ମାଲକାନଗିରି,୧୩।୩ (ଡି.ଏନ୍.ଏ.): ମାଲକାନଗିରି ଜିଲାରେ ଛତିଶଗଡ଼ ସୀମାନ୍ତକୁ ଲାଗିଥିବା ସାବେରୀ ନଦୀ ନିକଟବର୍ତ୍ତୀ କତାମାଟେରୁ ଗ୍ରାମରେ ବହୁଳ ପରିମାଣରେ ଚୂନପଥର ଗଚ୍ଛିତ ଥିବା ସର୍ଭେରୁ ଜଣାପଡିବା ପରେ ଏହାକୁ ୨୦୧୭ରେ ରାଜ୍ୟ ସରକାର ନିଲାମ କରିଥିଲେ। ଏହି ନିଲାମକୁ ଡାଲମିଆ ସିମେଣ୍ଟ କମ୍ପାନୀ ୧୨.୦୫ ପ୍ରତିଶତ ପ୍ରିମିୟମ ଦେଇ ୫୦ ବର୍ଷ ପାଇଁ ଲିଜ୍ରେ ନେଇଛି। ତେବେ ଏହି ଅଞ୍ଚଳରେ ବସବାସ କରୁଥିବା କତାମାଟେରୁ, ମାଟାପାକା, ନାମକୋଣ୍ଡା, ଆକରପାଲି, କୋୟାଗିରି, ପୁରୁଣାଗୁଡ଼ା ଗ୍ରାମବାସୀ ଏହାକୁ ବିରୋଧକରି ଆସୁଥିଲେ। ବିଶେଷକରି ଖଣି ଅଞ୍ଚଳରେ ଥିବା କତାମାଟେରୁ ଗ୍ରାମର ୨୦୦ ପରିବାର ବିସ୍ଥାପିତ ହେବା ଆଶଙ୍କା କରି ଖଣି କରାଇଦେବେ ନାହିଁ ବୋଲି ସେମାନେ ଏଥିପାଇଁ ବିଭିନ୍ନ ସମୟରେ ବସୁଥିବା ବୈଠକରେ ପ୍ରତିବାଦ କରି ଆସୁଥିଲେ। ଗତ ଦୁଇବର୍ଷ ମଧ୍ୟରେ କମ୍ପାନୀ କିମ୍ବା ଜିଲା ପ୍ରଶାସନ ଗ୍ରାମବାସୀଙ୍କ ଆଶଙ୍କା ଦୂରକରିବା ପାଇଁ ଗ୍ରାମରେ ଗ୍ରାମସଭା କିମ୍ବା ପଲ୍ଲିସଭା କରି ନ ଥିଲେ। ତେବେ ଶନିବାର ମାଟାପାକା ପଞ୍ଚାୟତର ଖଣି ଜନଶୁଣାଣି ପାଇଁ ଦିନ ଧାର୍ଯ୍ୟ ହୋଇଥିଲା। ଏଥିରେ କତାମାଟେରୁ ଗ୍ରାମ ବାସିନ୍ଦାଙ୍କ ସହ ମାଟାପାକା ପୂର୍ବତନ ସରପଞ୍ଚ, ନିଲିଗୁଡ଼ା ପୂର୍ବତନ ସରପଞ୍ଚ ଏବଂ ମାଟାପାକା ପଞ୍ଚାୟତ ଅନ୍ତର୍ଗତ ସମସ୍ତ ଗ୍ରାମର ବୁଦ୍ଧିଜୀବୀ, ଗ୍ରାମ ମୁଖିଆ, ଓ୍ବାର୍ଡମେମ୍ବରଙ୍କ ସମେତ ୨୦୦ରୁ ଊର୍ଦ୍ଧ୍ୱ ମହିଳା ପୁରୁଷ ଉପସ୍ଥିତ ଥିଲେ। ଜନଶୁଣାଣିରେ ମାଲକାନଗିରି ଅତିରିକ୍ତ ଜିଲାପାଳ ବୀରସେନ ପ୍ରଧାନ ଅଧ୍ୟକ୍ଷତା କରିଥିଲେ। ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ମୁଖ୍ୟ ପ୍ରଶାନ୍ତ କର, ଡାଲମିଆ କମ୍ପାନୀର ସହକାରୀ କାର୍ଯ୍ୟ ନିର୍ବାହୀ ଅଧିକାରୀ ସରୋଜ ରାଉତ, ଚନ୍ଦ୍ରଶେଖର, ମାଲକାନଗିରି ତହସିଲଦାର ଉପସ୍ଥିତ ଥିଲେ। ଶୁଣାଣି ବେଳେ କତାମାଟେରୁ ଓ ନିଲିଗୁଡ଼ାର ପୂର୍ବତନ ସରପଞ୍ଚଙ୍କ ସହ ୨୧ ଜଣ ସେମାନଙ୍କ ସମସ୍ୟା ସମ୍ପର୍କରେ ମତ ରଖିଥିଲେ। କତାମାଟେରୁରୁ ଗ୍ରାମବାସୀ ବିସ୍ଥାପିତ ନ ହେବା ନେଇ ସେମାନେ ଦାବି କରିଥିଲେ। ଏହି ଖଣିରୁ କଞ୍ଚାମାଲ ନେଇ କମ୍ପାନୀ ମାଲକାନଗିରି ଜିଲାରେ କାରଖାନା ନିର୍ମାଣ କରିବ। ଏହି କାରଖାନା ଏବଂ ଖଣିରେ ସ୍ଥାନୀୟ ଲୋକଙ୍କୁ ନିଯୁକ୍ତି, କତାମାଟେରୁ ସହ ମାଟାପାକା ପଞ୍ଚାୟତର ଯୁବତୀ ଯୁବକଙ୍କୁ ଯୋଗ୍ୟତା ଅନୁଯାୟୀ ଚାକିରି, ମହିଳାଙ୍କୁ ବିଭିନ୍ନ ଯୋଜନାରେ ସାମିଲ କରି ସେମାନଙ୍କ ଆର୍ଥତ୍କ ମାନଦଣ୍ଡରେ ଉନ୍ନତି କରିବା, ଉତ୍ତମ ଚିକିତ୍ସା, ଭିନ୍ନକ୍ଷମଙ୍କ ପାଇଁ ସ୍ବତନ୍ତ୍ର ଚିକିତ୍ସା, ପଞ୍ଚାୟତରେ ଏକ ଇଂରାଜୀ ବିଦ୍ୟାଳୟ ପ୍ରତିଷ୍ଠା, ରାସ୍ତା, ବିଦ୍ୟୁତ୍, ପାନୀୟ ଜଳ, ମୋବାଇଲ ନେଟ୍ଓ୍ବର୍କ, ଖଣି ପାଇଁ ଯାଉଥିବା ସେମାନଙ୍କ ଜମି ବଦଳରେ ଭଲ ଜମି କିମ୍ବା ୫ଗୁଣା ଅର୍ଥ କ୍ଷତିପୂରଣ ଦେବା, ସେହି ଅଞ୍ଚଳର ସମସ୍ତ ଛୋଟବଡ଼ କାର୍ଯ୍ୟ କମ୍ପାନୀ ଠିକାଦାର ମାଧ୍ୟମରେ ନ କରି ଗ୍ରାମ କମିଟି ମାଧ୍ୟମରେ କରିବା ନେଇ ଦାବି ଉପସ୍ଥାପନ କରିଥିଲେ। ଉପସ୍ଥିତ ଥିବା କମ୍ପାନୀର କାର୍ଯ୍ୟନିର୍ବାହୀ ଅଧିକାରୀ ସେମାନଙ୍କ ଦାବିକୁ ମାନି ନେଇଥିଲେ। ମାଲକାନଗିରି ଜିଲାରେ ଏହି କାରଖାନା ପ୍ରତିଷ୍ଠା ହେଲେ କମ୍ପାନୀ ସ୍ଥାନୀୟ ଲୋକଙ୍କ ସମସ୍ୟା, ପରିବେଶ ପ୍ରତି ଅଧିକ ଗୁରୁତ୍ୱ ଦେବ। ଏହି ଜିଲା ରାଜ୍ୟରେ ଆର୍ଥତ୍କ, ସାମାଜିକ, ପରିବେଶ ଓ ନିଯୁକ୍ତି କ୍ଷେତ୍ରରେ ଆଗାମୀ ଦିନରେ ଏକ ନମ୍ବର ଜିଲା ଭାବେ ପରିଗଣିତ ହେବ ବୋଲି ସେ ପ୍ରକାଶ କରିଥିଲେ। ଶୁଣାଣି ବେଳେ ପୋଲିସ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା। ମାଲକାନଗିରି ଏସ୍ପିଙ୍କ ନେତୃତ୍ୱରେ ଅତିରିକ୍ତ ଏସ୍ପି ବଳଭଦ୍ର ଦୀପ୍, ଦୁଇଜଣ ଏସ୍ଡିପିଓ, ୧୦ଜଣ ଇନିସ୍ପେକ୍ଟରଙ୍କ ସମେତ ୨ଶହରୁ ଊର୍ଦ୍ଧ୍ୱ ସୁରକ୍ଷା କର୍ମୀ ନିୟୋଜିତ ହୋଇଥିଲେ। ସୂଚନାଯୋଗ୍ୟ, ଏହି ଖଣି ପାଇଁ ୮୦୧.୧୭୧ ହେକ୍ଟର ଜମି ଆବଶ୍ୟକ ଥିବା ବେଳେ ଏଥିରୁ ବେସରକାରୀ ଲୋକଙ୍କ ୧୪୮.୮୬୬ ଜମି ରହିଛି। ଅବଶିଷ୍ଟ ଜମି ସରକାରୀ ଏବଂ ପତ୍ର ଜଙ୍ଗଲ ରୂପେ ରହିଛି।
