ଜୁନାଗଡ, ୨୪।୧୨ (ଡି.ଏନ.ଏ.): କଳାହାଣ୍ଡି ଜିଲା ଜୁନାଗଡ ସହର ନିକଟ ହାତୀବ୍ରିଜ୍ ୨୬ ନଂ. ଜାତୀୟ ରାଜପଥ-ଆଟିଗାଁକୁ ସଂଯୋଗ କରୁଥିବା ପିଡବ୍ଲ୍ୟୁଡି ରାସ୍ତା ଏବେ ମରଣଯନ୍ତ୍ରା ପାଲଟିଛି। ବିଭାଗ ପକ୍ଷରୁ ମରାମତି କରାଯାଉ ନ ଥିବାରୁ ଏପରି ହୋଇଛି। ଯାହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି।
ସୂଚନାରୁ ପ୍ରକାଶ ଯେ, ଏହି ରାସ୍ତା ହାତୀବ୍ରିଜ୍ ୨୬ ନଂ. ଜାତୀୟ ରାଜପଥ କଡରୁ ଚିଚୈଗୁଡା, ନୂଆଗୁଡା, ଯମୁନାବାହାଲ(କ), ଯମୁନାବାହାଲ, ଭେଜିପଦର, ବାଗଡୁଙ୍ଗରୀ, ମିଚାଗାଁ ଓ ଆଟିଗାଁକୁ ସଂଯୋଗ କରୁଛି। ଗତ କିଛିମାସ ତଳେ ରାସ୍ତାର ଚିଚୈଗୁଡା ଖଳିଆସର (ନାଳ)ରେ ହାତୀନଦୀ ବଢିପାଣି ପ୍ରବାହିତ ହୋଇଥିଲା। ଫଳରେ ସେଠାରେ କଂକ୍ରିଟ ରାସ୍ତା ଧୋଇ ବଡବଡ ଖାଲ ସୃଷ୍ଟି ହୋଇଥିଲା। ବର୍ତ୍ତମାନ ସୁଦ୍ଧା ମଧ୍ୟ ବିଭାଗ ପକ୍ଷରୁ ଉକ୍ତ ଖାଲଗୁଡିକ ମରାମତି କରାଯାଇନାହିଁ। ଫଳରେ ଉକ୍ତ ଖାଲ ରାସ୍ତାରେ ଯାତାୟାତ ବେଳେ ସ୍ଥାନୀୟ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ବେଳେ ବେଳେ ରାସ୍ତାର ଖାଲରେ ପଡି ଦୁର୍ଘଟଣାର ସମ୍ମୁଖୀନ ହେଉଛନ୍ତି। ବିଶେଷ କରି ଏହି ରାସ୍ତାରେ ରାତିବେଳା ଯାତାୟାତ କରୁଥିବା ଲୋକେ ନିଜକୁ ସୁରକ୍ଷିତ ମଣୁନାହାନ୍ତି। ଫଳରେ ଏହି ରାସ୍ତାରେ ସେମାନେ ନ ଆସି ବୁଲାଣିଆ ରାସ୍ତା ଦେଇ ଗଁାକୁ ଆସିଥାନ୍ତି। ବର୍ତ୍ତମାନ ଧାନ ମଣ୍ଡି ଚାଲୁଥିବାରୁ ଏହି ରାସ୍ତାରେ ଧାନ ବୋଝେଇ ଗାଡ଼ି ଯାତାୟାତ କରିଥାଏ। ରାସ୍ତାର ଦୁରବସ୍ଥା ଯୋଗୁ କିଛିଦିନ ତଳେ ଧାନ ବୋଝେଇ ଟ୍ରକ ଯାଇ ନ ପାରି ଗୋଟିଏ ଦିନ ଫସିରହିଥିଲା। ଲୋକଙ୍କ ଧନ, ଜୀବନ ନଷ୍ଟ ହେବା ଆଗରୁ ବିଭାଗ ଏଥିପ୍ରତି ଦୃଷ୍ଟିଦେଇ ଖାଲ ସ୍ଥାନଗୁଡିକୁ ମରାମତି କରିବାକୁ ସାଧାରଣରେ ଦାବି ହୋଇଛି। ଏ ନେଇ ବିଭାଗୀୟ ସହକାରୀ ଯନ୍ତ୍ରୀ ସୁନାରାମ ମୁର୍ମୁଙ୍କୁ ପଚାରିବାରୁ ଶୀଘ୍ର ମରାମତି କରାଯିବ ବୋଲି କହିଥିଲେ।
