ଚମୋଲି/ନୂଆଦିଲ୍ଲୀ,୧୪ା୧: ଉତ୍ତରାଖଣ୍ଡର ଚମୋଲି ଜିଲା ଜୋଷୀମଠର ମୂଳଦୁଆ ଦୋହଲିଯାଇଛି। ଗତ ଡିସେମ୍ବର ୨୭ରୁ ଜାନୁୟାରୀ ୮ ତାରିଖ (ମାତ୍ର ୧୨ ଦିନ) ଭିତରେ ଏହି ଧର୍ମନଗରୀ ୫.୪ ସେଣ୍ଟିମିଟର ଦବିଯାଇଛି। ଭାରତୀୟ ମହାକାଶ ଗବେଷଣା ସଙ୍ଗଠନ (ଇସ୍ରୋ)ର ନ୍ୟାଶନାଲ ରିମୋଟ ସେନ୍ସିଂ ସେଣ୍ଟର ପକ୍ଷରୁ ସଦ୍ୟ ଜାରି ଉପଗ୍ରହ ଚିତ୍ରରୁ ଏହି ବିଷୟ ସ୍ପଷ୍ଟ ହୋଇଛି।
ହିମାଳୟ ପାଦଦେଶରେ ଥିବା ଲୋକପ୍ରିୟ ତୀର୍ଥସ୍ଥଳୀ ବଦ୍ରିନାଥର ପ୍ରବେଶପଥ ଭାବେ ଜଣାଶୁଣା ଜୋଷୀମଠର ରାସ୍ତାଘାଟ, ଘର କାନ୍ଥ ଓ ଅନ୍ୟାନ୍ୟ ଭିତ୍ତିଭୂମିଗୁଡ଼ିକରେ ଲଗାତର ଭାବେ ଫାଟ ସୃଷ୍ଟି ହେବା ଏବଂ ଏହାର ବ୍ୟବଧାନ ବଢ଼ିଚାଲିବା ଉତ୍ତରାଖଣ୍ଡ ଓ କେନ୍ଦ୍ର ସରକାରଙ୍କ ପାଇଁ ଚିନ୍ତାର କାରଣ ହୋଇଛି। ଏହି ପରିପ୍ରେକ୍ଷୀରେ ଇସ୍ରୋ ନିଜ ରିପୋର୍ଟରେ ଦର୍ଶାଇଛି ଯେ ଜାନୁୟାରୀ ୨ରେ ହୋଇଥିବା ଭୂସ୍ଖଳନ ଯୋଗୁ ସେଣ୍ଟ୍ରାଲ ଜୋଷୀମଠ ଭୂମି ତଳକୁ ଖସିଯାଇଛି। ସମ୍ପୃକ୍ତ ଅଞ୍ଚଳରେ ଭାରତୀୟ ସେନାର ହେଲିପ୍ୟାଡ୍ ଓ ଏକ ମନ୍ଦିର ରହିଛି। ଭୂସ୍ଫଳନର ମୁଖ ୨,୧୮୦ ମିଟର ଉଚ୍ଚତାରେ ଥିବା ଜୋଷୀମଠ-ଅଉଲି ରୋଡ୍ରେ ଅବସ୍ଥିତ। ମହାକାଶ ସଂସ୍ଥା ଗବେଷଣାରୁ ଆହୁରି ଜାଣିବାକୁ ପାଇଛି ଯେ ଜୋଷୀମଠ ସହର ନିମ୍ନକୁ ଖସିବା ହାର ପୂର୍ବ ମାସଗୁଡ଼ିକରେ ଅତି କମ୍ ଥିଲା। ୨୦୨୨ ଏପ୍ରିଲରୁ ନଭେମ୍ବର (୭ ମାସ) ମଧ୍ୟରେ ଏହା ୯ ସେ.ମି. ଡୁବିଥିଲା। କାର୍ଟେସାଟ୍-୨ଏସ୍ ସାଟେଲାଇଟ୍ ଜରିଆରେ ଏହି ଚିତ୍ର ସଂଗୃହୀତ ହୋଇଛି। ସଟେଲାଇଟ୍ ସର୍ଭେ ପରଠୁ ୪,୦୦୦ ଲୋକଙ୍କୁ ରିଲିଫ୍ କ୍ୟାମ୍ପ୍ଗୁଡ଼ିକୁ ସ୍ଥାନାନ୍ତର କରାଯାଇଛି। ହୋଟେଲ ଓ ବ୍ୟବସାୟିକ ପ୍ରତିଷ୍ଠାନଗୁଡ଼ିକ ସମେତ ୬୭୮ ଘରକୁ ବିପଦସଙ୍କୁଳ ବୋଲି ରାଜ୍ୟ ସରକାର ସୂଚନା ଦେଇଛନ୍ତି। ଭୂସ୍ଫଳନ ପାଇଁ ସ୍ଥାନୀୟ ଲୋକେ ଓ ବିଶେଷଜ୍ଞମାନେ ଅଣଯୋଜନାବଦ୍ଧ ତଥା ଅବାଧ ଭିତ୍ତିଭୂମି ପ୍ରକଳ୍ପ ନିର୍ମାଣକୁ ଦାୟୀ କରିଛନ୍ତି। ବିଶେଷକରି ପାହାଡ଼ ଉପରେ ନିର୍ମାଣାଧୀନ ଏକ ପାଓ୍ବାର ପ୍ଲାଣ୍ଟରେ ଚାଲିଥିବା ବ୍ଲାଷ୍ଟିଂ ଓ ଡ୍ରିିଲିଂ ଯୋଗୁ ଏପରି ହେଉଥିବା ସେମାନେ କହିଛନ୍ତି। ନ୍ୟାଶନାଲ ଥର୍ମାଲ ପାଓ୍ବାର କର୍ପୋରେଶନ୍ (ଏନ୍ଟିପିସି) ପକ୍ଷରୁ ତପୋବନ ବିଷ୍ଣୁଗଡ଼ରେ ୪X୧୩୦ ମେଗାଓ୍ବାଟ୍ ବିଶିଷ୍ଟ ଜଳବିଦ୍ୟୁତ୍ ପ୍ରକଳ୍ପ ପାଇଁ ୨୦୦୬ରୁ ନିର୍ମାଣାଧୀନ ଥିବା ୧୨ କି.ମି. ଲମ୍ବର ଏକ ଟନେଲ ଯୋଗୁ ଭୂସ୍ଫଳନ ହେଉଥିବା ଅଭିଯୋଗ ହୋଇଛି। ୮ଟି ସଂସ୍ଥା ମିଳିତ ଭାବେ ଏହାର ଯାଞ୍ଚ କରିବେ। ରାଜ୍ୟ କ୍ୟାବିନେଟ ବୈଠକରେ ଏହି ନିଷ୍ପତ୍ତି ନିଆଯାଇଛି। ଅନ୍ୟପକ୍ଷେ ଏନ୍ଟିପିସିର ଟନେଲ ନିର୍ମାଣ କାର୍ଯ୍ୟ ଜୋଷୀମଠ ସହରରୁ ୧.୧ କି.ମି. ଦୂରରେ ଚାଲିଥିବା ଏହି ରାଷ୍ଟ୍ରାୟତ୍ତ ଉଦ୍ୟୋଗ ପକ୍ଷରୁ ଶକ୍ତି ମନ୍ତ୍ରଣାଳୟକୁ ଅବଗତ କରାଯାଇଛି। ପ୍ରଭାବିତ ଲୋକଙ୍କୁ ୧.୫ ଲକ୍ଷ ଟଙ୍କା ଲେଖାଏ ଆର୍ଥିକ ସହାୟତା ଦିଆଯାଇଥିବା ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି କହିଛନ୍ତି।
