଲି ପଣ୍ଡା କହିଛନ୍ତି।
