ସମ୍ବଲପୁର,୨୯।୮(ବ୍ୟୁରୋ)-ଶନିବାର ହୀରାକୁଦ ଜଳଭଣ୍ଡାରରୁ ୪୬ ଗେଟ୍ ଦେଇ ବନ୍ୟାଜଳ ନିଷ୍କାସନ ହେଉଛି । ମହାନଦୀ ପିଛିଲା ପାଣିରେ ସମ୍ବଲପୁର ଜିଲାର ନଦୀ ନାଳଗୁଡ଼ିକ ଫୁଲି ଉଠିଛି । ସମ୍ବଲପୁର ସହରର ତଳିଆ ଅଞ୍ଚଳରେ ବନ୍ୟା ଜଳ ପ୍ରବେଶ କରିଥିବାରୁ ପରିସ୍ଥିତି ଜଟିଳ ହୋଇଛି। ପ୍ରଶାସନ ପକ୍ଷରୁ ଉଦ୍ଧାର କାର୍ଯ୍ୟ ଜାରିରହିଛି । ବିଭିନ୍ନ ସ୍ଥାନରେ ୧୪ଟି ଆଶ୍ରୟସ୍ଥଳୀ ଖୋଲାଯାଇ ପ୍ରାୟ ୧୮ଶହ ଲୋକଙ୍କୁ ରଖାଯାଇଛି । ଶୁକ୍ରବାର ରାତିରୁ ଉଦ୍ଧାର କାର୍ଯ୍ୟ ଜାରିରହିଛି । ମନ୍ଦଲିଆ, ଚାରଭାଟି, ବିନାଖଣ୍ଡି, ଗୋବିନ୍ଦତୋଲା, ଦୁର୍ଗାପାଲି, ଖଣ୍ଡୁଆଳ, ଲିମସରିଏନ, କମଲିବଜାର, ବଡ଼ବଜାର, ଚନ୍ଦନନଗର ଅଞ୍ଚଳରେ ବନ୍ୟାଜଳ ପ୍ରବେଶ କରିଛି ା ଉଦ୍ଧାର କରାଯାଇଥିବା ଲୋକମାନଙ୍କୁ ଶୁଖିଲା ଓ ରନ୍ଧାଖାଦ୍ୟ ପ୍ରଦାନ କରାଯାଉଛି ।
ବନ୍ୟା ପରିସ୍ଥିତକୁ ନେଇ ସହରରେ ଭୟର ବାତାରବରଣ ସୃଷ୍ଟି ହୋଇଛି । ଶନିବାର ଦିନ ତମାମ ବର୍ଷା ହୋଇନାହିଁ ା ହେଲେ ପିଛିଲା ପାଣିରେ ତଳିଆ ଅଞ୍ଚଳର ବହୁ ଘରଦ୍ୱାର ଭାଙ୍ଗିଯାଇଛି । ବନ୍ୟାର ସମ୍ଭାବ୍ୟ ପରିସ୍ଥିତି ପାଇଁ ପ୍ରସ୍ତୁତ ରହିବାକୁ ଜିଲାପାଳ ଶୁଭମ୍ ସକ୍ସେନା ନିର୍ଦ୍ଦେଶ ଦେଇଛନ୍ତି । ବନ୍ୟା ପରିସ୍ଥିତିର ସମୀକ୍ଷା କରିବା ପାଇଁ କମିଶନର ଅନିରୁଦ୍ଧ ପ୍ରଧାନ ହୀରାକୁଦ ଅଞ୍ଚଳ ପରିଦର୍ଶନ କରି ସ୍ଥାନୀୟ ଅଧିକାରୀଙ୍କ ସହ ଆଲୋଚନା କରିଛନ୍ତି। ବିନାଖଣ୍ଡି, ଦୁର୍ଗାପାଲି, ବଡ଼ବଜାର ଆଦି ଅଞ୍ଚଳରେ ପଶିଥିବା ବନ୍ୟାଜଳକୁ ପମ୍ପ ସାହାଯ୍ୟରେ ନିଷ୍କାସନ କରାଯାଉଛି । ଅଗ୍ନିଶମ ବିଭାଗ, ସ୍ବାସ୍ଥ୍ୟ ବିଭାଗ ଓ ଅନ୍ୟାନ୍ୟ ବିଭାଗର ଅଧିକାରୀମାନେ ବନ୍ୟା ପରିସ୍ଥିତିର ମୁକାବିଲା ପାଇଁ ନିୟୋଜିତ ରହିଛନ୍ତି । ଜନସ୍ବାସ୍ଥ୍ୟ ବିଭାଗ ପକ୍ଷରୁ ରିଲିଫ କ୍ୟାମ୍ପ ଖେଲିଛି ା ପ୍ରଭାବିତ ଅଞ୍ଚଳରେ ବିଶୁଦ୍ଧ ପାଣି ଯୋଗାଇ ଦିଆଯାଉଛି ା
ମହାନଦୀ ତଟରେ ଥିବା ଚିପିଲିମାର ମାଁ ଘଣ୍ଟେଶ୍ୱରୀ ମନ୍ଦିର ପାଣି ଘେରରେ ରହିଛି । ସେହିପରି ଗୁଡେଶ୍ୱର ବାବା, ହୁମା ବିମଲେଶ୍ୱର ବାବା, ମାନେଶ୍ୱର ମାନଧାତା ବାବା ମନ୍ଦିର ପାଖକୁ ବନ୍ୟାଜଳ ମାଡି ଆସିଛି । ଅନ୍ୟପଟେ ସମ୍ବଲପୁର-ସୋନପୁର ରାସ୍ତା ଗୁଣ୍ଡେରପୁର ମାଳତୀ ନଦୀ ବ୍ରିଜ ଉପରେ ବନ୍ୟାଜଳ ପ୍ରବାହିତ ହେଉଥିବାରୁ ଯାତାୟାତ ବନ୍ଦ ରହିଛି ା ମହାନଦୀ ଅବବାହିକାରେ ଥିବା ଗ୍ରାମବାସୀ ଭୟରେ ଦିନ କାଟୁଛନ୍ତି ା
