ଭୁବନେଶ୍ୱର,୨୫ା୯(ସତ୍ୟଜିତ୍ ରାଉତ):ରାଜଧାନୀରେ ଖାଲଖମାପୂର୍ଣ୍ଣ ରାସ୍ତା ପାଇଁ ଦୁର୍ଘଟଣାରେ ଜଣେ ଯୁବ ଡାକ୍ତରଙ୍କ ଜୀବନ ଯାଇଛି। ଶନିବାର ରାତିରେ କଟକ ରୋଡ୍ର ଲକ୍ଷ୍ମୀସାଗର ଥାନା ଅନ୍ତର୍ଗତ ବମିଖାଲ ଓଭରବ୍ରିଜ୍ ତଳ ରାସ୍ତାରେ ଏହି ଭୟଙ୍କର ଦୁର୍ଘଟଣା ଘଟିଛି। ମୃତ ଡାକ୍ତର ହେଲେ ଗଞ୍ଜାମ ଜିଲା ବ୍ରହ୍ମପୁର ସଦର ଥାନା ଅନ୍ତର୍ଗତ ଆମ୍ବଗଡ଼ା ଗ୍ରାମର ଅମିତ ବିଶୋଇ (୨୬)। ସେ ଭୁବନେଶ୍ୱର ଭରତପୁର ଥାନା ଅନ୍ତର୍ଗତ ପାତ୍ରପଡ଼ାସ୍ଥିତ ନିର୍ମାଲ୍ୟ ଏନ୍କ୍ଲେଭ୍ ଆପାର୍ଟମେଣ୍ଟରେ ରହିବା ସହ ଗଜପତିନଗରସ୍ଥିତ ଏକ ଘରୋଇ ହସ୍ପିଟାଲରେ ଜରୁରିକାଳୀନ ବିଭାଗର ମେଡିସିନ ସ୍ପେଶାଲିଷ୍ଟ ଭାବେ କାର୍ଯ୍ୟ କରନ୍ତି। ରାତି ପ୍ରାୟ ୧୨ଟା ୧୦ରେ ଅମିତ ରସୁଲଗଡ଼ ପଟୁ କଳ୍ପନା ଆଡକୁ ଯାଉଥିବାବେଳେ ରାସ୍ତାରେ ଥିବା ଏକାଧିକ ଖାଲରେ ତାଙ୍କ କାର୍ (ଓଡି୦୨ଏଟି୨୦୬୧) ଭାରସାମ୍ୟ ହରାଇ ବମିଖାଲ ଓଭରବ୍ରିଜ୍ରେ ପିଟି ହୋଇଯାଇଥିଲା। ଫଳରେ କାର୍ର ଉପର ଭାଗ ସମ୍ପୂର୍ଣ୍ଣ ନଷ୍ଟ ହୋଇଯିବା ସହ ଡାହାଣ ପାର୍ଶ୍ୱ ଗୁରୁତର କ୍ଷତିଗ୍ରସ୍ତ ହୋଇଥିଲା। ଦୁର୍ଘଟଣାର ପ୍ରଚଣ୍ଡ ଶବ୍ଦ ଶୁଣି ସ୍ଥାନୀୟ ଲୋକେ ପହଞ୍ଚତ୍ ଅମିତଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ପୋଲିସ ସହାୟତାରେ ଏକ ଘରୋଇ ହସ୍ପିଟାଲକୁ ନେଇଥିଲେ। ହେଲେ ସେଠାରେ କିଛି ସମୟ ପରେ ତାଙ୍କର ମୃତ୍ୟୁ ହୋଇଯାଇଥିଲା। ପ୍ରଶାସନିକ ଅବହେଳା ପାଇଁ ଡାକ୍ତର ଅମିତଙ୍କ ଏଭଳି ଅକାଳ ବିୟୋଗ ଘଟିଲା ବୋଲି ପରିବାର ଲୋକେ କହିଛନ୍ତି। ଆଉ ମାତ୍ର ୫ ମାସ ପରେ ଅର୍ଥାତ୍ ଆସନ୍ତା ଫେବୃୟାରୀ ୨୮ରେ ଡାକ୍ତର ଅମିତଙ୍କର ବିବାହ ସ୍ଥିର ହୋଇଥିଲା। ଏଥିପାଇଁ ଡିସେମ୍ବର ୧୦ରେ ନିର୍ବନ୍ଧ ହେବାର ଥିଲା। ଜୀବନର ନୂଆ ଅଧ୍ୟାୟ ଆରମ୍ଭ କରିବା ପୂର୍ବରୁ ଅମିତଙ୍କ ଏଭଳି ମୃତ୍ୟୁକୁ ପରିବାର ଲୋକ ସହଜରେ ଗ୍ରହଣ କରିପାରିନାହାନ୍ତି।
ରବିବାର କ୍ୟାପିଟାଲ ହସ୍ପିଟାଲରେ ବ୍ୟବଚ୍ଛେଦ ପରେ ଅମିତଙ୍କ ମୃତଦେହକୁ ପୋଲିସ ପକ୍ଷରୁ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ବାପା ମଙ୍ଗଳୁ ଚରଣଙ୍କ ଏତଲାକ୍ରମେ ଲକ୍ଷ୍ମୀସାଗର ଥାନା ପୋଲିସ ଆଇପିସି ଦଫା ୨୭୯, ୩୦୪(କ)ରେ ଏକ ମାମଲା (ନଂ.୩୭୫/୨୦୨୩) ରୁଜୁ କରି ତଦନ୍ତ ଜାରି ରଖିଛି। ଅନ୍ୟପଟେ କାଳରାତିରେ ଘଟିଥିବା ଦୁର୍ଘଟଣାର ଛାତିଥରା ଦୃଶ୍ୟ ନିକଟରେ ଲାଗିଥିବା ସିସିଟିଭି ଫୁଟେଜରେ କଏଦ ହୋଇଛି। କାର୍ଟି ଖାଲରେ ପଡି ଉପରକୁ ଉଠିଯିବା ସହ ରାସ୍ତାର ଡାହାଣ ପାର୍ଶ୍ୱରେ ଥିବା ଓଭରବ୍ରିଜ ବିମ୍ରେ ଶକ୍ତ ଧକ୍କା ହେବା ପରେ ବାମକୁ ବୁଲି ରାସ୍ତା ପାର୍ଶ୍ୱରେ ଅଟକିଯାଇଛି। ଏହି ଦୁର୍ଘଟଣା କେତେ ଭୟଙ୍କର ଥିଲା ତାହା ଉକ୍ତ ସିସିଟିଭି ଦୃଶ୍ୟରୁ ସ୍ପଷ୍ଟ ଜଣାପଡ଼ୁଛି।
କଟକ ରୋଡର ସ୍ଥିତି ଭୟଙ୍କର ହୋଇଛି। ବିଭିନ୍ନ ସ୍ଥାନରେ ରାସ୍ତା ଖରାପ ଥିବାରୁ ଲୋକମାନେ ଅସୁବିଧାରେ ପଡ଼ୁଛନ୍ତି। ଏପରିକି ଛୋଟମୋଟ ଦୁର୍ଘଟଣାର ମଧ୍ୟ ସାମ୍ନା କରୁଛନ୍ତି। ଦୁର୍ଘଟଣାସ୍ଥଳର ୨୦ ମିଟର ଓ ଅପରପାର୍ଶ୍ୱରେ ଶହେ ମିଟରରୁ ଅଧିକ ରାସ୍ତାରେ ବଡ଼ ବଡ଼ ଖାଲ ରହିବା ସହ ସେଥିରେ ପାଣିଜମି ରହିଥିବାରୁ ରାତିରେ ଦୂରରୁ ଜଣାପଡୁ ନାହିଁ। ମାସ ମାସ ଧରି ରାସ୍ତାରେ ଏଭଳି ଖାଲଖମା ମୃତ୍ୟୁର ଆଁ ମେଲି ରହିଛି। ଉକ୍ତ ରାସ୍ତା ଦେଇ ପ୍ରତିଦିନ ଶତାଧିକ ଗାଡ଼ି ଯାତାୟାତ କରୁଥିଲେ ମଧ୍ୟ ପ୍ରଶାସନ ଏଥିପ୍ରତି ଦୃଷ୍ଟି ନ ଦେବାରୁ ଜଣେ ଯୁବ ଡାକ୍ତରଙ୍କ ଜୀବନ ଯାଇଛି। ଅମିତଙ୍କ ମୃତ୍ୟୁ ପାଇଁ ସମ୍ପର୍କୀୟ ପ୍ରଶାନ୍ତ ସାହୁ ଓ ପରିବାର ଲୋକେ ପ୍ରଶାସନକୁ ଦାୟୀ କରିଛନ୍ତି। ସ୍ମାର୍ଟସିଟିର ଏଭଳି ଅସଜଡ଼ା ରାସ୍ତାକୁ ତୁରନ୍ତ ସଜାଡ଼ିବାକୁ ସ୍ଥାନୀୟ ଲୋକମାନେ ଦାବି କରିଛନ୍ତି।
