ହରାରେ,୯।୭: ଜିମ୍ବାୱେ ବନାମ ବାଂଲାଦେଶ ମଧ୍ୟରେ ଖେଳାଯାଉଥିବା ଏକମାତ୍ର ଟେଷ୍ଟ କ୍ରିକେଟ ମ୍ୟାଚରେ ବାଂଲାଦେଶ ସ୍ଥିତି ଦୃଢ ରହିଛି। ମ୍ୟାଚ୍ର ଦ୍ୱିତୀୟ ଦିନରେ ବାଂଲାଦେଶର ତାରକା ଅଲରାଉଣ୍ଡର ମହମୁଦୁଲ୍ଲା ତାଙ୍କ ଟେଷ୍ଟ କ୍ୟାରିୟରର ସର୍ବୋତ୍ତମ ଇନିଂସ ଖେଳି ଅପରାଜିତ ୧୫୦ ସ୍କୋର କରିଥିଲେ। ସେ ନବମ ଉଇକେଟ ପାଇଁ ଟାସ୍କିନ ଅହମ୍ମଦଙ୍କ ସହ ୧୯୧ ରନର ଭାଗିଦାରୀ କରିଥିଲେ। ଏହି କାରଣରୁ ବାଂଲାଦେଶ ପ୍ରଥମ ଇନିଂସରେ ୪୬୮ ରନ ସ୍କୋର କରିବାରେ ସଫଳ ହୋଇଥିଲା। ଦ୍ୱିତୀୟ ଦିନର ଖେଳ ଶେଷ ହେବା ପରେ ଜିମ୍ବାୱେ ଦଳ ଗୋଟିଏ ଉଇକେଟ ହରାଇ ୧୧୪ ରନ ସଂଗ୍ରହ କରିଛି। ପ୍ରଥମ ଇନିଂସ ଆଧାରରେ ଜିମ୍ବାଓ୍ବେ ୩୫୪ ରନ ପଛରେ ଅଛି।
ଟେଷ୍ଟ କ୍ରିକେଟରେ ୯ମ ଉଇକେଟ ପାଇଁ ସର୍ବାଧିକ ଭାଗିଦାରୀ ପାଇଁ ରେକର୍ଡ ସୃଷ୍ଟି କରିବାକୁ ମହମୁଦୁଲ୍ଲା ଏବଂ ଅହମ୍ମଦ ମାତ୍ର ୫ ରନ୍ରୁ ବଞ୍ଚିତ ହୋଇଥିଲେ। ଏହି ରେକର୍ଡ ଦକ୍ଷିଣ ଆଫ୍ରିକୀୟ ଉଇକେଟ୍କିପର ମାର୍କ ବାଉଚର୍ ଏବଂ ପ୍ୟାଟ ସିମକ୍ସଙ୍କ ନାଁରେ ରହିଛି। ୧୯୯୮ରେ ପାକିସ୍ତାନ ବିପକ୍ଷରେ ୯ମ ଉଇକେଟ ପାଇଁ ଦୁହେଁ ୧୯୫ ରନ ଯୋଡିଥିଲେ। ତେବେ ମହମୁଦୁଲ୍ଲା ନିଜର ରେକର୍ଡ ଭାଙ୍ଗିଛନ୍ତି। ଏହାପୂର୍ବରୁ ୨୦୧୨ମସିହାରେ, ୱେଷ୍ଟଇଣ୍ଡିଜ ବିପକ୍ଷ ଖୁଲନା ଟେଷ୍ଟରେ ୯ମ ଉଇକେଟ ପାଇଁ ଅବୁଲ ହାସନଙ୍କ ସହ ମିଶି ମହମୁଦୁଲ୍ଲା ୧୮୪ ରନ ଭାଗିଦାରୀ କରିଥିଲେ।
