କାକଟପୁର, ୧୭ା୭(ଶୁଭଦର୍ଶନ ମିଶ୍ର): କାକଟପୁରର ଅତ୍ୟାଧୁନିକ ବସ୍ଷ୍ଟାଣ୍ଡ ନିର୍ମାଣ କାର୍ଯ୍ୟ ମନ୍ଥର ଗତିରେ ଚାଲିଛି। ଫଳରେ ଧାର୍ଯ୍ୟ ସମୟରେ ଏହି କାମ ସରିବା ନେଇ ଅନିଶ୍ଚିତତା ଦେଖାଦେଇଛି। ଏପରିକି କାର୍ଯ୍ୟସ୍ଥଳରେ ସୂଚନାଫଳକ ନାହିଁ। ତେଣୁ କାର୍ଯ୍ୟ ବିଷୟରେ ଠିକ୍ ତଥ୍ୟ ମିଳିପାରୁନାହିଁ। ଅନ୍ୟପକ୍ଷରେ ନିର୍ମାଣ କାର୍ଯ୍ୟ ନିମ୍ନମାନର ହେଉଥିବା ସାଧାରଣରେ ଅଭିଯୋଗ ହେଉଛି।
ସୂଚନା ଅନୁଯାୟୀ, ଯାତ୍ରୀଙ୍କ ସୁବିଧା ଓ ବସ୍ ରହଣି ପାଇଁ କାକଟପୁରରେ ଅତ୍ୟାଧୁନିକ ବସ୍ଷ୍ଟାଣ୍ଡ ନିର୍ମାଣ କରିବାକୁ ରାଜ୍ୟ ସରକାର ନିଷ୍ପତ୍ତି ନେଇଥିଲେ। ଏଥିଲାଗି ଜମି ଚିହ୍ନଟ ହେବା ପରେ ସରକାର ଅନୁଦାନ ମଞ୍ଜୁର କରିଥିଲେ। ବସ୍ଷ୍ଟାଣ୍ଡ ନିର୍ମାଣ ଲାଗି ପ୍ରାୟ ୬ କୋଟି ଟଙ୍କା ବ୍ୟୟ ଅଟକଳ ହୋଇଛି। ଗତ ୫ବର୍ଷ ହେଲା ନିର୍ମାଣ କାର୍ଯ୍ୟ ଚାଲିଥିଲେ ବି ସରିବାର ନାଁ ଧରୁନାହିଁ। ଠିକାଦାର ଓ ପ୍ରଶାସନ ମଧ୍ୟରେ ମଧୁଚନ୍ଦ୍ରିକା ଯୋଗୁ କାର୍ଯ୍ୟ ବିଳମ୍ବ ହେଉଥିବା ସାଧାରଣରେ ଚର୍ଚ୍ଚା ଚାଲିଛି। ନିର୍ମାଣସ୍ଥଳରେ ସମ୍ପୃକ୍ତ ଠିକାଦାର ଏବଂ ଅଧିକାରୀଙ୍କ ଦେଖା ମିଳୁନାହିଁ। ସୂଚନାଫଳକ ଲଗାଯାଇ ନ ଥିବାରୁ ଜାଣିଶୁଣି କାର୍ଯ୍ୟ ସମ୍ପର୍କରେ ସୂଚନା ଦେବାକୁ ଠିକାଦାର ଦୂରେଇ ରହୁଥିବା ସ୍ପଷ୍ଟ ହେଉଛି। ଏପରିକି କେଉଁ ଯନ୍ତ୍ରୀଙ୍କ ତତ୍ତ୍ୱାବଧାନରେ କାର୍ଯ୍ୟ ତଦାରଖ ହେଉଛି ତାହା ମଧ୍ୟ ଜଣାପଡୁନାହିଁ। ନିର୍ମାଣ କାର୍ଯ୍ୟରେ ନିୟୋଜିତ ଶ୍ରମିକଙ୍କୁ ସମ୍ପୃକ୍ତ ଠିକାଦାର ଏବଂ ଅଧିକାରୀଙ୍କ ସମ୍ପର୍କରେ ପଚାରିଲେ ସେମାନେ ଜାଣି ନ ଥିବା କହୁଛନ୍ତି। ଧାର୍ଯ୍ୟ ସମୟରେ ବସ୍ଷ୍ଟାଣ୍ଡ ନିର୍ମାଣ ଶେଷ ହେଲେ ଯାତ୍ରୀଙ୍କ ସେବାରେ ଲାଗିପାରନ୍ତା। ସେହିପରି ବଜାର ମଧ୍ୟରେ ଟ୍ରାଫିକ୍ ସମସ୍ୟା ମଧ୍ୟ ଦୂର ହୋଇପାରନ୍ତା। ତେବେ ପ୍ରଶାସନର ଅଣଦେଖା ଯୋଗୁ ନିର୍ମାଣ କାର୍ଯ୍ୟ ଆହୁରି ବିଳମ୍ବ ହେବା ନେଇ ଅଞ୍ଚଳବାସୀ ଆଶଙ୍କା ବ୍ୟକ୍ତ କରିଛନ୍ତି। ବସ୍ଷ୍ଟାଣ୍ଡ ପଛପଟେ ବହିଯାଉଥିବା ପ୍ରାଚୀ ନଦୀ ନାମରେ ପତିତ ଜମି ରେକର୍ଡଭୁକ୍ତ ହେବା ଦରକାର। ନଚେତ ଭବିଷ୍ୟତରେ ସେହି ଜମି ଜବରଦଖଲ କରି ନଦୀ ପୋତିବା ଭଳି ସମସ୍ୟା ଆସିପାରେ ବୋଲି ଅନେକ ବୁଦ୍ଧିଜୀବୀ ଆଶଙ୍କା ବ୍ୟକ୍ତ କରିଛନ୍ତି। ସେହିପରି ବସ୍ଷ୍ଟାଣ୍ଡ ଅପର ପାର୍ଶ୍ୱରେ ରହିଥିବା ଜଗନ୍ନାଥ ମହାପ୍ରଭୁଙ୍କ ସମ୍ପତ୍ତିକୁ ଜବରଦଖଲକାରୀଙ୍କ ଠାରୁ ମୁକ୍ତ କରିବା ସହିତ ସର୍ବସାଧାରଣଙ୍କ ଦୃଷ୍ଟିଗୋଚର ହେଉଥିବା ସ୍ଥାନରେ ଫଳକ ଲଗାଯିବା ଏବଂ ତୁରନ୍ତ କାର୍ଯ୍ୟ ସମ୍ପୂର୍ଣ୍ଣ କରାଯିବାକୁ ଅଞ୍ଚଳବାସୀ ଦାବି କରିଛନ୍ତି।
