ନୂଆଦିଲ୍ଲୀ: ସବୁ ବର୍ଗର ଋଣ ଉପରେ ସୁଧ ଛାଡ ପ୍ରସଙ୍ଗରେ କେନ୍ଦ୍ର ସରକାର ମଙ୍ଗଳବାର ସୁପ୍ରିମକୋର୍ଟଙ୍କ ନିକଟରେ ପକ୍ଷ ରଖିଛନ୍ତି। ସବୁ ବର୍ଗର ଋଣ ଏବଂ ଅଗ୍ରୀମ ଉପରେ ଯଦି ସୁଧ ଛାଡ ହୁଏ ତେବେ ଏଥି ଲାଗି ୬ ଲକ୍ଷ କୋଟି ଟଙ୍କା ଭରଣା କରିବାକୁ ହେବ ବୋଲି ସରକାର କହିଛନ୍ତି। ସୂଚନା ଯୋଗ୍ୟ, ଋଣ କିସ୍ତି ଉପରେ ଲୋକଙ୍କୁ ଆଶ୍ୱସ୍ତି ପ୍ରଦାନ କରିବା ଲାଗି ସରକାର ମୋରାଟୋରିୟମ ସୁବିଧା ଘୋଷଣା କରିଥିଲେ। ମୋରାଟୋରିୟମ ବେଳେ କିଛି ବ୍ୟାଙ୍କ ସୁଧ ଉପରେ ସୁଧ ଲାଗୁ କରିବା ଦେଖାଯାଇଥିଲା। ମାମଲା ସୁପ୍ରିମକୋର୍ଟରେ ପହଞ୍ଚିବା ପରେ ସରକାର କିଛି ନିର୍ଦ୍ଦିଷ୍ଟ ବର୍ଗ ଋଣ ଉପରେ ସୁଧ ହାର ବହନ କରିବାକୁ ରାଜି ହୋଇଛନ୍ତି। ହେଲେ ସବୁ ବର୍ଗ ଋଣ ଉପରେ ସୁଧ ଛାଡ କଲେ କିଭଳି ସମସ୍ୟା ଉପୁଜିବ ସେ ଉପରେ ସରକାର ମଙ୍ଗଳବାର ପକ୍ଷ ସ୍ପଷ୍ଟ କରିଛନ୍ତି। ଯଦି ବ୍ୟାଙ୍କଗୁଡିକ ଏଭଳି ବୃହତ୍ ପରିମାଣର ଅର୍ଥ ଛାଡ କରନ୍ତି ତେବେ ସେମାନଙ୍କୁ ବଡ ବୋଝ ପଡିଯିବ। ବ୍ୟାଙ୍କଗୁଡିକର ମୋଟ ସମ୍ପତ୍ତିର ବଡ ଭାଗ ହରାଇବାକୁ ପଡିବ। ଜଷ୍ଟିସ ଅଶୋକ ଭୂଷଣ, ଜଷ୍ଟିସ ଆର୍.ଏସ୍. ରେଡି ଏବଂ ଜଷ୍ଟିସ ଏମ୍.ଆର୍.ଶାହାଙ୍କୁ ନେଇ ଗଠିତ ଖଣ୍ଡପୀଠ ଏହି ମାମଲାର ଶୁଣାଣି କରୁଛନ୍ତି। ସଲିସିଟର ଜେନେରାଲ ତୁଷାର ମେହେଟ୍ଟା କେନ୍ଦ୍ର ସରକାରଙ୍କ ପକ୍ଷରୁ ପକ୍ଷ ରଖି କହିଛନ୍ତି ଯେ,ଏଭଳି ପ୍ରମୁଖ କାରଣ ଲାଗି କେନ୍ଦ୍ର ସରକାର ସବୁ ବର୍ଗର ଋଣ ଉପରେ ସୁଧ ଛାଡ କରିବାକୁ ନିଷ୍ପତ୍ତି ନେଲେ ନାହିଁ। କେବଳ କିସ୍ତି ପ୍ରଦାନରେ କିଛିଟା ଆଶ୍ୱସ୍ତି ଦିଆଗଲା।
