ନଏଡ଼ା: ଆଧୁନିକ ଚିକିତ୍ସା ପ୍ରଣାଳୀରେ ଏବେ କଟା ହାତକୁ ବି ମଣିଷ ଦେହରେ ଯୋଡ଼ିବା ସମ୍ଭବ ହୋଇପାରୁଛି। ଏମିତି ଏକ ଦୁର୍ଲଭ ଅପରେଶନ କରି ଏବେ ଭଗବାନ ପାଲଟି ଯାଇଛନ୍ତି ନଏଡ଼ାର ଜେପି ହସ୍ପିଟାଲର ଡାକ୍ତରମାନେ। ଜେପି ହସପିଟାଲର ଡାକ୍ତରମାନେ ଜଣେ ବ୍ୟକ୍ତିଙ୍କର ହାତ କଟି ତଳେ ପଡ଼ିଯାଇଥିଲେ ବି ଏହାକୁ ଅପରେଶନ କରି ଯୋଡ଼ି ପାରିଛନ୍ତି। ୭ ଘଣ୍ଟାର ପରିଶ୍ରମ ପରେ ଡାକ୍ତରମାନେ ଅପରେଶନରେ ସଫଳତା ହାସଲ କରିଥିଲେ। ଡାକ୍ତରମାନଙ୍କର ଏହି ସଫଳତା ପରେ ଏବେ ଚିକିତ୍ସା ବିଜ୍ଞାନ ଉପରେ ଲୋକଙ୍କର ଆସ୍ଥା ବଢ଼ିବାରେ ଲାଗିଛି।
ଏବେ ଗ୍ରେଟର ନଏଡ଼ାର କାସନା ଥାନା ଅଧୀନରେ ଥିବା ନିୟାନା ଗାଁରେ ଦୁଇ ଗୋଷ୍ଠୀଙ୍କ ମଧ୍ୟରେ ଏକ ଗଣ୍ଡଗୋଳ ହୋଇଥିଲା। ଏଥିରେ ଗାଁର ଦେବେନ୍ଦ୍ର ନାମକ ଜଣେ ବ୍ୟକ୍ତିଙ୍କର ହାତ କଟି ତଳେ ପଡ଼ି ଯାଇଥିଲା। ତାଙ୍କ ଜେଜେଙ୍କୁ ଗୁଳି କରି ହତ୍ୟା କରି ଦିଆଯାଇଥିଲା। ତେବେ ଘଟଣା ପରେ ଦେବେନ୍ଦ୍ରଙ୍କ କଟାହାତକୁ ଏକ ବାକ୍ସରେ ଭର୍ତ୍ତି କରି ତାଙ୍କର ସମ୍ପର୍କୀୟମାନେ ସଙ୍ଗେ ସଙ୍ଗେ ଜେପି ହସ୍ପିଟାଲକୁ ନେଇ ଯାଇଥିଲେ। ଡାକ୍ତରମାନେ ଦେବେନ୍ଦ୍ରଙ୍କର ଏପରି ଅବସ୍ଥା ଦେଖି ପ୍ଲାଷ୍ଟିକ୍ ସର୍ଜନମାନଙ୍କର ଏକ ୫ଜଣିଆ ଟିମ୍ ଗଠନ ହୋଇଥିଲା। ଏହାପରେ ଅପରେଶନ ଆରମ୍ଭ ହୋଇଥିଲା। ତେବେ ଆଶ୍ଚର୍ଯ୍ୟର କଥା ହେଉଛି ୫ଜଣିଆ ଡାକ୍ତରୀ ଟିମ୍ ୭ ଘଣ୍ଟା ପରିଶ୍ରମ କରିବା ପରେ କଟା ହାତକୁ ଯୋଡ଼ିବାରେ ସକ୍ଷମ ହୋଇ ପାରିଥିଲେ। ଫଳରେ ଦେବେନ୍ଦ୍ର ଏବେ ନୂଆ ଜୀବନ ପାଇଛନ୍ତି।
