ପଦ୍ମପୁର, ୧୨।୧୨(ଡି.ଏନ.ଏ.) ଭଦ୍ରକ ଜିଲା ବାସୁଦେବପୁର ବ୍ଲକର ୫ ସେବା ସମବାୟ ସମିତିରେ ଚାଷୀମାନଙ୍କ ଧାନ କିଣା ପାଇଁ ଅନ୍ଲାଇନ ପଞ୍ଜୀକରଣରେ ତ୍ରୁଟିକୁ ନେଇ ଚୁଡ଼ାମଣି ସେବା ସମବାୟ ସମିତିର ସମ୍ପାଦକଙ୍କୁ ନିଲମ୍ବନ ସହ ୫ ସମିତିର ଡାଟାଏଣ୍ଟ୍ରି ଅପରେଟରଙ୍କୁ ବହିଷ୍କାର କରାଯାଇଛି। ସମ୍ପୃକ୍ତ ସମିତିର ସମ୍ପାଦକଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଥିଲା। ଏହାକୁ ଅଗଣତାନ୍ତ୍ରିକ ଓ ଏକପାଖିଆ ବୋଲି ଦର୍ଶାଇ କର୍ମଚାରୀମାନେ ପୁନଃ ବିଚାର ପାଇଁ ବିଭାଗୀୟ କର୍ତ୍ତୃପକ୍ଷଙ୍କ ନିକଟରେ ଦାବି କରିବା ସହ କଳାବ୍ୟାଜ୍ ପିନ୍ଧି କାମ କରୁଥିଲେ। ହେଲେ ବିଭାଗୀୟ ଅଧିକାରୀ କୌଣସି ସମାଧାନ ନ କରିବାରୁ ବାସୁଦେବପୁର ବ୍ଲକର ୨୨ ଓ ତିହିଡ଼ିର ୧୬ ସମିତିର ୨ଶହରୁ ଊର୍ଦ୍ଧ୍ୱ କର୍ମଚାରୀ ଗତ ଶୁକ୍ରବାରଠାରୁ ଭଦ୍ରକ ବାଇପାସ୍ ସ୍ଥିତ ଏଆର୍ସିଏସ୍ଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଛନ୍ତି। ୯ଦିନ ବିତିଥିଲେ ମଧ୍ୟ ସମାଧାନର ସୂତ୍ର ବାହାରିପାରି ନାହିଁ। ଫଳରେ ସମିତିଗୁଡ଼ିକରେ ତାଲା ଝୁଲୁଛି।
ଜିଲାପାଳ ତ୍ରିଲୋଚନ ମାଝି ଧାରଣାରତ କର୍ମଚାରୀମାନଙ୍କୁ କାର୍ଯ୍ୟରେ ଯୋଗଦେବା ପାଇଁ ପରାମର୍ଶ ଦେଇଥିଲେ। କିନ୍ତୁ ସେମାନେ ପଞ୍ଜୀକରଣରେ ବାଦ୍ ପଡ଼ିଥିବା ଚାଷୀମାନଙ୍କର ପୁନଃ ପଞ୍ଜୀକରଣ ପାଇଁ ସୁଯୋଗ, ବହିଷ୍କୃତ ଓ ନିଲମ୍ବିତ କର୍ମଚାରୀମାନଙ୍କର ପୁନଃ ନିଯୁକ୍ତି, ସମବାୟ ବ୍ୟାଙ୍କର ଅଧିକାରୀ ଓ ସମିତିର କର୍ମକର୍ତ୍ତାଙ୍କୁ ନେଇ ସହମତି ଭିତ୍ତିରେ ଦ୍ୱିପାକ୍ଷିକ ରାଜିନାମାକୁ କାର୍ଯ୍ୟକାରୀ ପ୍ରମୁଖ ଦାବିକୁ ନେଇ ଅଡ଼ି ବସିଛନ୍ତି। ଆସନ୍ତା ସୋମବାର ସୁଦ୍ଧା ଏହି ଦାବି ପୂରଣ ନ ହେଲେ ବାଲେଶ୍ୱର-ଭଦ୍ରକ ଜିଲାର ୨୨୭ ସେବା ସମବାୟ ସମିତିର କର୍ମଚାରୀ ସମୂହ ଧାରଣାରେ ବସିବେ ବୋଲି ଚେତାବନୀ ଦେଇଛନ୍ତି। ସଂଘର ସଭାପତି ନିରଞ୍ଜନ ସାହୁ, ସମ୍ପାଦକ ଅରୁଣଜୟ ପାତ୍ର, ବାସୁଦେବପୁର ସଂଘର ସଭାପତି ବନମାଳି ମହାକୁଡ଼, ସମ୍ପାଦକ ଅନିରୁଦ୍ଧ ନାୟକ ପ୍ରମୁଖ ଏ ସମ୍ପର୍କରେ ଜଣାଇଛନ୍ତି।
