ଛେଣ୍ଡିପଦା,୪।୧୧(ସ୍ବ.ପ୍ର.) ଦୀର୍ଘବର୍ଷ ହେଲା ମରାମତି ହୋଇନି ଦୁଇ ଜିଲାର ସୀମାନ୍ତ ରାସ୍ତା। ଫଳରେ କେଉଁସ୍ଥାନରେ ଏହା ଦବି ଯାଇଛି ତ ଆଉ କେଉଁଠି ଲମ୍ବା ଫାଟ ସୃଷ୍ଟି ହୋଇଛି। ବାରମ୍ବାର ଦୃଷ୍ଟି ଆକର୍ଷଣ ପରେ ମଧ୍ୟ ବିଭାଗୀୟ କର୍ତ୍ତୃପକ୍ଷ ଏ ଦିଗରେ ନିଜ ଦାୟିତ୍ୱ ସମ୍ପାଦନ କରୁନାହାନ୍ତି। ଫଳରେ ଶୋଚନୀୟ ହୋଇପଡ଼ିଥିବା ଅନୁଗୋଳ ଜିଲା ଛେଣ୍ଡିପଦା ବ୍ଲକ ଟାଙ୍ଗିରୀଠାରୁ ବାଘୁଆବୋଲ ଗ୍ରାମ୍ୟ ଉନ୍ନୟନ ରାସ୍ତା ଯୋଗୁ ଅସୁବିଧାର ସମ୍ମୁଖୀନ ହେଉଛନ୍ତି ଅନୁଗୋଳ ଓ ଦେବଗଡ଼ ଜିଲାର ୭ ପଞ୍ଚାୟତବାସୀ।
ପ୍ରକାଶ ଯେ, ଛେଣ୍ଡିପଦାର ଟାଙ୍ଗିରୀ ଠାରୁ ଦେବଗଡ ଜିଲାକୁ ଏହି ରାସ୍ତା ସଂଯୋଗ କରୁଛି। ଦେବଗଡର ସଙ୍ଗାପଶି, ଚଢେଇମରା, କୁଣ୍ଢେଇଗୋଳା, ଖିଲବେରେଣୀ ସମେତ ୫ ପଞ୍ଚାୟତ ଏବଂ ଛେଣ୍ଡିପଦାର ଟାଙ୍ଗିରୀ ଓ ପାଟକୁମୁଣ୍ଡା ପଞ୍ଚାୟତ ବାସିନ୍ଦା ଏହା ଉପରେ ସମ୍ପୂର୍ଣ୍ଣ ନିର୍ଭରଶୀଳ। ୨୦୦୩ରେ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ଏହାକୁ ସାମିଲ କରାଯାଇ ୩.୫ କିଲୋମିଟର ପିଚୁ କରାଯାଇଥିଲା। ହେଲେ ମରାମତି ଅଭାବରୁ ଉକ୍ତ ରାସ୍ତା ଶୋଚନୀୟ ହୋଇପଡିଛି। ଟାଙ୍ଗିରୀସ୍ଥିତ ଆଉଁଳୀ ପୋଲ ନିକଟରେ ଏହି ରାସ୍ତା ୩ବର୍ଷ ତଳେ ଦବିଯିବା ସହ ପ୍ରାୟ ୫ ଫୁଟ୍ର ଗର୍ତ୍ତ ସୃଷ୍ଟି ହୋଇଛି। ଫଳରେ ଲୋକେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଏହାକୁ ନେଇ ପାଟକୁମୁଣ୍ଡା, ଭାଲୁଖାଇ, ବାଘୁଆବୋଲ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ସମସ୍ୟା ସମ୍ପର୍କରେ ଛେଣ୍ଡିପଦା ଗ୍ରାମ୍ୟ ଉନ୍ନୟନ ବିଭାଗ କନିଷ୍ଠଯନ୍ତ୍ରୀ ଚିତ୍ତରଞ୍ଜନ ସାହୁ କହିଛନ୍ତି, ରାସ୍ତା ଖରାପ ନେଇ କୌଣସି ଅଭିଯୋଗ ଆସିନାହିଁ। ତଦନ୍ତ ପରେ ମରାମତି କାର୍ଯ୍ୟ କରାଯିବ।
ଦୈନିକ ଦୁର୍ଘଟଣା ଘଟୁଛି
୩ ବର୍ଷ ହେବ ରାସ୍ତା ଦବି ଯାଇଛି। ଏପରି କି ବର୍ଷା ଯୋଗୁ ୩୦ ଫୁଟରୁ ଅଧିକ ଫାଟ ସୃଷ୍ଟି ହୋଇଛି। ଏଠାରେ ଦୈନିକ ଛୋଟବଡ ଦୁର୍ଘଟଣା ଘଟୁଛି। ହେଲେ ମରାମତି ଦିଗରେ ବିଭାଗ ପକ୍ଷରୁ ପଦକ୍ଷେପ ନିଆଯାଉ ନାହିଁ।
-ରମେଶ ଚନ୍ଦ୍ର ପ୍ରଧାନ, ପାଟକମୁଣ୍ଡା
ଲୋକେ ଅସୁବିଧା ଭୋଗୁଛନ୍ତି
ରାସ୍ତାର ଅଧିକାଂଶ ସ୍ଥାନରୁ ପିଚୁ ଉଠି ଖାଲଖମା ହୋଇଯାଇଛି। ଦୀର୍ଘବର୍ଷ ହେଲା ମରାମତି କରାଯାଇ ନ ଥିବାରୁ ଏହା ଉପରେ ନିର୍ଭର କରୁଥିବା ଦୁଇ ଜିଲାବାସୀ ଅସୁବିଧାର ସମ୍ମୁଖୀନ ହେଉଛନ୍ତି।
-ଡିଲେଶ୍ୱର ସ୍ବାଇଁ, ସରପଞ୍ଚ, ପାଟକମୁଣ୍ଡା
ଯଥାଶୀଘ୍ର ମରାମତି କରାଯାଉ
ବକଳା-ନୂଆସାହି ଠାରେ ରାସ୍ତା ଫାଟି ଯାଇଛି। ଖାଲଖମାଗୁଡ଼ିକରେ ବର୍ଷା ପାଣି ଜମି ରହୁଥିବାରୁ ବାଇକ୍ ଚାଳକମାନେ ଦୁର୍ଘଟଣାର ସମ୍ମୁଖୀନ ହେଉଛନ୍ତି। ଗ୍ରାମ୍ୟ ଉନ୍ନୟନ ବିଭାଗ ଯଥାଶୀଘ୍ର ମରାମତି କରୁ।
-ଅମିୟ ଚରଣ ସାହୁ, ପାଟକମୁଣ୍ଡା
