ଭଞ୍ଜନଗର,୩୦ା୯(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଗ୍ରାମ୍ୟ ଉନ୍ନୟନ ବିଭାଗ ଅଧୀନରେ ଲୋହରାଖଣ୍ଡି ନଦୀ ଉପରେ ନିର୍ମାଣାଧୀନ ମହାଗୁଡ଼ା-ସରପଡ଼ା ସେତୁ କାମ ମନ୍ଥର ଗତିରେ ଚାଲିଛି। ନିର୍ଦ୍ଧାରିତ ସମୟର ୧୦ ମାସ ବିତିଯାଇଥିଲେ ମଧ୍ୟ ଏଯାବତ୍ ୫୦ ପ୍ରତିଶତ କାମ ମଧ୍ୟ ସରି ନ ଥିବା ଅଭିଯୋଗ ହୋଇଛି। ଅନ୍ୟପଟେ ସେତୁ ନିକଟରେ ଥିବା ଶିଳାନ୍ୟାସ ଫଳକ ମଧ୍ୟ ମାଟି ଭିତରେ ପୋତି ହୋଇଯାଇଛି। ସେତୁ ନିର୍ମାଣ କାମରେ ବିଳମ୍ବ ଯୋଗୁ ସ୍ଥାନୀୟ ଲୋକେ ଯାତାୟାତରେ ନାନା ସମସ୍ୟାର ସମ୍ମୁଖୀନ ହେଉଛନ୍ତି। ବର୍ଷା ସମୟରେ ଲୋହରାଖଣ୍ଡି ନଦୀରେ ଜଳସ୍ତର ବୃଦ୍ଧି ପାଇଲେ ଲୋକେ ବାଧ୍ୟ ହୋଇ ବିକଳ୍ପ ରାସ୍ତା ଭାବେ କେନାଲ ସେତୁ ଉପରେ ଯାତାୟାତ କରୁଛନ୍ତି। ନଦୀ ଉପର ଦେଇ କେନାଲ ଯାଇଥିବାରୁ ବର୍ଷା ସମୟରେ ଏହି ରାସ୍ତାରେ ଯାତାୟାତ ଅତ୍ୟନ୍ତ ବିପଦସଙ୍କୁଳ ହୋଇପଡ଼ୁଛି। ତୁରନ୍ତ ସେତୁ କାମ ତ୍ୱରାନିତ୍ୱ କରି ନିର୍ମାଣ ଶେଷ କରିବାକୁ ସାଧାରଣରେ ଦାବି ହୋଇଛି।
ଘଟଣାରୁ ପ୍ରକାଶ ଯେ, ୨୦୨୩ ଜୁଲାଇ ମାସରେ ଉକ୍ତ ସେତୁ ନିର୍ମାଣ କାମର ଶିଳାନ୍ୟାସ ହୋଇଥିଲା। ଏଥିପାଇଁ ୫ କୋଟି ୬୬ ଲକ୍ଷ ୫୯ ହଜାର ୯୪୯ ଟଙ୍କା ବ୍ୟୟ ଅଟକଳ ରଖାଯାଇଥିଲା। ୨୦୨୫ ନଭେମ୍ବର ୩୦ ସୁଦ୍ଧା କାମ ଶେଷ କରିବାକୁ ଲକ୍ଷ୍ୟ ଧାର୍ଯ୍ୟ ହୋଇଥିଲା। ତେବେ ନିର୍ଦ୍ଧାରିତ ସମୟସୀମା ଅତିକ୍ରମ କରିଯାଇଥିଲେ ମଧ୍ୟ କାମର ଅଗ୍ରଗତି ୫୦ ପ୍ରତିଶତରୁ କମ୍ ରହିଥିବା ଜଣାପଡ଼ିଛି।
ସୂଚନାନୁସାରେ, ଗତବର୍ଷ ବର୍ଷା ଋତୁରେ ଗୋଟିଏ ପିଲାର ଉପରେ ସେତୁର ଛାତ ପଡ଼ିଥିଲା। ପରବର୍ତ୍ତୀ ସମୟରେ ଉକ୍ତ ଛାତରେ ଖାଲଢିପ ଦେଖାଦେବାରୁ ତାହାକୁ ଭାଙ୍ଗି ଦିଆଯାଇଥିଲା। ଏହାପରଠାରୁ ସେତୁ ନିର୍ମାଣ କାମ ଆହୁରି ମନ୍ଥର ହୋଇଥିବା ସ୍ଥାନୀୟ ଲୋକେ କହିଛନ୍ତି। ଏ ସମ୍ପର୍କରେ ବିଭାଗୀୟ ଅଧୀକ୍ଷଣ ଯନ୍ତ୍ରୀଙ୍କ ମତାମତ ନେବାକୁ ତାଙ୍କର ସରକାରୀ ଫୋନ୍ ନମ୍ବରରେ ଯୋଗାଯୋଗ କରାଯାଇଥିଲା। କିନ୍ତୁ ଉକ୍ତ ଫୋନ୍ ନମ୍ବର ନ ଲାଗିବାରୁ ତାଙ୍କ ମତାମତ ନିଆଯାଇପାରିନାହିଁ।