ଢେଙ୍କାନାଳ ଅଫିସ, ୨୫ ।୧ ଝିଅ ବାହାଘର ପାଇଁ ମାମୁ ଘରକୁ ଦେବାକୁ ଯାଉଥିଲେ ଗୁଆ। ହେଲେ ରାସ୍ତାରେ ଆଇରନ୍ ବୋଝେଇ ଟ୍ରକ୍ ସାଜିଲା ମୃତ୍ୟୁର ଦୂତ ଏବଂ ଦୁର୍ଘଟଣାରେ ସବୁଦିନ ପାଇଁ ଅଫେରା ରାଇଜକୁ ଚାଲିଗଲେ ଢେଙ୍କାନାଳ ଜିଲା କଣ୍ଟାବଣିଆ ଥାନା ମଙ୍ଗଳପୁର ଗ୍ରାମର ଚିନ୍ତାମଣି ସାହୁ (୪୦)। ସୋମବାର ଅପରାହ୍ନ ପ୍ରାୟ ୨ଟାରେ ୫୫ନଂ. ଜାତୀୟ ରାଜପଥର ଇଟାପ ଓଭରବ୍ରିଜ୍ ନିକଟରେ ଘଟିଥିବା ଏଭଳି ଏକ ଦୁଃଖଦ ଦୁର୍ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ଦୁର୍ଘଟଣା ପରେ ସ୍ଥାନୀୟ ଅଞ୍ଚଳରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା। ଅଞ୍ଚଳବାସୀ ଟାୟାର ଜାଲି ରାସ୍ତା ଅବରୋଧ କରିଥିଲେ। କଣ୍ଟାବଣିଆ ଥାନାରେ ଓଡ଼ାପଡ଼ା ତହସିଲଦାର ବାଣୀ ନିବେଦିତା ସ୍ବାଇଁ, ଥାନାଧିକାରୀ ସବିତା ପାତ୍ର, ମୋଟଙ୍ଗା ଥାନାଧିକାରୀ ନିରଞ୍ଜନ ସେଠୀ ପ୍ରମୁଖ ଉତ୍ତ୍ୟକ୍ତ ଲୋକଙ୍କ ସହ ଆଲୋଚନା କରିଥିଲେ। ଦୁର୍ଘଟଣା ଘଟାଇଥିବା ଟ୍ରକ୍ ମାଲିକ ମୃତକଙ୍କ ପରିବାରକୁ ୧ ଲକ୍ଷ ୮୦ ହଜାର ଟଙ୍କା କ୍ଷତିପୂରଣ ଦେବାକୁ ସହମତ ହୋଇଛନ୍ତି। ସେହିପରି ଜାତୀୟ ରାଜପଥରେ ହୋଇଥିବା ଖାଲଖମା ମରାମତି କରିବା ସହ ଯାନବାହନ ଚଳାଚଳ ସୁଗମ କରିବାକୁ ପ୍ରଶାସନ ପକ୍ଷରୁ ପ୍ରତିଶ୍ରୁତି ଦିଆଯାଇଛି। ଏହାପରେ ରାସ୍ତା ଅବରୋଧ ହଟିଥିଲା।
ପୋଲିସ ସୂଚନା ଅନୁଯାୟୀ, ଆସନ୍ତା ଫେବୃୟାରୀ ୫ରେ ଚିନ୍ତାମଣିଙ୍କ ଝିଅ ବାହାଘର ସ୍ଥିର ହୋଇଛି। ଏଥିଲାଗି ସେ ମାମୁ ଘର ବିଡୋ ଗ୍ରାମକୁ ଗୁଆ ଦେବା ପାଇଁ କଣ୍ଟାବଣିଆ ଛକରୁ ବାଇକ୍ରେ ଯାଉଥିଲେ। ଇଟାପ ଓଭରବ୍ରିଜ୍ ନିକଟରେ ଟାଟାଷ୍ଟିଲ୍ କମ୍ପାନୀକୁ ଆଇରନ୍ ଧରି ଆସୁଥିବା ଏକ ଟ୍ରକ୍ ତାଙ୍କୁ ଧକ୍କା ଦେଇଥିଲା। ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା।
