ବରଗଡ ଅଫିସ,୧୪।୧୨- ବୃହତ ମୁକ୍ତାକାଶ ରଙ୍ଗମଞ୍ଚ ବରଗଡ ଧନୁଯାତ୍ରା ମହୋତ୍ସବକୁ ଏଥର ବାତିଲ କରାଯାଇଛି। କରୋନା କଟକଣାକୁ ଆଖି ଆଗରେ ରଖି ଧନୁଯାତ୍ରା ମହୋତ୍ସବ ସମିତି ଏଭଳି ନିଷ୍ପତ୍ତି ନେଇଛି। ତେବେ ଏଭଳି ନିଷ୍ପତ୍ତିକୁ କଳାକାର ମହାସଂଘ ସ୍ବାଗତ କରିଛି। ଅନ୍ୟପକ୍ଷରେ ଧନୁଯାତ୍ରା ବାତିଲ ଯୋଗୁ ଏହି ମହୋତ୍ସବରେ ଅଭିନୟ କରୁଥିବା କଳାକାରଙ୍କ ରୋଜଗାର ଆଶା ମଉଳି ଯାଇଛି। ଫଳରେ ଏଭଳି ସ୍ଥିତିରେ ଗତବର୍ଷ ଧନୁଯାତ୍ରାରେ ଅଭିନୟ କରିଥିବା କଳାକାରଙ୍କୁ ଯେଉଁ ଆଧାରରେ ପାରିଶ୍ରମିକ ଦିଆଯାଇଥିଲା, ଏଥର ଧନୁଯାତ୍ରା ବାତିଲ ହୋଇଥିଲେ ସୁଦ୍ଧା ସମ୍ପୃକ୍ତ କଳାକାରଙ୍କୁ ଆର୍ଥିକ ସହାୟତା ପ୍ରଦାନ ପାଇଁ କଳାକାର ମହାସଂଘ ଦାବି କରିଛି ଏବଂ ସୋମବାର ଏ ନେଇ ବରଗଡ ଜିଲାପାଳ ତଥା ଧନୁଯାତ୍ରା ମହୋତ୍ସବ ସମିତିର ସଭାପତି ଜ୍ୟୋତିରଞ୍ଜନ ପ୍ରଧାନଙ୍କୁ ଏକ ସ୍ମାରକପତ୍ର ପ୍ରଦାନ କରିଛି। ମହାସଂଘର ସଭାପତି ଚୈତନ୍ୟ ପାଇକଙ୍କ ନେତୃତ୍ୱରେ ବରଗଡ ଧନୁଯାତ୍ରା କଂସ ମହାରାଜ ଅଭିନେତା ଭୁବନେଶ୍ବର ପ୍ରଧାନଙ୍କ ସମେତ ବହୁ କଳାକାର ସ୍ମାରକପତ୍ର ପ୍ରଦାନ ସମୟରେ ଉପସ୍ଥିତ ଥିଲେ।
