ଅନୁଗୋଳ ଅଫିସ୍, ୧୩ା୭: ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟରେ ଚିକିତ୍ସାଧୀନ ଜଣେ ରୋଗୀଙ୍କ ମୃତ୍ୟୁ ପରେ କରୋନା ସନ୍ଦେହରେ ଦୀର୍ଘ ୧୪ ଘଣ୍ଟା ମୃତଦେହ ପକାଇ ରଖାଯାଇଥିଲା। ରବିବାର ଅପରାହ୍ନ ୪ଟାରେ ସ୍ବାବ୍ ରିପୋର୍ଟ ନେଗେଟିଭ୍ ଆସିବା ପରେ ଶବ ବ୍ୟବଚ୍ଛେଦ କରାଯାଇ ହସ୍ତାନ୍ତର କରାଯାଇଥିଲା। ମେଡିକାଲ କର୍ତ୍ତୃପକ୍ଷଙ୍କ ଏପରି କାର୍ଯ୍ୟକୁ ନେଇ ମୃତକଙ୍କ ପରିବାର ଲୋକେ ଅସନ୍ତୋଷ ପ୍ରକାଶ କରିଛନ୍ତି।
ପ୍ରକାଶ ଯେ, ହୁଲୁରୁସିଂହା ଅଞ୍ଚଳର ସୁଦର୍ଶନ ବାରିକ(୬୫) ଗତମାସ ୨୬ ତାରିଖରେ ଦୁର୍ଘଟଣାରେ ଗୁରୁତର ହୋଇ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିଲେ। ସେଠାରୁ ତାଙ୍କୁ କଟକ ପଠାଇ ଦିଆଯାଇଥିଲା। ତେବେ କଟକ ବଡ଼ ମେଡିକାଲରେ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ୁଥିବା ଦେଖି ଡାକ୍ତର ଗତ ୬ ତାରିଖରେ ସୁଦର୍ଶନଙ୍କୁ ଅନୁଗୋଳ ମେଡିକାଲ ଫେରାଇ ଦେଇଥିଲେ। କଟକରୁ ଆସି ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟରେ ପହଞ୍ଚିବା ପରେ ତାଙ୍କୁ ଅସ୍ଥିଶଲ୍ୟ ବିଭାଗରେ ଆଡମିଶନ କରାଯାଇଥିଲା। ପରଦିନ କରୋନା ଆଇସୋଲେଶନ୍ ୱାର୍ଡକୁ ସ୍ଥାନାନ୍ତର କରାଯାଇଥିଲା। ୮ ତାରିଖରେ ତାଙ୍କ ସ୍ବାବ୍ ସଂଗ୍ରହ କରାଯାଇଥିଲେ ହେଁ ୧୧ ତାରିଖ ଯାଏ ରିପୋର୍ଟ ଆସି ନ ଥିଲା। ତେବେ ଶନିବାର ବିଳମ୍ବିତ ରାତିରେ ସୁଦର୍ଶନଙ୍କ ମୃତ୍ୟୁ ହୋଇଯାଇଥିଲା। ରିପୋର୍ଟ ଆସି ନ ଥିବାରୁ ମୃତଦେହ ଶବାଗାରକୁ ସ୍ଥାନାନ୍ତର କରାଯାଇ ନ ଥିଲା କି ରବିବାର ସକାଳେ ବ୍ୟବଚ୍ଛେଦ ହୋଇ ନ ଥିଲା। ଦୀର୍ଘ ୧୪ ଘଣ୍ଟା ଧରି ଓ୍ବାର୍ଡ ମଧ୍ୟରେ ମୃତଦେହ ପକାଇ ରଖାଯାଇଥିବାରୁ ପରିବାର ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ସୃଷ୍ଟି ହୋଇଥିଲା। ଠିକ୍ ଭାବେ ଚିକିତ୍ସା କରା ନ ଯିବାରୁ ସୁଦର୍ଶନଙ୍କ ମୃତ୍ୟୁ ହୋଇଥିବା ପୁଅ ଦିଲୀପ ବାରିକ ଅଭିଯୋଗ କରିବା ସହ ୩ ଦିନ ହେଲା କାହିଁକି ରିପୋର୍ଟ ଆସୁନାହିଁ ବୋଲି ପ୍ରଶ୍ନ କରିଥିଲେ। ତେବେ ଅପରାହ୍ନ ୪ଟାରେ ରିପୋର୍ଟ ନେଗେଟିଭ୍ ଆସିବା ପରେ ମୃତଦେହ ବ୍ୟବଚ୍ଛେଦ କରାଯାଇଥିଲା। ଏ ସମ୍ପର୍କରେ ଜିଲା ମୁଖ୍ୟ ଚିକିତ୍ସା ଅଧିକାରୀ (ସିଡିଏମ୍ଓ) ଅଭୟ କୁମାର ଦାଶ କହିଛନ୍ତି, ୮ ତାରିଖରେ ସ୍ବାବ୍ ସଂଗ୍ରହ କରାଯାଇ ୯ ତାରିଖରେ ପରୀକ୍ଷା ପାଇଁ ପଠାଯାଇଥିଲା। କିନ୍ତୁ ପରୀକ୍ଷା କେନ୍ଦ୍ର ସାନିଟାଇଜ୍ କରାଯାଉଥିବାରୁ ରିପୋର୍ଟ ଆସି ନ ଥିଲା। ସେଥିପାଇଁ ବ୍ୟବଚ୍ଛେଦ ବିଳମ୍ବ ହୋଇଥିବା ସିଡିଏମ୍ଓ ପ୍ରକାଶ କରିଛନ୍ତି।
