କଟକ ଅଫିସ/କେନ୍ଦୁଝର,୧୯ା୪(ସ୍ବ.ପ୍ର.):ବିଭିନ୍ନ ଜନଜାତିଙ୍କ ବ୍ୟକ୍ତିଗତ ତଥା ସାମୂହିକ କେସ୍ର ୮ଟି ମାମଲାରେ ଜାତୀୟ ଅନୁସୂଚିତ ଜନଜାତି (ଏସ୍ଟି) କମିଶନଙ୍କ ନିକଟରେ କେନ୍ଦୁଝର ଜିଲାପାଳ ଆଶିଷ ଠାକ୍ରେ ହାଜର ହେବେ ନାହିଁ। ଏନେଇ ସୋମବାର ଓଡ଼ିଶା ହାଇକୋର୍ଟ କମିଶନଙ୍କ ଓ୍ବାରେଣ୍ଟ ଉପରେ ଅନ୍ତରୀଣ ରହିତାଦେଶ ଜାରି କରିଛନ୍ତି। ଜିଲାପାଳଙ୍କ ପ୍ରତିନିଧିଙ୍କ ଉପସ୍ଥିତିରେ କମିଶନ ମାମଲା ଆଗକୁ ନେଇପାରିବେ ବୋଲି ହାଇକୋର୍ଟ କହିଛନ୍ତି। ଏଥିସହ ୬ସପ୍ତାହ ପରେ ମାମଲାର ପରବର୍ତ୍ତୀ ଶୁଣାଣି ହେବ ବୋଲି ସ୍ପଷ୍ଟ କରିଛନ୍ତି। କମିଶନଙ୍କ ଓ୍ବାରେଣ୍ଟ ନୋଟିସକୁ ଚ୍ୟାଲେଞ୍ଜ କରି ଜିଲାପାଳ ଠାକ୍ରେ ହାଇକୋର୍ଟରେ ରିଟ୍ ପିଟିଶନ ଦାଖଲ କରିଥିଲେ। କେସ୍ ନଂ. ଡବ୍ଲ୍ୟୁପିସି ୦୦୦୯୬୦୯/୨୦୨୨ର ଶୁଣାଣି କରି ହାଇକୋର୍ଟ ପରବର୍ତ୍ତୀ ତାରିଖ ପର୍ଯ୍ୟନ୍ତ ନୋଟିସ୍ ଉପରେ ରହିତାଦେଶ ଜାରି କରିଛନ୍ତି। ହାଇକୋର୍ଟଙ୍କ ନିର୍ଦ୍ଦେଶ ପରେ ଜିଲାପାଳ ଠାକ୍ରେ ଆଶ୍ୱସ୍ତ ହୋଇଥିବାବେଳେ କମିଶନଙ୍କ କ୍ଷମତା ଓ ଜିଲାପାଳଙ୍କ ହାଜରକୁ ନେଇ କ’ଣ ଆଇନଗତ ବ୍ୟବସ୍ଥା ରହିଛି ସେ ସଂକ୍ରାନ୍ତରେ ତର୍ଜମା ଆରମ୍ଭ ହୋଇଛି ା
ପ୍ରକାଶ ଯେ, କେତେକ ମାମଲା ନେଇ କେନ୍ଦୁଝର ଆଦିବାସୀ ସଙ୍ଗଠନ ପକ୍ଷରୁ ଜାତୀୟ ଅନୁସୂଚିତ ଜନଜାତି ଆୟୋଗରେ ମାମଲା ଦାୟର କରାଯାଇଥିଲା। ଏହିସବୁ ମାମଲାରେ କମିଶନ ମାର୍ଚ୍ଚ ୨୧ରେ ଚିଠି କରି ଏପ୍ରିଲ ୪ ତାରିଖ ଅପରାହ୍ନ ୪ଟାରେ ହାଜର ହେବା ପାଇଁ ଜିଲାପାଳଙ୍କୁ କହିଥିଲେ। ବାରମ୍ବାର ସମନ ସତ୍ତ୍ୱେ ଜିଲାପାଳ ଠାକ୍ରେ କମିଶନଙ୍କ ନିକଟରେ ହାଜର ହୋଇ ନ ଥିଲେ। ଫଳରେ ଜାତୀୟ ଜନଜାତି କମିଶନ ଭାରତୀୟ ସମ୍ବିଧାନର ସିଭିଲ କୋଡ୍ ୩୩୮/(ଏ)ର ଧାରା ୮ ଅନୁଯାୟୀ ନୋଟିସ କରିଥିଲେ। ଏପ୍ରିଲ ୧୩ ତାରିଖ ପୂର୍ବାହ୍ନ ୧୧ଟା ସୁଦ୍ଧା ହାଜର କରାଇବାକୁ ପୋଲିସ ଡିଜିଙ୍କୁ କମିଶନ ନିର୍ଦ୍ଦେଶ ଦେଇଥିଲେ। ମାତ୍ର ଜିଲାରେ ଆଇନଶୃଙ୍ଖଳା ଦୃଷ୍ଟିରୁ ଜିଲାପାଳ ହାଜର ହୋଇପାରିବେ ନାହିଁ ଡିଜିପି ଜଣାଇଥିଲେ। ଫଳରେ ୧୯ ତାରିଖ ମଧ୍ୟାହ୍ନ ୧୨ଟା ସୁଦ୍ଧା ତାଙ୍କୁ ହାଜର କରିବାକୁ ପୋଲିସ ଡିଜିଙ୍କୁ କମିଶନ ଓ୍ବାରେଣ୍ଟ ନୋଟିସ୍ କରିଥିଲେ। ଡିଜିପିଙ୍କ ନିର୍ଦ୍ଦେଶ କ୍ରମେ କଟକ ଆଇଜି ଏ.ଏନ୍. ସିହ୍ନା ଉକ୍ତ ନୋଟିସ୍ କାର୍ଯ୍ୟକାରୀ କରିବାକୁ କେନ୍ଦୁଝର ଏସ୍ପିଙ୍କୁ ୧୬ତାରିଖରେ ଚିଠି କରିଥିଲେ। ତେବେ ଏହାକୁ ନେଇ ଜିଲାପାଳ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଜିଲାପାଳଙ୍କ ପକ୍ଷରୁ ଆଡଭୋକେଟ ଜେନେରାଲ ଅଶୋକ ପରିଜା ମାମଲା ଲଢ଼ୁଥିଲେ। ସୂଚନାଯୋଗ୍ୟ, କମିଶନଙ୍କ ଏଭଳି ଓ୍ବାରେଣ୍ଟ ନୋଟିସ ସବୁଠି ଚର୍ଚ୍ଚାର ବିଷୟ ପାଲଟିଥିଲା।
