ବରୀ,୨୫ା୮(ଡି.ଏନ.ଏ.): ଯାଜପୁର ଜିଲା ବରୀ ଶିକ୍ଷା ମଣ୍ଡଳ ଅଧୀନରେ ଥିବା ବରୀ ପଞ୍ଚାୟତର ଜଲ୍ଲାଲଉଦ୍ଦିନ ଉର୍ଦ୍ଦୁ ଉଚ୍ଚ ପ୍ରାଥମିକ ବିଦ୍ୟାଳୟକୁ ଛାତ୍ରୀଛାତ୍ର ଶିକ୍ଷା ଗ୍ରହଣ କରିବାକୁ ଆସୁଛନ୍ତି। ମାତ୍ର ଶିକ୍ଷୟିତ୍ରୀଶିକ୍ଷକ ଆସୁନାହାନ୍ତି। ଫଳରେ ପିଲାଙ୍କ ପାଠ ପଢାରେ ବ୍ୟାଘତ ସୃଷ୍ଟି ହେଉଛି। ପିଲାମାନେ ନିରାଶ ହୋଇ ଘରକୁ ଫେରି ଯାଉଛନ୍ତି ବୋଲି ସରପଞ୍ଚ ସୋନାଲି ସିଂ ଅଭିଯୋଗ କରିଛନ୍ତି।
ଉକ୍ତ ବିଦ୍ୟାଳୟରେ ୬ ଜଣ ଶିକ୍ଷୟିତ୍ରୀଶିକ୍ଷକ ନିଯୁକ୍ତି ପାଇଛନ୍ତି। ଏହା ଊର୍ଦ୍ଦୁ ବିଦ୍ୟାଳୟ ହୋଇଥିବାରୁ ପ୍ରତ୍ୟେକ ଶୁକ୍ରବାର ବନ୍ଦ ରହିବାର ନିୟମ ରହିଛି। ବରୀ ଶିକ୍ଷା ମଣ୍ଡଳ ଅଧୀନସ୍ଥ ଅନ୍ୟ ବିଦ୍ୟାଳୟ ସହ ଶିକ୍ଷାମଣ୍ଡଳ କାର୍ଯ୍ୟାଳୟ ରବିବାର ବନ୍ଦ ରହିଥାଏ। ମାତ୍ର ଉକ୍ତ ବିଦ୍ୟାଳୟଟି ରବିବାର ଖୋଲା ରହିବାର ସରକାରୀ ନିୟମ ରହିଛି। ଏହି ଶିକ୍ଷାମଣ୍ଡଳର ଅଧିକାରୀମାନେ ସରକାରୀ ଛୁଟି ଦିବସ ଥିବାରୁ ଅନୁପସ୍ଥିତ ରହୁଥିବାରୁ ଏହାର ସୁଯୋଗ ନେଇ ଉକ୍ତ ବିଦ୍ୟାଳୟର ଶିକ୍ଷୟିତ୍ରୀଶିକ୍ଷକ ଅନୁପସ୍ଥିତ ରହୁଛନ୍ତି।
ସୂଚନା ମୁତାବକ, ଉକ୍ତ ବିଦ୍ୟାଳୟର ଜଣେ ଶିକ୍ଷୟିତ୍ରୀ ପ୍ରସୂତିକାଳୀନ ଛୁଟିରେ ଥିବା ବେଳେ ଅନ୍ୟ ୫ଜଣ ଶିକ୍ଷୟିତ୍ରୀଶିକ୍ଷକ ଅନୁପସ୍ଥିତ ରହିବା ଛାତ୍ରୀଛାତ୍ର ଓ ଅଭିଭାବକ ସହଜେ ଗ୍ରହଣ କରିପାରୁନାହାନ୍ତି। ବରୀ ଶିକ୍ଷା ମଣ୍ଡଳ ଅଧିକାରୀଙ୍କ କାର୍ଯ୍ୟାଳୟଠାରୁ ଏହି ବିଦ୍ୟାଳୟର ଦୂରତା ୫ ଶହ ମିଟର। ହେଲେ ଶିକ୍ଷା ଅଧିକାରୀ ଏଥିପ୍ରତି ଦୃଷ୍ଟି ନ ଦେବା ପରିତାପର ବିଷୟ ବୋଲି ଅଭିଭାବକ ଅଭିଯୋଗ କରିଛନ୍ତି। ଏ ସମ୍ପର୍କରେ ବିଦ୍ୟାଳୟ ଦାୟିତ୍ୱରେ ଥିବା ସିଆର୍ସିସି ପ୍ରସନ୍ନ ଷଡ଼ଙ୍ଗୀଙ୍କୁ ପଚାରିବାରେ, ସରପଞ୍ଚ ସିଂ ଫୋନ୍ ଯୋଗେ ଅଭିଯୋଗ କରିଛନ୍ତି। ଘଟଣାସ୍ଥଳକୁ ଯାଇ ଅଭିଯୋଗ ମୁତାବକ ସତ୍ୟତା ଅନୁଭବ କରିଛି। ଅନୁପସ୍ଥିତ ଥିବା ଶିକ୍ଷୟିତ୍ରୀଶିକ୍ଷକଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନିମନ୍ତେ ବ୍ଲକ ଶିକ୍ଷା ଅଧିକାରୀଙ୍କୁ ଲିଖିତ ଭାବେ ଜଣାଇଛି ବୋଲି ସେ କହିଛନ୍ତି।
