ରଘୁନାଥପୁର,୧୩।୨(ରାଜେନ୍ଦ୍ର ନାରାୟଣ ସିଂହ):ରାଜ୍ୟ ସରକାରଙ୍କ ପକ୍ଷରୁ ଗ୍ରାମାଞ୍ଚଳ ଜନତାଙ୍କ ଯାତାୟାତ ସୁବିଧା ପାଇଁ ରାସ୍ତାଘାଟର ନବୀକରଣ କାର୍ଯ୍ୟ କରାଯାଉଛି। ମାତ୍ର ଅନେକ ସ୍ଥାନରେ ଟେଣ୍ଡର ପ୍ରାପ୍ତ ଠିକାଦାରଙ୍କ ମନମୁଖି କାର୍ଯ୍ୟ ଯୋଗୁ ଲୋକେ ଯାତାୟାତ ପାଇଁ ଅସୁବିଧାର ସମ୍ମୁଖୀନ ହେଉଛନ୍ତି। ରଘୁନାଥପୁର ବ୍ଲକ ପୂରଣ ଓଡ଼ାପଡ଼ା ପଞ୍ଚାୟତ ଦକ୍ଷିଣେଶ୍ୱରୀ ମନ୍ଦିର ଗଡାଠାରୁ ତଅଁରା ପଞ୍ଚାୟତ ଶାଳୀଜଙ୍ଗା ପର୍ଯ୍ୟନ୍ତ ରାସ୍ତା ଏହାର ଉଦାହରଣ ପାଲଟିଛି। ରାଜ୍ୟ ସରକାରଙ୍କ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ପାଖାପାଖି ୬ କି.ମି. ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନା ରାସ୍ତା କାର୍ଯ୍ୟ ପାଇଁ ୩ କୋଟି ୧୫ ଲକ୍ଷ ଟଙ୍କା ବ୍ୟୟବରାଦ କରାଯାଇଛି। ଏହା ମଧ୍ୟରେ ୧ କିମିରୁ ଊର୍ଦ୍ଧ୍ୱ କଂକ୍ରିଟ ରାସ୍ତା ଓ ୨ଟି ପୋଲ ନିର୍ମାଣ ପାଇଁ ରହିଛି। ଉକ୍ତ କାର୍ଯ୍ୟକୁ ଠିକାଦାର ରାଜେଶ ସାହାଣୀ ଟେଣ୍ଡର ପ୍ରାପ୍ତ ହୋଇ କାର୍ଯ୍ୟ ଆରମ୍ଭ କରିଛନ୍ତି। ଚିକିଣିଆ କେନାଲ ବନ୍ଧ ରାସ୍ତାକୁ ଖୋଳି ସେଥିରେ ଡଷ୍ଟ ପକାଯାଇ ଛାଡ଼ିଦିଆ ଯାଇଥିବାରୁ ବିଭିନ୍ନ ସ୍ଥାନରେ ଖାଲଖମା ହୋଇ ଯାତାୟାତ ଅନୁପଯୋଗୀ ହୋଇପଡ଼ିଛି। ଏହାଛଡା ରାସ୍ତାରୁ ଧୂଳି ଉଡି ଲୋକଙ୍କ ଆଖିନାକରେ ପଶି ଯାତାୟାତରେ ସମସ୍ୟା ସୃଷ୍ଟି ହେଉଛି। ଅନେକ ସ୍ଥାନରେ ଗାର୍ଡୱାଲ ପାଇଁ ଖାଲ କରାଯାଇ ମନ୍ଥର ଗତିରେ କାର୍ଯ୍ୟ ଚାଲିଛି। ସେହିପରି ଦକ୍ଷିଣେଶ୍ୱରୀ ଗଡାରେ ମେଣ୍ଟାଲ ସବୁ ଉଠି ରାସ୍ତାରେ ଗଡ଼ୁଥିବାରୁ ଲୋକେ ଦୁର୍ଘଟଣାରେ ସମ୍ମୁଖୀନ ହେଉଛନ୍ତି। ଏଥିପାଇଁ ୱାର୍ଡସଭ୍ୟ ଶେଷଦେବ ବାରିକ, ନିରଞ୍ଜନ ବେହେରା, ମିଲନ ମୁଦୁଲି, ମୀର୍ଜା ଆଜାଦ ବେଗ, ସୁମିତ ମୁଦୁଲି, କୁମର ଭୋଇ ପ୍ରଶାସନିକ ଦାୟିତ୍ୱହୀନତା ଓ ଠିକାଦାରଙ୍କ ଖାମଖିଆଲ ମନବୃତ୍ତିକୁ ଦାୟୀ କରିଛନ୍ତି। ଯଦି ଏହିପରି ଭାବେ କାର୍ଯ୍ୟ ଚାଲେ ତାହାଲେ ନିର୍ଦ୍ଦିଷ୍ଟ ସମୟରେ କାର୍ଯ୍ୟ ସରିବା ନେଇ ଆଶଙ୍କା ପ୍ରକାଶ ପାଇଛି। ଏ ସମ୍ପର୍କରେ ଯନ୍ତ୍ରୀ ଖଗେଶ୍ୱର ବିହାର କହିଛନ୍ତି, ଠିକାଦାର କାର୍ଯ୍ୟ ଜାରି ରଖିଛି। ଏନେଇ ତଦାରଖ ମଧ୍ୟ କରାଯାଉଛି। ଲୋକ ସମସ୍ୟା ଦୂର ପାଇଁ ଠିକାଦାରଙ୍କ ସହ ଆଲୋଚନା କରାଯିବ।
