ବାରିପଦା ଅଫିସ,୧୭ା୯-ମୟୂରଭଞ୍ଜ ଜିଲା ରାସଗୋବିନ୍ଦପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସାଧୀନ ଜଣେ ବ୍ୟକ୍ତିଙ୍କ ମୃତ୍ୟୁ ପରେ ପରିବାର ଲୋକେ ଟ୍ରଲିରେ ମୃତଦେହକୁ ବୋହି ନେଉଥିବା ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ସରକାରଙ୍କ ପକ୍ଷରୁ ମହାପ୍ରୟାଣ ଯୋଜନା କିପରି ଜିଲାରେ କାର୍ଯ୍ୟକାରୀ ହେଉଛି ତାର ବାସ୍ତବଚିତ୍ର ଦେଖିବାକୁ ମିଳିଛି। ରାସଗୋବିନ୍ଦପୁର ବ୍ଲକ ସାରୁମୁଳା ପଞ୍ଚାୟତ ଗୋବରା ଗ୍ରାମର ଦୁଃଖି ମାରାଣ୍ଡି(୪୬)ଙ୍କ ସ୍ଥାନୀୟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ମଙ୍ଗଳବାର ରାତି ୮ଟାରେ ମୃତ୍ୟୁ ଘଟିଥିଲା। ବୁଧବାର ସକାଳୁ ଦୁଃଖିଙ୍କ ମୃତଦେହକୁ ଧରି ତାଙ୍କ ସ୍ତ୍ରୀ ଏକ ଟ୍ରଲି ଯୋଗେ ଘରକୁ ନେବା ବେଳେ ସ୍ଥାନୀୟ ଲୋକେ ଏହାର ଭିଡିଓ ଉତ୍ତୋଳନ କରି ସୋସିଆଲ ମିଡିଆରେ ଭାଇରାଲ କରିଥିଲେ।
ଡାକ୍ତରଖାନା ପକ୍ଷରୁ କୌଣସି ସୁବିଧା କରାଯାଇ ନ ଥିବାରୁ ୮ ଶହ ଟଙ୍କା ଖର୍ଚ୍ଚ କରି ଏକ ଟ୍ରଲି ଯୋଗେ ୫ କି.ମି ଦୂର ଘରକୁ ଆଣିଥିଲେ ବୋଲି ମୃତକଙ୍କ ସମ୍ପର୍କୀୟ ଗଜେନ୍ଦ୍ର ମାରାଣ୍ଡି ପ୍ରକାଶ କରିଛନ୍ତି। ଏ ସଂକ୍ରାନ୍ତରେ ଭାରପ୍ରାପ୍ତ ଚିକିତ୍ସାଧିକାରୀ ଦେବାଶିଷ ପଟ୍ଟନାୟକ କୁହନ୍ତି, ବୁଧବାର ସକାଳେ ଗାଡ଼ି ବ୍ୟବସ୍ଥା କରାଯାଇ ମୃତଦେହକୁ ପଠାଯିବ ବୋଲି ମୃତକଙ୍କ ସ୍ତ୍ରୀଙ୍କୁ କୁହାଯାଇଥିଲା। ମାତ୍ର ତରବରିଆ ଭାବେ ସେ କାହାକୁ ନ ଜଣାଇ ମୃତଦେହକୁ ଧରି ପଳାଇଥିଲେ। ଆବଶ୍ୟକ ପଡ଼ିଲେ ଏ ସମ୍ପର୍କରେ ସେ ପୋଲିସକୁ ଜଣାଇବେ ବୋଲି କହିଛନ୍ତି।
