ମହୁମାଛି ପ୍ରାୟତଃ ଦେଖିଥିବେ। ଏହାର ବସାରେ ଯଦି ଥରେ କୌଣସି ଆଘାତ ଲାଗିଲା ତେବେ ଏମାନେ ଗୋଡ଼ାଇ ଗୋଡ଼ାଇ ଆକ୍ରମଣ କରିଥାନ୍ତି। ଅନେକ ସ୍ଥାନରେ ମହୁମାଛି ଆକ୍ରମଣରେ ଲୋକେ ମରୁଥିବାର ମଧ୍ୟ ଖବର ଜାଣିବାକୁ ମିଳିଥାଏ। ଆଜି ହେଉଛି ବିଶ୍ୱ ମହୁମାଛି ଦିବସ। ତେବେ ଆଜିର ଏହି ସ୍ବତନ୍ତ୍ର ଦିନରେ ମହୁମାଛି ବିଷୟରେ ଜାଣନ୍ତୁ କିଛି ରୋଚକ କଥା…
ସାଧାରଣତଃ ମହୁମାଛି ଗଛରେ ବସା କରିଥାନ୍ତି। ମାତ୍ର ଥରେ ଭାବିଲେ ଯଦି ବେଡ୍ରୁମ୍ରେ ଏହି ବସା ରହିଥାଏ ତେବେ ଲୋକେ ଶୋଇବେ କିପରି। କିନ୍ତୁ ଇଟାଲୀର ଏକ ଘରେ ମହୁମାଛି ବସା ରହିଛି। ଏହି ସ୍ଥାନ ସ୍ବତନ୍ତ୍ର ଭାବରେ ପ୍ରସ୍ତୁତ ହୋଇଛି। ପ୍ରକୃତି ନିକଟରେ ଯଦି କିଛି ସମୟ ବିତାଇବାକୁ ଇଚ୍ଛା ଥାଏ ତେବେ ଏଠାରେ ମହୁମାଛିର ଗୁଣୁଗୁଣୁ ଶବ୍ଦ ଏଥିରୁ ବେଶ୍ ଆନନ୍ଦ ଦେଇଥାଏ। ଏହି ସ୍ଥାନର ନାମ ହେଉଛି ଓ୍ବାଣ୍ଡର ବି ଆଣ୍ଡ୍ ବି।
ଯେଉଁ ମହୁମାଛି ଦେଖି ଲୋକଙ୍କ ଲୋମ ଟାଙ୍କୁରି ଉଠେ ସେହି ମହୁମାଛିକୁ ଜାଣିଶୁଣି ବେଡ୍ରୁମ୍ରେ ରଖାଯାଇଛି। ଏହି ଘରେ ୧୦ ଲକ୍ଷରୁ ଅଧିକ ମହୁମାଛି ବାସ କରନ୍ତି। ଓ୍ବାଣ୍ଡର ମହୁମାଛି କାନ୍ଥ ଏବଂ କ୍ୟାବିନ ମଧ୍ୟରେ ରହିଛନ୍ତି। ଏହି ଘରଟି ମାଲିକ ରୋକୋ ଫିଲୋମେନୋଙ୍କ ଦ୍ୱାରା ନିର୍ମିତ ହୋଇଛି।
ସମୁଦାୟ ୧୩ ଲକ୍ଷ ଟଙ୍କା ଖର୍ଚ୍ଚ କରି ରୋକୋ ଏହାକୁ ତିଆରି କରିଛନ୍ତି। ଏଠାରେ ଗୋଟିଏ ବେଡ୍ରୁମ୍ ଅଛି, ଯେଉଁଥିରେ ୨ ଜଣଙ୍କ ପାଇଁ ରହିବା ସ୍ଥାନ ଅଛି। ପୂରା ଘରେ ସମୁଦାୟ ୯ଟି ମହୁଫେଣା ଅଛି, ଯେଉଁଥିରେ ୧୦ ଲକ୍ଷ ମହୁମାଛି ରହୁଛନ୍ତି। ଯେହେତୁ ମହୁମାଛି ବାହାରେ ଏକ ନେଟ୍ ଲାଗିଛି ତେଣୁ ସେମାନେ ଲୋକଙ୍କର କିଛି କ୍ଷତି କରନ୍ତି ନାହିଁ। ଏହି ଘରେ ଏକ ବାଥରୁମ୍ ଅଛି। ଯଦି ଏହି ଅଞ୍ଚଳରେ ବିଦ୍ୟୁତ୍ ନାହିଁ, ତେବେ ବଲ୍ବଗୁଡିକ ସୋଲାର ଲାଇଟ୍ ଦ୍ୱାରା ଜଳାଯାଏ। ଏଠାରେ ରହିବା ପାଇଁ ଗୋଟିଏ ରାତିକୁ ୧୪ ହଜାର ଟଙ୍କା ଭଡ଼ା ନିଆଯାଏ। କେବଳ ମହୁମାଛିର ଶବ୍ଦ ଶୁଣି ମନରେ ଶାନ୍ତି ପାଇବା ପାଇଁ ଲୋକେ ଏଠାକୁ ଆସିଥାନ୍ତି।
