କର୍ନାଟକରେ ଅବସ୍ଥିତ ୟେଲ୍ଲାପୁର ନିଜର ପ୍ରାକୃତିକ ସୁନ୍ଦରତା ପାଇଁ ବେଶ୍ ପ୍ରସିଦ୍ଧି ଲାଭ କରିପାରିଛି। ବିଶେଷକରି ପର୍ଯ୍ୟଟକଙ୍କ ଦେଖିବା ନିମନ୍ତେ ଏଠାରେ ରହିଛି ଏକାଧିକ ଉଚ୍ଚ ଉଚ୍ଚ ପାହାଡ଼ ଓ ଝରଣା…
ୟେଲ୍ଲାପୁର ହେଉଛି କର୍ନାଟକର ଉତ୍ତର କନ୍ନଡ଼ ଜିଲା ଅନ୍ତର୍ଗତ ଏକ ଆକର୍ଷଣୀୟ ଛୋଟ ସହର। ପ୍ରାକୃତିକ ସୌନ୍ଦର୍ଯ୍ୟରେ ଭରା ଏହି ସହରରେ ଦେଖିବାକୁ ରହିଛି ଜଙ୍ଗଲ ପରିବେଷ୍ଟିତ ବହୁ ଉଚ୍ଚ ଉଚ୍ଚ ପାହାଡ ଓ ଝରଣା। ତା’ଛଡ଼ା ଏହାର ନିକଟବର୍ତ୍ତୀ ଅଞ୍ଚଳରେ ବି ପର୍ଯ୍ୟଟକ ଅନେକ ଧାର୍ମିକ ପୀଠ ଦେଖିବାର ସୁଯୋଗ ପାଇପାରିବେ। ସେଥିପାଇଁ ଏଠାରେ ପ୍ରାୟତଃ ପର୍ଯ୍ୟଟକଙ୍କ ଭିଡ଼ ଦେଖିବାକୁ ମିଳିଥାଏ।
କ’ଣ ଦେଖିବେ
ଆକର୍ଷଣୀୟ ପ୍ରାକୃତିକ ପରିବେଶରେ ଭରା ୟେଲ୍ଲାପୁରରେ ପର୍ଯ୍ୟଟକ ସତୋଡ୍ଡି ଝରଣା, ମାଗୋଡ଼ ଝରଣାର ଅପୂର୍ବ ସୌନ୍ଦର୍ଯ୍ୟକୁ ଉପଭୋଗ କରିବା ସହ ଏଠାରେ ଥିବା ପାହାଡ଼ ଉପରକୁ ଚଢ଼ିବାର ମଜା ମଧ୍ୟ ନେଇପାରିବେ। ସେହିପରି ୟେଲ୍ଲାପୁରଠାରୁ ପ୍ରାୟ ୩୦ କି.ମି. ଦୂରରେ ଥିବା କଲଚି ନାମକ ଏକ ଗାଁରେ ରହିଛି ପ୍ରସିଦ୍ଧ ଦୁର୍ଗା ମନ୍ଦିର। ପର୍ଯ୍ୟଟକ ଚାହିଁଲେ ସେଠାକୁ ଯାଇ ମା’ଙ୍କର କରୁଣା ମଧ୍ୟ ଲଭିପାରିବେ।
ଟ୍ରେକିଂର ମଜା ନେଇହେବ
ସମୁଦ୍ରପତ୍ତନରୁ ପ୍ରାୟ ୧୭୭୫ ଫୁଟ୍ ଉଚ୍ଚତାରେ ରହିଥିବା ଏହି ସହରରେ ଅନେକ ପାହାଡ଼ ଥିବା ଯୋଗୁ ଏଠାରେ ପର୍ଯ୍ୟଟକ ଟ୍ରେକିଂର ଭରପୂର ମଜା ନେଇପାରିବେ। ତା’ସହିତ ଏଠାକାର ଆକର୍ଷଣୀୟ ପ୍ରାକୃତିକ ପରିବେଶରେ ନିଜକୁ କିଛି ସମୟ ପାଇଁ ହଜାଇ ସ୍ବର୍ଗୀୟ ସୁଖ ବି ଲଭିପାରିବେ।
ଧାନ କ୍ଷେତ ଦେଖିବାର ମଜା ନେଇପାରିବେ
ୟେଲ୍ଲାପୁରର ବାସିନ୍ଦା ମୁଖ୍ୟତଃ ଚାଷବାସ ଉପରେ ନିର୍ଭର କରି ଚଳିଥାନ୍ତି। ଧାନଚାଷ ହେଉଛି ସେମାନଙ୍କର ମୁଖ୍ୟ ଚାଷ। ତା’ଛଡ଼ା ଏଠାରେ ଏରେକାନଟ୍ (ଏକ ବିଶେଷ ଧରଣର ଗୁଆ)ର ଚାଷ ବି ବହୁତ ମାତ୍ରାରେ ହୋଇଥାଏ। ତେଣୁ ପର୍ଯ୍ୟଟକ ଚାହିଁଲେ ଧାନ ଚାଷ ସମୟରେ ଏଠାକୁ ଯାଇ କ୍ଷେତ ବୁଲି ଦେଖିବାର ନିଆରା ଅନୁଭବ ମଧ୍ୟ ନେଇପାରିବେ।
କେବେ ଓ କେମିତି ଯିବେ
ବର୍ଷର ସବୁ ସମୟରେ ଏଠାକୁ ଯିବାର ସୁବିଧା ଥିଲେ ହେଁ ସ୍ଥାନୀୟ ପାଣିପାଗ ସୂଚନା କେନ୍ଦ୍ରର ମତାନୁଯାୟୀ, ୟେଲ୍ଲାପୁର ଯିବା ପାଇଁ ନଭେମ୍ବରରୁ ଏପ୍ରିଲ୍ ହେଉଛି ସବୁଠୁ ଉପଯୁକ୍ତ ସମୟ। କାରଣ ଏହି ସମୟରେ ଏଠାକାର ପାଣିପାଗ ବୁଲାବୁଲି କରିବାକୁ ବେଶ୍ ଅନୁକୂଳ ରହିଥାଏ। ସେହିପରି ୟେଲ୍ଲାପୁରକୁ ଯିବା ପାଇଁ ଗମନାଗମନର ବି ବେଶ୍ ଭଲ ସୁବିଧା ରହିଛି। ହୁବ୍ଲ୍ଲି ଜଙ୍କ୍ସନ୍ ରେଲଓ୍ବେ ଷ୍ଟେଶନ ହେଉଛି ୟେଲ୍ଲାପୁରର ନିକଟତମ ତଥା ମୁଖ୍ୟ ରେଳଷ୍ଟେଶନ, ଯାହା ପ୍ରାୟ ୭୦ କି.ମି ଦୂରରେ ଅବସ୍ଥିତ। ବେଙ୍ଗାଲୁର, ମାଙ୍ଗାଲୋର, ଚେନ୍ନାଇ ତଥା ଦେଶର ଅନ୍ୟ ପ୍ରମୁଖ ସହରରୁ ଏହି ରେଲଓ୍ବେ ଷ୍ଟେଶନକୁ ନିୟମିତ ବ୍ୟବଧାନରେ ଟ୍ରେନ୍ ଚଳାଚଳ କରିଥାଏ। ସେହିପରି ହୁବ୍ଲ୍ଲି ରେଲଓ୍ବେ ଷ୍ଟେଶନରୁ ଟ୍ୟାକ୍ସି ଯୋଗେ ଜଣେ ଯାଇ ଆରାମରେ ୟେଲ୍ଲାପୁରରେ ପହଞ୍ଚତ୍ୟାଇପାରିବେ। ଅନ୍ୟପକ୍ଷେ ହୁବ୍ଲ୍ଲି ଏୟାରପୋର୍ଟ ବି ହେଉଛି ୟେଲ୍ଲାପୁରର ନିକଟତମ ବିମାନବନ୍ଦର। ତା’ଛଡ଼ା ଦେଶର ବିଭିନ୍ନ ସହରରୁ ନିୟମିତ ବ୍ୟବଧାନରେ ଟୁରିଷ୍ଟ ବସ୍ ବି ୟେଲ୍ଲାପୁର ଅଭିମୁଖେ ଯାଇଥାଏ। ତେଣୁ ପର୍ଯ୍ୟଟକ ନିଜ ପସନ୍ଦ ମୁତାବକ ଯେଉଁଥିରେ ଚାହିଁବେ ସେଥିରେ ଯାଇ ଆରାମରେ ୟେଲ୍ଲାପୁରରେ ପହଞ୍ଚତ୍ପାରିବେ।
