ବାରିପଦା ଅଫିସ,୩୦।୧୧: ବାରିପଦା ସହରକୁ ସଂଯୋଗ କରୁଥିବା ୧୮ନଂ. ଜାତୀୟ ରାଜପଥର ପାଲବଣି ବାଇପାସ ପ୍ରବେଶ ପଥ ରାସ୍ତା ବନ୍ଦ କରାଯିବା ଘଟଣାରେ ଜିଲା ବିଜେଡି ପ୍ରତିବାଦର ସ୍ବର ଉଠାଇଛି। ଜାତୀୟ ରାଜପଥ ପ୍ରାଧିକରଣ(ଏନ୍ଏଚ୍ଆଇ)ର ତ୍ରୁଟିପୂର୍ଣ୍ଣ ନିର୍ମାଣ ଯୋଗୁ ଜିଲା, ପଡ଼ୋଶୀ ଜିଲା ଓ ସହରବାସୀ ବହୁ ଅସୁବିଧାର ସମ୍ମୁଖିନ ହେଉଛନ୍ତି। ପାଲବଣି, ଦାଗୋଗାଡାହି, ମୁର୍ଗାବାଡ଼ି ଓ ଦାରଗାଡ଼ି ଗୋଲାଇ ମଧ୍ୟରେ ଦୁଇଟି ଗଳାପୋଲ ନିର୍ମାଣ କରିବାକୁ ବିଜେଡି ପକ୍ଷରୁ ମୟୂରଭଞ୍ଜ ଜିଲାପାଳ ବିନୀତ ଭରଦ୍ୱାଜଙ୍କ ସମେତ ଏନ୍ଏଚ୍ଆଇ ପ୍ରକଳ୍ପ ନିର୍ଦ୍ଦେଶକ ଓ ରାଜ୍ୟ ମୁଖ୍ୟଙ୍କୁ ଦାବିପତ୍ର ପ୍ରଦାନ କରାଯାଇଛି ା
ବାଲେଶ୍ୱରରୁ ଝାରପୋଖରିଆ ପର୍ଯ୍ୟନ୍ତ ୪ ଲେନ୍ ବିଶିଷ୍ଟ ଜାତୀୟ ରାଜପଥ ସମ୍ପ୍ରସାରଣ କାର୍ଯ୍ୟ ଅନ୍ତିମ ପର୍ଯ୍ୟାୟରେ ପହଞ୍ଚତ୍ଛି। ତ୍ରୁଟିପୂର୍ଣ୍ଣ ଭାବେ ନିର୍ମାଣ କାର୍ଯ୍ୟ କରାଯାଇଥିବାରୁ ସହରରୁ ବାହାରକୁ ଯାଉଥିବା ଯାନବାହାନଗୁଡ଼ିକ ବିପରୀତ ରାସ୍ତାରେ ଯାଇ ଦୁର୍ଘଟଣାର ସମ୍ମୁଖିନ ହେଉଛନ୍ତି। ପ୍ରତିଦିନ ଏଭଳି ଘଟଣା ଘଟିବାରୁ ଟାଉନ ପୋଲିସ ପକ୍ଷରୁ ଉକ୍ତ ସଂଯୋଗକାରୀ ରାସ୍ତାକୁ ବନ୍ଦ କରିଦିଆଯାଇଛି। ଫଳରେ ବାଲେଶ୍ୱର ପଟୁ ଆସୁଥିବା ଯାନବାହାନଗୁଡ଼ିକ ବୁଲାଣି ରାସ୍ତାରେ ସହର ମଧ୍ୟକୁ ପ୍ରବେଶ କରୁଛନ୍ତି। ନିର୍ମାଣ ସମୟରେ ଲୋକଙ୍କ ସୁରକ୍ଷା ଓ ନିରାପତ୍ତାକୁ ଠିକ୍ ଭାବେ ବିଚାରକୁ ନିଆ ଯାଇ ନ ଥିବାରୁ ସହରବାସୀଙ୍କ ସମସ୍ୟା ଦ୍ୱିଗୁଣିତ ହୋଇପଡିଛି ବୋଲି ବାରିପଦା ପୌରାଧ୍ୟକ୍ଷ କୃଷ୍ଣାନନ୍ଦ ମହାନ୍ତି ପ୍ରକାଶ କରିଛନ୍ତି। ରାସ୍ତା ନିର୍ମାଣ କାର୍ଯ୍ୟର ଯୋଜନା ଏବଂ ଆକଳନ ଅନୁମୋଦନ ପୂର୍ବରୁ ସ୍ଥାନୀୟ ପୌରପରିଷଦ, ଜିଲା ପ୍ରଶାସନ କିମ୍ବା ସ୍ଥାନୀୟ ଜନସାଧାରଣଙ୍କ ସହିତ ବିଭାଗୀୟ କର୍ତ୍ତୃପକ୍ଷ ଆଲୋଚନା କରି ନ ଥିଲେ। ଯାହା ଫଳରେ ରାଜପଥ ନିର୍ମାଣ କାର୍ଯ୍ୟ ଶେଷ ହୋଇଥିବା ବେଳେ ସ୍ଥାନୀୟ ଜନସାଧାରଣଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ପାଲବଣିଠାରେ ଥିବା ପ୍ରବେଶ ପଥକୁ ବନ୍ଦ କରାଯିବା ଦ୍ୱାରା ଉକ୍ତ ରାସ୍ତାକୁ ସଂଯୋଗ କରୁଥିବା ଆୟକର ବିଭାଗ କାର୍ଯ୍ୟାଳୟ, ରେଳ ଷ୍ଟେଶନ, ସର୍କିଟ ହାଉସ, କେସି ସର୍କଲ, ପିଆର୍ଏମ୍ ମେଡିକାଲ କଲେଜ ଓ ହସ୍ପିଟାଲ, ଜଗନ୍ନାଥ ମନ୍ଦିର, ଜିଲାପାଳଙ୍କ କାର୍ଯ୍ୟାଳୟ ଓ କୋର୍ଟ ଆଦିକୁ ଯିବାଆସିବା ପାଇଁ ସ୍ଥାନୀୟ ଲୋକେ ହଇରାଣ ହରକତ ହେଉଛନ୍ତି। ସେହିପରି ଦାରୋଗାଡାହିରୁ ମୁର୍ଗାବାଡି ଗୋଲାଇ ମଧ୍ୟର କୌଣସି ଗଳାପୋଲ ନ ଥିବାରୁ ପଥଚାରୀମାନେ ନାନା ଅସୁବିଧା ଭୋଗୁଛନ୍ତି। ସୀମାବର୍ତ୍ତୀ ଅଞ୍ଚଳରୁ ଆସୁଥିବା ଲୋକେ ବହୁ ବାଟରୁ ବୁଲିକି ଆସୁଥିବା ବେଳେ ଅନ୍ୟ କେହି ଭୁଲ ବାଟ ଦେଇ ଆସୁଥିବାରୁ ଦୁର୍ଘଟଣାର ସମ୍ମୁଖିନ ହେଉଛନ୍ତି। ଲୋକଙ୍କ ସୁବିଧାକୁ ଦୃଷ୍ଟିରେ ରଖି ମୁର୍ଗାବାଡି ଓ ଦାରୋଗାଡାହି ଗୋଲେଇ ମଧ୍ୟରେ ଥିବା ଶ୍ମଶାନ ଘାଟ ନିକଟରେ ଏକ ଗଳାପୋଲ ନିର୍ମାଣ ପାଇଁ ଉପଯୁକ୍ତ ସ୍ଥାନ ହେବ ବୋଲି ଦାବିରେ ଉଲ୍ଲେଖ କରାଯାଇଛି। ସ୍ଥାନୀୟ ଲୋକଙ୍କ ଆବଶ୍ୟକତାକୁ ଦୃଷ୍ଟିରେ ରଖି ଦୁଇଟି ଗଳାପୋଲ ନିର୍ମାଣ ପାଇଁ ବିଜେଡି ପକ୍ଷରୁ ଦାବିପତ୍ର ପ୍ରଦାନ କରାଯାଇଛି। ଅନ୍ୟମାନଙ୍କ ମଧ୍ୟରେ ଜିଲା ପରିଷଦ ଅଧ୍ୟକ୍ଷା ଭାରତୀ ହଁାସଦା, ଏମ୍ସିସି ବ୍ୟାଙ୍କ ସଭାପତି ସୁବ୍ରମଣ୍ୟମ ମହାନ୍ତି, ପ୍ରାକ୍ତନ ମନ୍ତ୍ରୀ ସରୋଜିନୀ ହେମ୍ବ୍ରମ, ପ୍ରାକ୍ତନ ଉପବାଚସ୍ପତି ସାନନ୍ଦ ମାରାଣ୍ଡି, ପ୍ରାକ୍ତନ ବିଧାୟକ ଭାଦବ ହଁାସଦା, ଜିତେନ୍ଦ୍ର ମହାନ୍ତି, ପ୍ରଭାତ କୁମାର ନାୟକ, କାଉନସିଲର ଦେବାଶିଷ ପାତ୍ର, ସୁନୀଲ କୁମାର ନାୟକ, ଅରୁଣ କୁମାର ବରାଡଙ୍କ ସମେତ ସମସ୍ତ ୱାର୍ଡ କାଉନସିଲର ଓ ବିଜେଡି କର୍ମକର୍ତ୍ତାମାନେ ଉପସ୍ଥିତ ଥିଲେ ା
