ଖୋର୍ଦ୍ଧା ଅଫିସ,୨୯ା୮: ଖୋର୍ଦ୍ଧା ବ୍ଲକରେ ବନ୍ୟା ତାଣ୍ଡବ ରଚିଥିଲା। ପାଣି ଛାଡ଼ିବା ପରେ ଏବେ ସ୍ଥିତି ସ୍ବାଭାବିକ ହୋଇଛି। ବନ୍ୟାପାଣି ଘେରରେ ଥିବା ବିପନ୍ନ ପରିବାରଙ୍କ ସ୍ଥିତିରେ ସାମାନ୍ୟ ସୁଧାର ଆସିଛି। ଗ୍ରାମବାସୀ ବନ୍ୟାକଷ୍ଟକୁ ଭୁଲି ନିଜ କାମରେ ଲାଗିଲେଣି। ତେବେ ଫସଲ ହାନିକୁ ନେଇ ଚିନ୍ତାରେ ପଡ଼ିଛନ୍ତି ଚାଷୀ। ଏକର ଏକର ବିଲରେ ବନ୍ୟା ମାଡ଼ି ଚାଷଜମି ପ୍ରଭାବିତ ହୋଇଥିଲା। ଏବେ ବି ବିଲରେ ପାଣି ଜମିଛି। ଫଳରେ ଖରିଫ ଚାଷ କାର୍ଯ୍ୟ ବାଧାପ୍ରାପ୍ତ ହେଉଛି। ଜିଲା ମୁଖ୍ୟ କୃଷି କାର୍ଯ୍ୟାଳୟ ସୂଚନା ଅନୁଯାୟୀ, ଚଳିତ ଲଘୁଚାପ ବର୍ଷା ଓ ବନ୍ୟାରେ ୯ଟି ବ୍ଲକ ଅଧୀନ ୮୨ ପଞ୍ଚାୟତର ୨୪୩ ଗ୍ରାମର ପ୍ରାୟ ୧୦ ହଜାର ୯୬୩ ହେକ୍ଟର ଫସଲ ନଷ୍ଟ ହୋଇଛି। ସେଥିମଧ୍ୟରୁ ୧୦ ହଜାର ୬୫୦ ହେକ୍ଟର ଧାନ ଏବଂ ୩୧୨ ହେକ୍ଟର ଅଣଧାନ(ପନିପରିବା) ନଷ୍ଟ ହୋଇଥିବା ସୂଚନା ମିଳିଛି। ଜିଲା ପ୍ରଶାସନ ପକ୍ଷରୁ ଶନିବାରଠାରୁ କ୍ଷୟକ୍ଷତି ଆକଳନ ଆରମ୍ଭ ହୋଇଛି। ଏହା ୩ଦିନ ଚାଲିବ। ଅନ୍ୟପକ୍ଷରେ ପ୍ରଶାସନର ପ୍ରତିଶ୍ରୁତି ସତ୍ତ୍ୱେ ଲେଖନପୁର ନିକଟରେ ଆଡ଼ିବନ୍ଧ ନିର୍ମାଣ ସ୍ବପ୍ନ ପାଲଟିଥିବାରୁ ପ୍ରତିବର୍ଷ ଏଭଳି ବନ୍ୟା ସମସ୍ୟାର ସାମ୍ନା କରିବାକୁ ପଡୁଛି ବୋଲି ଚାଷୀମାନେ କହିଛନ୍ତି।
ଯେ, ବନ୍ୟାରେ ଖୋର୍ଦ୍ଧା ବ୍ଲକ ଅଧୀନ ଓବରସିଂ, ନରଣଗଡ଼ ଏବଂ ବ୍ରଜମୋହନପୁର ପଞ୍ଚାୟତର ହିରିମୂଳ, ଡିହଖଳା, ଦୁର୍ଗାପୁର, ରାୟପୁର, କୃଷ୍ଣପୁର, ଲେଖନପୁର, ତେନ୍ତୁଳମୁହଁ, ମଣାଣିଆ, ଧବଳପୁର, ବଳପୁର ଓରମୀ, ହାଡ଼ପଦା, ଶରଧାପୁର ପ୍ରଭୃତି ଗ୍ରାମ ପ୍ରଭାବିତ ହୋଇଥିଲା। ବନ୍ୟାଜଳ ମାଡ଼ି ଫସଲ ସବୁ ନଷ୍ଟ ହୋଇଛି ବୋଲି ଡିହଖଳାର ଚାଷୀ ପରମାନନ୍ଦ ଛୋଟରାୟ କହିଛନ୍ତି। ଚାଷଜମିରୁ ବନ୍ୟାଜଳ ନ ଖସିବାରୁ ଦୁର୍ଦ୍ଦଶା ବଢ଼ାଇଛି। କିଏ ଏକର ତ ଆଉ କେହି ମାଣେ ଜମିରେ ଧାନଚାଷ କରିଥିଲେ। ୩ମାସ ଧରି ଜମିରେ ଦିନ ରାତି ଏକ କରି ଧାନ ରୋଇଥିଲେ। ତେବେ ଶେଷ ପର୍ଯ୍ୟାୟରେ ବନ୍ୟାଜଳ ମାଡ଼ି ସବୁ ଉଜୁଡ଼ିଗଲା। ଧାନକେଣ୍ଡା ମୂଳରୁ ନଇ ଭାଙ୍ଗିଯାଇଥିବା ବେଳେ ପଚିଶଢି ଯାଇଛି। ଅନେକ ଚାଷୀ ଧାରକରଜ କରି ଓ ସମିତିରୁ ଋଣ ନେଇ ଚାଷ କାର୍ଯ୍ୟ କରିଥିଲେ। ଆଶା କରିଥିଲେ, ଫସଲ ଭଲ ହେଲେ ଋଣ ଶୁଝିଦେବେ। ଏପରି ସ୍ବପ୍ନ ଦେଖିଥିବା ଅନେକ ଚାଷୀଙ୍କ ଆଶା ଏବେ ଧୂଳିସାତ ହୋଇଯାଇଛି। ଚାଷୀ କଂଗ୍ରେସ ମାର୍ଥା କହିଚନ୍ତି, ଗତବର୍ଷ ବନ୍ୟାଜଳ ମାଡ଼ି ଫସଲ ନଷ୍ଟ ହୋଇଥିଲା। କ୍ଷତିଭରଣା ହୋଇ ନ ଥିବା ବେଳେ ଚଳିତ ବର୍ଷ ପୁଣି ଫସଲ ସବୁ ଧୋଇଯାଇଛି। ଆଉ କିଛି ନାହିଁ। କ’ଣ ଖାଇବୁ, କିପରି ଚଳିବୁ ସେଇ କଥା ଭାବୁଛୁ। ସେହିପରି ଚାଷୀ ସର୍ବେଶ୍ୱର ମାର୍ଥା କହିନ୍ତି, ଆମ ଅଞ୍ଚଳ ପାଇଁ ରାଜୁଆ ନଦୀ ଦୁଃଖ ପାଲଟିଛି। ମୋ’ ପିଲାବେଳୁ ଏ ସମସ୍ୟା ଦେଖିଆସୁଛି। ପ୍ରତିବର୍ଷ ଖରିଫ ଋତୁ ଆସିଲେ ସ୍ଥାନୟୀ ପ୍ରତିକାର ପାଇଁ ପ୍ରଶାସନକୁ ଅଞ୍ଚଳବାସୀଙ୍କ ପକ୍ଷରୁ ଦାବିପତ୍ର ଦିଆଯାଉଛି। ପ୍ରତିଶ୍ରୁତି ମିଳୁଛି ହେଲେ କାର୍ଯ୍ୟକାରୀ ନାହିଁ। ଶରଧାପୁର, ଲେଖନପୁର ନିକଟରେ ଏକ ଆଡିବନ୍ଧ ନିର୍ମାଣ ସ୍ବପ୍ନ କେବଳ ସ୍ବପ୍ନରେ ରହିଯାଇଛି। ଚାଷୀ ସୁରେନ୍ଦ୍ର ବଳିଆରସିଂ କହିଛନ୍ତି, ଚାଜେମିରୁ ସମ୍ପୂର୍ଣ୍ଣ ପାଣି ଛାଡ଼ିବାକୁ ଆହୁରି କିଛି ଦିନ ସମୟ ଲାଗିବ। ପାଣିି ଜମି ରହିବା ଯୋଗୁ ଧାନଗଛ ପଚି ନଷ୍ଟ ହୋଇଯାଇଛି। ପ୍ରତିବର୍ଷ ହୀରାକୁଦ ଗେଟ୍ ଖୋଲିଲେ, ରାଜୁଆ ନଦୀର ପଛୁଆ ପାଣି ଏହି ଗ୍ରାମରେ ପ୍ରବେଶ କରିବା ଦ୍ୱାରା ଚାଷକାର୍ଯ୍ୟ ବାଧାପ୍ରାପ୍ତ ହେଉଛି। ଏହାର ସ୍ଥାୟୀ ପ୍ରତିକାର ଜରୁରୀ। ଅନ୍ୟପକ୍ଷରେ ଫସଲ କ୍ଷୟକ୍ଷତିର ଆକଳନ କରାଯାଇ କ୍ଷତିପୂରଣ ଦିଆଯିବ ବୋଲି ଜିଲା ପ୍ରଶାସନ ପକ୍ଷରୁ କୁହାଯାଇଛି।
