ଏମ୍ଭି ୭୯,୭ା୩(ଡି.ଏନ୍.ଏ.): ନାବାଳକ ରାଜୀବ ବାଛାଡ଼ ଘରର ଦୁଃଖ କଷ୍ଟ ଦୂର କରିବାକୁ କମ୍ ବୟସରେ ପଥର ଖାଦାନରେ କାମ କରୁଥିଲେ। ମାତ୍ର ସାମାନ୍ୟ ଭୁଲ୍ ଯୋଗୁ ନିଜ ଗୋଡ଼ ହରାଇଲେ। ୧୮ ବର୍ଷ ନ ପୂରୁଣୁ ନାବାଳକଙ୍କୁ କାମରେ ଲଗାଉଥିବା ଗ୍ରାନାଇଟ୍ସ କମ୍ପାନୀ ଏହି ଦୁର୍ଘଟଣାକୁ ଲୋକଲୋଚନକୁ ନ ଆଣିବା ଏବଂ ପ୍ରଶାସନିକ ଅଡୁଆ ଏଡ଼ାଇବା ଲାଗି ପରିବାର ଲୋକଙ୍କୁ ବହୁ ପ୍ରତିଶ୍ରୁତି ଦେଇଥିଲା। ସମୟକ୍ରମେ ଏବେ ପ୍ରତିଶ୍ରୁତି ଭୁଲିଯାଇଛନ୍ତି କମ୍ପାନୀ କର୍ତ୍ତୃପକ୍ଷ। ଏପରି ପ୍ରତିଶ୍ରୁତିରୁ ପ୍ରତାରଣାର ଶିକାର ହୋଇଛନ୍ତି ମାଲକାନଗିରି ଜିଲା କାଲିମେଳା ବ୍ଲକ ଅନ୍ତର୍ଗତ ଏମ୍ଭି-୭୯ ଗ୍ରାମର ବାବୁରାମ ବାଛାଡ଼ ଓ ଅନିମା ବାଛାଡ଼ଙ୍କ ପୁଅ ରାଜୀବ। ତାଙ୍କୁ ସହାୟତା ଯୋଗାଇଦେବାକୁ ସରକାରଙ୍କୁ ନିବେଦନ କରିଛନ୍ତି ପରିବାର ଲୋକେ।
୨୦୨୧ରେ ସାବେରୀ ସରକାରୀ ବିଦ୍ୟାଳୟରୁ ମାଟ୍ରିକ ପାସ୍ କରିଥିବା ରାଜୀବଙ୍କୁ ପରିବାରର ଦୁର୍ଦ୍ଦଶା ପଥର ଖାଦାନକୁ ନେଇଯାଇଥିଲା। ଯେଉଁ ବୟସରେ ସେ କଲେଜରେ ପାଠପଢ଼ି ଭଲ ମଣିଷ ହେବାକୁ ସ୍ବପ୍ନ ଦେଖୁଥିଲେ ସେ ବୟସରେ ହାତରେ ଧରିଲେ ପଥରଫଟା ଉପକରଣ। ତେବେ ଗତ ନଭେମ୍ବର ୨୦ ତାରିଖ ତାଙ୍କ ପାଇଁ ଆଣିଥିଲା ଦୁଃଖ। ପଥର ଖାଦାନରେ ଏକ ଦୁର୍ଘଟଣାର ଶିକାର ହେଲେ ରାଜୀବ ଆଉ ହରାଇ ବସିଲେ ଗୋଡ଼। ଦୁର୍ଘଟଣା ପରେ ବିବ୍ରତ ହୋଇ ପଡ଼ିଥିଲେ କମ୍ପାନୀ କର୍ତ୍ତୃପକ୍ଷ। ନାବାଳକ ଶ୍ରମିକଙ୍କୁ କାର୍ଯ୍ୟରେ ଲଗାଉଥିବା ନେଇ ନିୟମକାନୁନର ଜାଲରୁ ମୁକୁଳିବା ଲାଗି ସେ ରାଜୀବଙ୍କ ପରିବାର ନିକଟରେ ପହଞ୍ଚତ୍ ଦେଇଥିଲେ ବହୁ ପ୍ରତିଶ୍ରୁତି। ପରିବାରକୁ କ୍ଷତିପୂରଣ ବାବଦରେ ଅର୍ଥ ଦେବେ, କମ୍ପାନୀ ଥିବା ଯାଏ ରାଜୀବ ଦରମା ପାଇବେ ଏବଂ ତାଙ୍କର କୃତ୍ରିମ ଗୋଡ଼ ଲଗାଇ ଦେବେ ଏପରି ଅନେକ ପ୍ରତିଶ୍ରୁତିରେ ରାଜୀବ ଏବଂ ତାଙ୍କ ପରିବାର ଲୋକଙ୍କୁ ନୀରବ କରାଇବାରେ ସଫଳ ହୋଇଥିଲେ। ଏବେ ପଥର କମ୍ପାନୀ କର୍ତ୍ତୃପକ୍ଷ ପ୍ରତିଶ୍ରୁତି ପୂରଣ କରିବା ବଦଳରେ ରାଜୀବଙ୍କ ସହ କରିଛନ୍ତି ଚଞ୍ଚକତା। ପ୍ରଥମେ ୫ ମାସର ଦରମା ଦେବା ପରେ ଆଉ ଦେଉନାହିଁ ସମ୍ପୃକ୍ତ ଗ୍ରାନାଇଟ୍ସ କମ୍ପାନୀ। ଏପରି ସ୍ଥିତିରେ ଭାଗ୍ୟକୁ ଆଦରି ଘରେ ପଡ଼ି ରହିଛନ୍ତି ରାଜୀବ। ସରକାର ଯଦି ସହାୟତା ଯୋଗାଇ ଦିଅନ୍ତେ ତେବେ ପୁଅର ଚିକିତ୍ସା କରି ଭଲ କରିପାରନ୍ତୁ ବୋଲି କହିଛନ୍ତି ମାଆବାପା।
