ବେଙ୍ଗାଲୁରୁ, ୧୨।୨: ମା’ଙ୍କର ଅନ୍ୟ ଜଣେ ବ୍ୟକ୍ତିଙ୍କ ସହ ଅବୈଧ ସମ୍ପର୍କ ଥିଲେ ସନ୍ତାନର ହେପାଜତ ବାପା ନେବେ ବୋଲି ଏକ ମାମଲାର ଶୁଣାଣିବେଳେ ଏକ ଫ୍ୟାମିଲି କୋର୍ଟଙ୍କ ରାୟକୁ କର୍ନାଟକ ହାଇକୋର୍ଟ କାଏମ କରିଛନ୍ତି। ଅନ୍ୟ ପୁରୁଷଙ୍କ ସହ ଅନୈତିକ ସମ୍ପର୍କ ରଖିବା ଯୋଗୁ ମହିଳାଜଣକ ନିଜ ପିଲାଙ୍କୁ ଅଣଦେଖା କରିବେ। ଏ ନେଇ ପିଲାର ଦାୟିତ୍ୱ ବାପା ନେବା ଉଚିତ୍ ବୋଲି ହାଇକୋର୍ଟ କହିଛନ୍ତି। ମାଟ୍ରିମୋନିଆଲ ସାଇଟ୍ରୁ ପରସ୍ପର ସହ ଭେଟିବା ପରେ ୨୦୧୧ରେ ଦୁଇ ଡାକ୍ତର ବାହାହୋଇଥିଲେ। ୨୦୧୫ରେ ସେମାନଙ୍କର ଏକ କନ୍ୟା ସନ୍ତାନ ଜନ୍ମ ନେଇଥିଲା। ବିବାହର କିଛିବର୍ଷ ପରେ ସେମାନଙ୍କ ମଧ୍ୟରେ ମତାନ୍ତର ଦେଖାଯାଇଥିଲା। ପରେ ସେମାନେ ଛାଡ଼ପତ୍ର ପାଇଁ କୋର୍ଟରେ ଆବେଦନ କରିଥିଲେ। ୨୦୧୮ରୁ ଶାଶୁଘର ଛାଡ଼ି ମହିଳାଜଣକ ବେଙ୍ଗାଲୁରୁରେ ଅନ୍ୟ ପୁରୁଷଙ୍କ ସହ ରହୁଥିଲେ। ଦମ୍ପତି ପେସାରେ ଡାକ୍ତର ହୋଇଥିବାବେଳେ ଦୁଇଜଣଯାକ ସେମାନଙ୍କ ପୂର୍ବତନ ପାର୍ଟନରଙ୍କଠାରୁ ଛାଡ଼ପତ୍ର ଆଣିଛନ୍ତି। ସ୍ତ୍ରୀଙ୍କର ଅନ୍ୟ ପୁରୁଷଙ୍କ ସହ ଅବୈଧ ସମ୍ପର୍କ ବିଷୟରେ ଜାଣିପାରି ତାଙ୍କ ସ୍ବାମୀ ଝିଅର ହେପାଜତ ପାଇଁ କୋର୍ଟରେ ଆଉ ଏକ ମାମଲା ଦାଏର କରିଥିଲେ। ୨୦୨୨ ମାର୍ଚ୍ଚ ୩ରେ କର୍ନାଟକ ଫ୍ୟାମିଲି କୋର୍ଟ ମାମଲାର ଶୁଣାଣି କରି ଝିଅର କଷ୍ଟଡି ବାପାଙ୍କୁ ଦେବା ଲାଗି ନିର୍ଦ୍ଦେଶ ଦେଇଥିଲେ। କୋର୍ଟଙ୍କ ନିର୍ଦ୍ଦେଶକୁ ମହିଳାଜଣକ ହାଇକୋର୍ଟରେ ଚ୍ୟାଲେଞ୍ଜ କରିଥିଲେ। ଝିଅର ହେପାଜତ ବାପାଙ୍କୁ ଦେବା ଲାଗି କହିବା ପରେ କୋର୍ଟ ମହିଳାଙ୍କ ଅପିଲକୁ ଖାରଜ କରିଛନ୍ତି।
