ବୈପାରିଗୁଡା,୨୧ା୧୧ (ଡି.ଏନ୍.ଏ.):ଶହୀଦ୍ ଲକ୍ଷ୍ମଣ ନାୟକ ଦେଶ ପାଇଁ ବଳି ଦେଇଥିଲେ। ମାତ୍ର ତାଙ୍କ ଜନ୍ମମାଟି କୋରାପୁଟ ଜିଲା ବୈପାରିଗୁଡା ବ୍ଲକର ତେନ୍ତୁଳିଗୁମ୍ମାରେ ହୋଇପାରିନି ଶିକ୍ଷାର ବିଶେଷ ବିକାଶ। ଏଠାରେ କଲ୍ୟାଣ ବିଭାଗ ଦ୍ବାରା ପରିଚାଳିତ ଆବାସିକ ବିଦ୍ୟାଳୟରେ ଶିକ୍ଷାବସ୍ଥା ବିପର୍ଯ୍ୟସ୍ତ ହୋଇପଡିଛି। ତେନ୍ତୁଳିଗୁମ୍ମାରେ ଶହୀଦ୍ ଲକ୍ଷ୍ମଣ ନାୟକଙ୍କ ନାମରେ ନାମିତ ସେବାଶ୍ରମ ବିଦ୍ୟାଳୟ ରହିଛି। ଏଠାରେ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପାଠ ପଢାଇବା ସହ ପିଲାଙ୍କ ରହିବା ଓ ଖାଇବା ବ୍ୟବସ୍ଥା କରାଯାଇଛି। ୨୧୨ ଜଣ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ତେବେ ବ୍ଲକ ସଦର ମହକୁମାଠାରୁ ପ୍ରାୟ ୭୩ କି.ମି. ଦୂରତାରେ ଥିବା ତେନ୍ତୁଳିଗୁମ୍ମା ବ୍ଲକର ସେବାଶ୍ରମ ବିଦ୍ୟାଳୟକୁ ଯିବାକୁ ହେଲେ ମାଲକାନାଗିରି ଜିଲା ସୀମା ଭିତରେ ପଶି ଯିବାକୁ ପଡେ। ଏହି କାରଣରୁ ଉକ୍ତ ବିଦ୍ୟାଳୟରେ ନିୟୋଜିତ ଶିକ୍ଷକମାନେ ରହିବାକୁ ଇଚ୍ଛା କରନ୍ତି ନାହିଁ। ଏଠାରେ ଯୋଗ ଦେବାର ଅଳ୍ପ ଦିନ ମଧ୍ୟରେ ଯେମିତି ହେଉ ବଦଳି ହୋଇ ଅନ୍ୟତ୍ର ଚାଲିଯାଆନ୍ତି। ପ୍ରାୟ ଅନେକ ସମୟରେ ବିଦ୍ୟାଳୟରେ ଶିକ୍ଷକ ପଦବୀ ଖାଲି ପଡେ। ୨୦ ବର୍ଷ ତଳେ ଏଠାରେ ପ୍ରତିଷ୍ଠା ହୋଇଥିବା ଏକ ଘରୋଇ ବିଦ୍ୟୁତ୍ ଉପତ୍ାଦନ ପ୍ରକଳ୍ପ ମାଲିକଙ୍କ ନିକଟରେ ବିଦ୍ୟାଳୟରେ ଶିକ୍ଷକ ନିଯୁକ୍ତି ଲାଗି ଗ୍ରାମବାସୀ ପ୍ରସ୍ତାବ ଦେବାରୁ ସମ୍ପୃକ୍ତ ମାଲିକ ରାଜି ହୋଇ ସେବେଠାରୁ ବିଦ୍ୟାଳୟ କମିଟି ସୁପାରିଶରେ ସମ୍ପୃକ୍ତ କମ୍ପାନୀ ମାଲିକ ଶିକ୍ଷକ ନିୟୋଜିତ କରୁଛନ୍ତି। ସ୍ବଳ୍ପ ବେତନରେ ନିୟୋଜିତ ଏହି ଶିକ୍ଷକମାନେ ଅଣତାଲିପ୍ରାପ୍ତ ଏବଂ ଓଟିଇଟିରେ ପାସ କରି ନ ଥାନ୍ତି। ନିଯୁକ୍ତ ଶିକ୍ଷକମାନେ ସେମାନଙ୍କ ଇଛାରେ କାମ କରନ୍ତି। ଅନ୍ୟ କେଉଁଠି ଚାକିରି ମିଳିଲେ ବିଦ୍ୟାଳୟ ଛାଡି ଚାଲିଯାନ୍ତି। ବର୍ତ୍ତମାନ ବିଦ୍ୟାଳୟରେ ପ୍ରଧାନ ସେବକ ପଦବୀ ଖାଲି ପଡିଛି। ୩ ଜଣ ଶିକ୍ଷକଙ୍କ ମଧ୍ୟରୁ ଜଣଙ୍କୁ ଡେପୁଟେସନ୍ରେ ଅନ୍ୟତ୍ର ଯିବାକୁ ନିଦ୍ଦେର୍ର୍ଶ ଆସିଛି। ସେ ଚାଲିଗଲେ ଆଉ ରହିବେ ମାତ୍ର ୨ ଜଣ ଶିକ୍ଷକ ା ସେମାନଙ୍କ ମଧ୍ୟରୁ ଭାରପ୍ରାପ୍ତ ପ୍ରଧାନ ସେବକ ଅଧିକାଂଶ ସମୟରେ ବୈପାରିଗୁଡା ଅଥବା କୋରାପୁଟକୁ କୌଣସି ଅଫିସ୍ କାର୍ଯ୍ୟରେ ଗଲେ ଜଣେ ଶିକ୍ଷକରେ ପିଲାଙ୍କୁ ପାଠ ପଢାଇବା କଷ୍ଟକର ହୋଇପଡୁଛି। ଏ ସଂକ୍ରାନ୍ତରେ ଭାରପ୍ରାପ୍ତ ପ୍ରଧାନ ଶିକ୍ଷକ ସୂର୍ଯ୍ୟ ନାରାୟଣ ସାବତଙ୍କୁ ପଚାରିବାରୁ ଶିକ୍ଷକ ଅଭାବ ଯୋଗୁ ପାଠ ପଢାଇବାରେ ସମସ୍ୟା ହେଉଥିବା କହିଥିଲେ।
