ନୂଆଦିଲ୍ଲୀ: ଘର ମାଲିକ ଏବଂ ଭଡ଼ାଟିଆଙ୍କ ମଧ୍ୟରେ କୌଣସି ବିବାଦ ରହିଥିଲେ ଏହାର ସମାଧାନ ଲାଗି ଆଉ କୋର୍ଟ ଚକ୍କର ଚଲାଇବାକୁ ପଡିବ ନାହିଁ। ଆର୍ବିଟ୍ରେଶନ ବା ମଧ୍ୟସ୍ଥତା ଜରିଆରେ ଏହି ମାମଲାଗୁଡ଼ିକର ସମାଧାନ କରାଯାଇପାରିବ। ଅତ୍ୟଧିକ ଖର୍ଚ୍ଚ ଏବଂ ଲମ୍ବା ସମୟ ଯାଏ ଏଥିପାଇଁ ଆଉ ଅପେକ୍ଷା କରିବାକୁ ପଡିବ ନାହିଁ। ଟ୍ରାନ୍ସଫର ଅଫ୍ ପ୍ରପର୍ଟି ଆଇନ ଅନୁସାରେ ସୁପ୍ରିମକୋର୍ଟ ଏଭଳି ଏକ ପ୍ରସଙ୍ଗ ଉପରେ ପକ୍ଷ ସ୍ପଷ୍ଟ କରିଛନ୍ତି। ସର୍ବୋଚ୍ଚ ଅଦାଲତଙ୍କ କହିବା ଅନୁସାରେ, ଆର୍ବିଟ୍ରାଲ ଟ୍ରିବ୍ୟୁନାଲଙ୍କ ନିକଟରେ ଟ୍ରାନ୍ସଫର ଅଫ୍ ପ୍ରପର୍ଟି ଆକ୍ଟ ୧୮୮୨ ଅଧୀନରେ ଆସୁଥିବା ବିବାଦଗୁଡିକର ସମାଧାନ ବିଚାର କରିବାର ଅଧିକାର ରହିଛି। ରାଜ୍ୟ ସ୍ତରରେ ଲାଗୁ ହେଉଥିବା ଭଡ଼ା ନିୟନ୍ତ୍ରଣ ଆଇନ ଅଧୀନରେ ଆସୁଥିବା ବିବାଦ ଆର୍ବିଟ୍ରେଶନକୁ ପଠାଯାଇପାରିବ ନାହିଁ। ଏହାର ନିଷ୍ପତ୍ତି ଆଇନ ଅନୁସାରେ କୋର୍ଟ କିମ୍ବା ଫୋରମ କରିବେ। ଜଷ୍ଟିସ ଏନ୍.ବି. ରମନ୍ନାଙ୍କ ଖଣ୍ଡପୀଠ ୧୪ ଡିସେମ୍ବରରେ ବିଦ୍ୟା ଡ୍ରୋଲିଆ ବନାମ ଦୁର୍ଗା ଟ୍ରେଡିଂ କର୍ପୋରେଶନ ମାମଲା ଉପରେ ଶୁଣାଣି କରିଛନ୍ତି। କେଉଁ ବିବାଦଗୁଡିକ ମଧ୍ୟସ୍ଥତା ଦ୍ୱାରା ଫଇସଲା ହେବ ସେ ନେଇ କୋର୍ଟ ପକ୍ଷ ସ୍ପଷ୍ଟ କରିଛନ୍ତି। ସରକାର ବର୍ତ୍ତମାନ ରିଟେଲ ହାଉସିଂ ଉପରେ ଏବେ ଜୋର ଦେଉଛନ୍ତି। ନିୟମ କୋହଳ ଉପରେ ମଧ୍ୟ ଗୁରୁତ୍ୱ ଦିଆଯାଉଛି। ଏଭଳି ସ୍ଥିତିରେ ସୁପ୍ରିମକୋର୍ଟଙ୍କ ନିଷ୍ପତ୍ତି ଗୁରୁତ୍ୱ ବହନ କରୁଛି। ସୁପ୍ରିମକୋର୍ଟ ପୁଣି କହିଛନ୍ତି, ମଧ୍ୟସ୍ଥତା ମଞ୍ଚର ନିଷ୍ପତ୍ତି କୋର୍ଟଙ୍କ ନିଷ୍ପତ୍ତି ଭଳି ଲାଗୁ କରାଯିବ।
