ପାଟଣା,୨୬।୮(ସ୍ବ. ପ୍ର.): ଲଘୁଚାପ ଜନିତ ଲଗାଣ ବର୍ଷା ଯୋଗୁ କେନ୍ଦୁଝର ଜିଲା ପାଟଣା ବ୍ଲକ ତୁରୁମୁଙ୍ଗା ଦେଇ ଯାଇଥିବା ୪୯ନଂ. ଜାତୀୟ ରାଜପଥରେ ଥିବା ବୈତରଣୀ ପୋଲ ଉପରେ ବୁଧବାର ପ୍ରଥମ ବନ୍ୟା ଜଳ ପ୍ରବାହିତ ହୋଇଛି। ଫଳରେ ପୋଲର ଉଭୟ ପାର୍ଶ୍ୱରେ ଶହଶହ ଯାନବାହନ ଅଟକି ରହଛି। ଏହାସହ ଯୋଗାଯୋଗ ବିଛିନ୍ନ ହୋଇଛି। କେନ୍ଦୁଝର ପାର୍ଶ୍ୱରୁ କଲିକତା, ଟାଟା, ଝାରଖଣ୍ଡ ଓ କରଞ୍ଜିଆକୁ ଗମନାଗମନ ମଧ୍ୟ ଠପ ହୋଇଛି।
ଅନୁରୂପ ଭାବେ ପାଟଣା କେନ୍ଦେଇପଶି ରାସ୍ତାର ଭିମାପଡା ନିକଟରେ ଥିବା କାନଝରି ନଦୀ ପୋଲ ଉପରେ ବୁଧବାର ୪ ଫୁଟ ଉଚ୍ଚରେ ବନ୍ୟାଜଳ ପ୍ରବାହିତ ହେବା ଫଳରେ ପାଟଣା, କେନ୍ଦୁଝର, ତୁରୁମୁଙ୍ଗା,କେନ୍ଦେଇପଶି ଓ ବାଉଁଶୁଳିକୁ ଯୋଗାଯୋଗ ବିଛିନ୍ନ ହୋଇଛି। ସେହିଭଳି ପାଟଣା ଢେଙ୍କିକୋଟ ରାସ୍ତାର ସ୍ବାମ ନାଳ ପୋଲ ଉପରେ ବନ୍ୟାଜଳ ପ୍ରବାହିତ ହେବାରୁ ମଲ୍ଲୀପଶି, ଢେଙ୍କିକୋଟ ଓ ଘଟଗାଁକୁ ଗମନାଗମନ ବାଧା ପ୍ରାପ୍ତ ହୋଇଛି। ଉଭୟ ପାର୍ଶ୍ୱରେ ଗାଡିମଟର ଅଟକି ରହିଛି।
ଢେଙ୍କିକୋଟ ପାର୍ଶ୍ୱରୁ କରଞ୍ଜିଆ ଯାଉଥିବା ଏକ ଗାଡ଼ି ବିପଦ ସଙ୍କୁଳ ଅବସ୍ଥାରେ ସ୍ବାମ ନାଳ ପାର ହେଉଥିବା ବେଳେ ଭାସି ଯାଇଛି। ଚାଳକ ଅଳ୍ପକେ ବର୍ତ୍ତି ଥିବା ବେଳେ ତାଙ୍କୁ ପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି।
