ପଦ୍ମପୁର, ୨୦।୧ (ଡି.ଏନ.ଏ.) ଭଦ୍ରକ ଜିଲା ବାସୁଦେବପୁର ବ୍ଲକ ଲୁଙ୍ଗା ପଞ୍ଚାୟତର ପୁରୁଦା ସେବା ସମବାୟ ସମିତିରେ ଧାନ କଟ୍ନୀକୁ ନେଇ ଚାଷୀମାନେ ଅସନ୍ତୋଷ ପ୍ରକାଶ କରିବା ସହ ବୁଧବାର ସେମାନେ ମିଲରଙ୍କୁ ଘେରିଥିଲେ। ପ୍ରକାଶ ଯେ, ଜାନୁୟାରୀ ୫ରୁ ଚାଷୀଙ୍କଠାରୁ ଧାନ କିଣିବା ପାଇଁ ରାଜ୍ୟ ସରକାରଙ୍କ ପକ୍ଷରୁ ଧାର୍ଯ୍ୟ କରାଯାଇଥିଲା। ଏନେଇ ବାସୁଦେବପୁର ବ୍ଲକର ୨୦ ସେବା ସମବାୟ ସମିତି ଓ ୭ ସ୍ବୟଂସହାୟକ ଗୋଷ୍ଠୀ ମଣ୍ଡି ଖୋଲି ଚାଷୀଙ୍କଠାରୁ ଧାନ କିଣିବା ପାଇଁ ଜିଲା ଯୋଗାଣ ବିଭାଗ ପକ୍ଷରୁ ନିର୍ଦ୍ଦେଶ ଦିଆଯାଇଥିଲା। କିନ୍ତୁ ଧାନ କ୍ରୟ ନିମନ୍ତେ ସହବନ୍ଧିତ ହୋଇଥିବା ମିଲରମାନେ ୮ ପ୍ରତିଶତ ଧାନ କଟ୍ନୀ ନ କଲେ କିଣିବେ ନାହିଁ ବୋଲି କହି ଦେଇଥିଲେ। ପୁରୁଦା ସେବା ସମବାୟ ସମିତିରୁ ଧାନ କିଣିବାକୁ ଏକ ମିଲ୍ କର୍ମଚାରୀ ଓ ଆର୍ଏମ୍ସିର କର୍ମଚାରୀ ଆସିଥିବା ବେଳେ କଟ୍ନୀକୁ ନେଇ ଚାଷୀମାନେ ଅସନ୍ତୋଷ ପ୍ରକାଶ କରି ମିଲରଙ୍କୁ ଘେରି ଯାଇଥିଲେ। ସରକାର ମନା କରିଥିବା ବେଳେ କେଉଁ ଉଦ୍ଦେଶ୍ୟରେ କଟ୍ନୀ କରାଯାଉଛି ବୋଲି ଚାଷୀମାନେ ପ୍ରଶ୍ନ କରିଥିଲେ।
ସମିତିରେ ୫୧୧ଜଣ ଚାଷୀ ଅନ୍ଲାଇନ ପଞ୍ଜୀକରଣ କରିଥିବା ବେଳେ ପ୍ରଥମ ପର୍ଯ୍ୟାୟରେ ୨୮ ହଜାର କୁଇଣ୍ଟାଲ ଧାନ କ୍ରୟ ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଛି। ଆଗାମୀ ଦିନରେ ଜିଲା ଯୋଗାଣ ବିଭାଗ ଧାନ କଟ୍ନୀ ବାବଦରେ କୌଣସି ପଦକ୍ଷେପ ନ ନେଲେ ଆନ୍ଦୋଳନ କରିବେ ବୋଲି ଚାଷୀମାନେ ଚେତାବନୀ ଦେଇଛନ୍ତି।
