ବୌଦ୍ଧ,୬ା୨(ସ୍ବ.ପ୍ର.): ବୌଦ୍ଧ ଜିଲା ହରଭଙ୍ଗା ବ୍ଲକ ବୀରନରସିଂହପୁର ପଞ୍ଚାୟତର ବିରାମଚନ୍ଦ୍ରପୁର ଗ୍ରାମରେ ପ୍ରଥମ ଥର ପାଇଁ ୱାର୍ଡମେମ୍ବର ପଦବୀ ଲାଗି ନିର୍ବାଚନ ହେବାକୁ ଯାଉଛି। ଏହି ଗ୍ରାମରେ ଦେଶ ସ୍ବାଧୀନ ହେବା ପରଠାରୁ କେବେ ବି ୱାର୍ଡମେମ୍ବର ପଦବୀ ଲାଗି ନିର୍ବାଚନ ହୋଇନାହିଁ। ଗ୍ରାମବାସୀଙ୍କ ସହମତିରେ ୱାର୍ଡମେମ୍ବର ଚୟନ କରାଯାଇଥାଏ। କିନ୍ତୁ ଚଳିତ ନିର୍ବାଚନରେ ପ୍ରଥମ ଥର ପାଇଁ ନିର୍ବାଚନ ହେଉଛି।
ସୂଚନା ମୁତାବକ, ବିରାମଚନ୍ଦ୍ରପୁର ଗ୍ରାମରେ ପଞ୍ଚାୟତର ୫, ୬ ଓ ୭ ନମ୍ବର ୱାର୍ଡ ରହିଛି। ସମସ୍ତ ୱାର୍ଡ ପାଇଁ ଦୁଇ ଜଣ ଲେଖାଏ ପ୍ରାର୍ଥୀ ନିର୍ବାଚନ ଲଢୁଛନ୍ତି। ୫ ନମ୍ବର ୱାର୍ଡ ପାଇଁ ସୁରେନ୍ଦ୍ର୍ର ମଲିକ ଓ ଗୋପାଳ ବାଗ, ୬ ନମ୍ବର ୱାର୍ଡ ପାଇଁ ବଳରାମ ବେହେରା ଓ ଆର୍ତ୍ତ ବେହେରା ଏବଂ ୭ ନମ୍ବର ୱାର୍ଡ ପାଇଁ ପ୍ରମିଳା ବେହେରା ଓ ବାସନ୍ତୀ ବେହେରାଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିତା ହେଉଛି। ପୂର୍ବରୁ କେବେ ବି ନିର୍ବାଚନ ହୋଇ ନ ଥିବା ବେଳେ ଏଥର ପ୍ରଥମ ଥର ପାଇଁ ନିର୍ବାଚନ ହେଉଥିବାରୁ ଗ୍ରାମର ଏକତା ଏକ ପ୍ରକାର ଭଗ୍ନ ହେବ ବୋଲି କୁହାଯାଉଛି। ମାତ୍ର ଏକ ଗଣତାନ୍ତ୍ରିକ ଦେଶରେ ଚଳିତଥର ୱାର୍ଡମେମ୍ବର ନିର୍ବାଚନ ହେଉଥିବାରୁ ଗ୍ରାମର ବିକାଶଧାରା ତ୍ୱରାନ୍ବିତ ହେବ ବୋଲି ଯୁବ ସ୍ବେଚ୍ଛାସେବୀ ବାଲ୍ମିକୀ ମହାକୁଡ ମତ ଦେଇଛନ୍ତି।
