କହୁଣି ଅଧିକ କଳା ଏବଂ ରୁକ୍ଷ ହେଲେ ହାତର ସୌନ୍ଦର୍ଯ୍ୟ କମି ଯାଇଥାଏ। ତେଣୁ କହୁଣିର କଳାପଣକୁ ଦୂର କରିବା ପାଇଁ ଜାଣିରଖନ୍ତୁ କିଛି ଘରୋଇ ଟିପ୍ସ…
କହୁଣିର କଳାଦାଗ ଦୂର କରିବା ପାଇଁ ଲେମ୍ବୁକୁ ଦୁଇଫାଳ କରି ଉଭୟପଟରେ ଘଷନ୍ତୁ। ଲେମ୍ବୁରୁ ରସ ସରିଯିବା ପରେ ପାଣିରେ ଧୋଇ ଦିଅନ୍ତୁ।
ଚାଉଳଗୁଣ୍ଡ, ଅଟା, ଦହିକୁ ମିଶାଇ ଏକ ସ୍କ୍ରବ୍ ତିଆରି କରନ୍ତୁ ଏବଂ କହୁଣିରେ ଘଷନ୍ତୁ। ଏହି ସ୍କ୍ରବ୍ କହୁଣିରେ ଥିବା ମୃତ କୋଷକୁ କାଢ଼ି ତ୍ୱଚାର ରଙ୍ଗ ଉଜ୍ଜ୍ୱଳ କରିବ। ସପ୍ତାହକୁ ଅତି କମ୍ରେ ଏହି ସ୍କ୍ରବ୍ ୨ ଥର ଲଗାନ୍ତୁ।
ହରଡ଼ କିମ୍ବା ମୁଗ ଡାଲିରେ ମଧ୍ୟ ପ୍ୟାକ୍ ତିଆରି କରିପାରିବେ। ଏଥିପାଇଁ ଡାଲିକୁ ରାତିରୁ ଭିଜାଇ ଦିଅନ୍ତୁ। ସକାଳୁ ଡାଲିକୁ ଛାଣି କ୍ଷୀର ସହିତ ମିଶାଇ ଗ୍ରାଇଣ୍ଡିଂ କରି ଦିଅନ୍ତୁ। ଏହି ପେଷ୍ଟକୁ କହୁଣିରେ ଘଷନ୍ତୁ। କିଛି ସମୟ ପରେ ପାଣିରେ ଧୋଇ ଦିଅନ୍ତୁ।
କହୁଣିରେ ମାଲିସ୍ କରିବା ନିମନ୍ତେ ଘରେ ସ୍ବତନ୍ତ୍ର ତେଲ ମଧ୍ୟ ତିଆରି କରିପାରିବେ। ଏଥିପାଇଁ ବାଦାମ ତେଲରେ ସୂର୍ଯ୍ୟମୁଖୀ ତେଲ ମିଶାନ୍ତୁ। ସେଥିରେ କିଛି ଗୋଲାପ କିମ୍ବା ଚନ୍ଦନ ତେଲ ମିଶାନ୍ତୁ। ଏହି ତେଲକୁ କହୁଣି ଉପରେ ଘଷନ୍ତୁ। କିଛି ଦିନ ପରେ ତ୍ୱଚା କୋମଳ ଏବଂ ସୁନ୍ଦର ଦିଶିବ।
ତ୍ୱଚାକୁ ସୁନ୍ଦର ରଖିବା ନିମନ୍ତେ ବଜାରରେ ବିଭିନ୍ନ ପ୍ରକାରର କ୍ରିମ୍ ଉପଲବ୍ଧ ହେଉଛି। ତେଣୁ ନିଜ ତ୍ୱଚାର ପ୍ରକାର ଅନୁସାରେ କ୍ରିମ୍ ଲଗାନ୍ତୁ।
ସବୁବେଳେ ଗ୍ଲିସେରିନ୍ ଥିବା ସାବୁନ୍ ବ୍ୟବହାର କରନ୍ତୁ। ଏହା ସହିତ ହଳଦୀ ଗୁଣ୍ଡରେ ଲେମ୍ବୁରସ ମିଶାଇ କହୁଣିରେ ମାଲିସ୍ କରନ୍ତୁ। ଧୀରେ ଧୀରେ ତ୍ୱଚା କୋମଳ ହେବା ସହିତ କଳାପଣ ମଧ୍ୟ କମ୍ ହୋଇଯିବ।
ସ୍ନାନ ପୂର୍ବରୁ ସବୁବେଳେ ତେଲ ଲଗାଇ ସ୍ନାନ କରନ୍ତୁ। ଏହା ସହିତ ଅଧିକ ଗରମ ଥିବା ପାଣିରେ ସ୍ନାନ କରନ୍ତୁ ନାହିଁ।
ସ୍ନାନ ପରେ ପରେ ତୁରନ୍ତ ବଡି ଲୋଶନ ଲଗାନ୍ତୁ। ଯଦି ତ୍ୱଚା ଅଧିକ ରୁକ୍ଷ ହୋଇଥାଏ, ତେବେ କ୍ରିମ୍ ଲଗାନ୍ତୁ।
