ଢେଙ୍କାନାଳ ଅଫିସ,୧୭।୧: ଓଡ଼ିଶାର ଦ୍ୱିତୀୟ ବୃହତ୍ତମ ନଦୀ ବ୍ରାହ୍ମଣୀରେ ହେବ ରାଷ୍ଟ୍ରୀୟ ଜଳମାର୍ଗ। ଶିଳ୍ପାୟନରେ ପ୍ରମୁଖ ଭୂମିକା ଗ୍ରହଣ କରିଥିବା ଏହି ନଦୀରେ ଚଳାଚଳ କରିବ ପଣ୍ୟବାହୀ ଜାହାଜ। ଅନୁଗୋଳ-ଢେଙ୍କାନାଳ-ଯାଜପୁର ଭଳି ଶିଳ୍ପସମୃଦ୍ଧ ଜିଲାରୁ )ସାମଗ୍ରୀ ପରିବହନ ସୁବିଧାରେ କରିହେବ। କୃଷି, ପର୍ଯ୍ୟଟନ, ଶିଳ୍ପାନୁଷ୍ଠାନଗୁଡ଼ିକର ବିକାଶ ସାଙ୍ଗକୁ ପରିବେଶଜନିତ କ୍ଷତିକୁ ବହୁ ପରିମାଣରେ କମାଯାଇପାରିବ। ହେଲେ ଏହା ଏତେ ସହଜ ନୁହେଁ। କାରଣ ଅଗଭୀର ନଦୀ ଏବଂ ପୂର୍ବରୁ କମ୍ ଉଚ୍ଚତାରେ ନିର୍ମିତ ସେତୁ ଜାହାଜ ଚଳାଚଳରେ ପ୍ରତିବନ୍ଧକ ସାଜିବ। ତେଣୁ କେନ୍ଦ୍ର ସରକାରଙ୍କ ରାଷ୍ଟ୍ରୀୟ ଜଳମାର୍ଗ ବିଭାଗର ମାର୍ଗଦର୍ଶିକା ଅନୁଯାୟୀ ସମସ୍ୟା ଦୂରୀକରଣ ପାଇଁ ଉଦ୍ୟମ ଆରମ୍ଭ ହୋଇଛି। ପ୍ରକଳ୍ପ ଲାଗି ଯେଉଁସବୁ ଆନୁଷଙ୍ଗିକ ଭିତ୍ତିଭୂମି ଆବଶ୍ୟକ, ସେସବୁର କାର୍ଯ୍ୟ ତ୍ୱରାନ୍ବିତ କରାଯାଉଛି। ବିଶେଷକରି ନିର୍ମାଣାଧୀନ, ପ୍ରସ୍ତାବିତ ଏବଂ ପୁରୁଣା ସମସ୍ତ ସେତୁଗୁଡ଼ିକୁ ଅଧିକ ଉଚ୍ଚତାବିଶିଷ୍ଟ କରାଯିବାକୁ ଅଗ୍ରାଧିକାର ଦିଆଯାଉଛି।
ପ୍ରଥମ ପର୍ଯ୍ୟାୟରେ ଅନୁଗୋଳ ଜିଲା ସମଲ ବ୍ୟାରେଜଠାରୁ ଢେଙ୍କାନାଳ ଦେଇ ପାରାଦୀପ ଏବଂ ଧାମରା ଯାଏ ବ୍ରାହ୍ମଣୀ ନଦୀରେ ଜଳମାର୍ଗ କାର୍ଯ୍ୟକ୍ଷମ ହେବ। ପଣ୍ୟବାହୀ ଜାହାଜ ଯେପରି ବିନା ବାଧାରେ ଚଳପ୍ରଚଳ କରିପାରିବ, ସେଥିଲାଗି ନୂଆ ମାର୍ଗଦର୍ଶିକା ଅନୁଯାୟୀ ପ୍ରକଳ୍ପ କାର୍ଯ୍ୟ ଆଗେଇ ଚାଲିଛି। ଏହିକ୍ରମରେ ଯୋରନ୍ଦା-କାଲୁରିଆ-ଗୋରଡ଼ିଆକୁ ସଂଯୋଗ କରୁଥିବା ନିର୍ମାଣାଧୀନ ବ୍ରିଜ୍ର ଉଚ୍ଚତା ୯ ମିଟର ଏବଂ ଚଉଡ଼ା ୬୨.୦୭ ମିଟର ବିଶିଷ୍ଟ କରାଯାଉଛି। ସେତୁର ଉଭୟ ପାର୍ଶ୍ୱରେ ୧୮୫ ମିଟର ବିଶିଷ୍ଟ ଦୁଇଟି ଆପ୍ରୋଚ ରୋଡ୍ ନିର୍ମାଣ କରାଯିବ। ଏସବୁ କାର୍ଯ୍ୟ ଲାଗି ୨୦୫ କୋଟି ଟଙ୍କା ବ୍ୟୟ ଅଟକଳ ହୋଇଛି। ୧,୮୬୨.୧୦ ମିଟର ଦୀର୍ଘ ଏହି ସେତୁର ନିର୍ମାଣ କାର୍ଯ୍ୟ ୨୦୧୯ ମାର୍ଚ୍ଚ ୬ରୁ ଆରମ୍ଭ ହୋଇଛି। ୨୦୨୧ ସେପ୍ଟେମ୍ବର ୫ରେ ଏହା ସମ୍ପୂର୍ଣ୍ଣ ହେବା କଥା। ହେଲେ କରୋନା ସଂକ୍ରମଣ କାରଣରୁ ନିର୍ମାଣ କାର୍ଯ୍ୟ ପ୍ରଭାବିତ ହୋଇଛି। ଏହି ସେତୁ କାର୍ଯ୍ୟକ୍ଷମ ହେଲେ ଢେଙ୍କାନାଳରୁ ମହିମାଗାଦି ଯୋରନ୍ଦା ଏବଂ କାଲୁରିଆ ଦେଇ କାମାକ୍ଷାନଗର ଉପଖଣ୍ଡ ଅଧୀନ ଭୁବନ ସମେତ ଗୋରଡିଆ, ଦିଘି, ମଠକରଗୋଳାକୁ ଗମନାଗମନ ସୁଗମ ହେବ।
ପରଜଙ୍ଗ ବ୍ଲକର ବଡ଼କମର ଏବଂ ଓଡ଼ାପଡ଼ା ବ୍ଲକର ଖଡଗ୍ପ୍ରସାଦ ମଧ୍ୟରେ ଅନୁରୂପ ଅନ୍ୟ ଏକ ସେତୁ ନିର୍ମାଣ ହେବ। ଏଥିଲାଗି ଗତ ଡିସେମ୍ବର ୨୫ରେ ଶିଳାନ୍ୟାସ ହୋଇଛି। ଏଥିପାଇଁ ୧୧୪ କୋଟି ୯୨ ଲକ୍ଷ ଟଙ୍କା ବ୍ୟୟ ଅଟକଳ ହୋଇଛି। ୧,୧୭୯ ମିଟର ଦୀର୍ଘ ଏହି ସେତୁ ନିର୍ମାଣ କାର୍ଯ୍ୟ ଅଢ଼େଇ ବର୍ଷ ମଧ୍ୟରେ ଶେଷ କରାଯିବାକୁ ଲକ୍ଷ୍ୟ ରଖାଯାଇଛି। ସେହିପରି ପରଜଙ୍ଗ ବ୍ଲକ ସରାଙ୍ଗ ଏବଂ ତାଳଚେର ବ୍ଲକର ବହ୍ଲର ମଧ୍ୟରେ ଜାତୀୟ ରାଜପଥ ପ୍ରାଧିକରଣ ପକ୍ଷରୁ ଅନ୍ୟ ଏକ ସେତୁ ନିର୍ମାଣ କରାଯିବାକୁ ଯୋଜନା ରହିଛି। ଢେଙ୍କାନାଳ-କାମାକ୍ଷାନଗର ସାରଙ୍ଗଧର ସେତୁ ଏବଂ ଢେଙ୍କାନାଳ-ଭୁବନ ବାଜି ରାଉତ ସେତୁକୁ ମଧ୍ୟ ମାର୍ଗଦର୍ଶିକା ଅନୁଯାୟୀ ଅଧିକ ଉଚ୍ଚତା ବିଶିଷ୍ଟ କରାଯିବ। ବର୍ତ୍ତମାନ ଉଭୟ ସେତୁର ଉଚ୍ଚତା ୬ ମିଟର ଏବଂ ଚଉଡ଼ା ୩୫ ମିଟର ରହିଛି। ଏ ସଂକ୍ରାନ୍ତରେ ଢେଙ୍କାନାଳ ପୂର୍ତ୍ତ ବିଭାଗ ଅଧୀକ୍ଷଣ ଯନ୍ତ୍ରୀ ମନୋରଞ୍ଜନ ବିଶ୍ୱାଳ କୁହନ୍ତି, ଏଣିକି ବ୍ରାହ୍ମଣୀ ନଦୀ ଉପରେ ସେତୁ ନିର୍ମାଣ ଲାଗି ରାଷ୍ଟ୍ରୀୟ ଜଳମାର୍ଗ ବିଭାଗର ଅନୁମୋଦନ ବାଧ୍ୟତାମୂଳକ। ମାର୍ଗଦର୍ଶିକା ଅନୁଯାୟୀ, ପ୍ରସ୍ତାବିତ ସେତୁ ନିର୍ମାଣ କାର୍ଯ୍ୟ ଆଗେଇ ଚାଲିଛି ଏବଂ ଅଧିକ ଉଚ୍ଚତା ବିଶିଷ୍ଟ କରାଯାଉଥିବା ସେ ସୂଚନା ଦେଇଛନ୍ତି।
ସୂଚନାଯୋଗ୍ୟ, ଜଳପଥରେ ସୁବିଧାରେ ମାଲ୍ ପରିବହନ ଲାଗି ଓଡ଼ିଶାରେ ୫୦୦୦ କୋଟି ଟଙ୍କା ବ୍ୟୟରେ ଏହି ବୃହତ୍ ପ୍ରକଳ୍ପ କରାଯାଉଥିବା ୨୦୧୯ ଫେବୃୟାରୀ ୬ରେ ୫୩ନଂ. ଜାତୀୟ ରାଜପଥ ଉନ୍ନତୀକରଣ କାର୍ଯ୍ୟର ଭିତ୍ତିପ୍ରସ୍ତର ସ୍ଥାପନ କରିବାକୁ କାମାକ୍ଷାନଗର ଆସିଥିବା ବେଳେ କେନ୍ଦ୍ରମନ୍ତ୍ରୀ ନିତୀନ ଗଡ଼କରୀ ସୂଚନା ଦେଇଥିଲେ। ପ୍ରକଳ୍ପ ତୁରନ୍ତ କାର୍ଯ୍ୟକ୍ଷମ କରିବା ପାଇଁ କେନ୍ଦ୍ର ସରକାରଙ୍କୁ ପତ୍ର ଲେଖାଯାଇଥିବା ରାଜ୍ୟ ଖଣି ଓ ପୂର୍ତ୍ତ ବିଭାଗ ମନ୍ତ୍ରୀ ପ୍ରଫୁଲ୍ଲ ମଲ୍ଲିକ ଗତବର୍ଷ ଜୁଲାଇରେ କହିଥିଲେ।
ରତନ ନାୟାର
