ମହାକାଳପଡ଼ା,୨୪ା୨(ପ୍ରତାପ ଚନ୍ଦ୍ର ସ୍ବାଇଁ):କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳରେ ସାମୁଦ୍ରିକ ଢେଉ ଯୋଗୁ କାଜୁ ଜଙ୍ଗଲରୁ ୫ ଶହ ଗଛ ମହାନଦୀ ଗର୍ଭରେ ଲୀନ ହୋଇଗଲାଣି। ବ୍ଲକ୍ର ରାମନଗର ୩୫୪ ଏକରରେ ୧୦ ହଜାର ଗଛ, ପିତାପାଟ ୧୮୨ ଏକରରେ ୫ ହଜାର ଗଛ ଓ ବାହାକୁଦ ୨୮୨ ଏକର ଜମିରେ ୧୯୮୦ ଠାରୁ କାଜୁ ନିଗମ ପକ୍ଷରୁ ଚାରା ରୋପଣ କରାଯାଇଥିଲା। ପରେ ପ୍ରତିବର୍ଷ ନିଗମ ପକ୍ଷରୁ ନିଲାମ ପ୍ରକ୍ରିୟା କରାଯାଇ ବହୁ ଲକ୍ଷ ଟଙ୍କା ରାଜସ୍ବ ମିଳୁଥିଲା। କିଛିବର୍ଷ ହେଲା ପାରାଦୀପ ଶିଳ୍ପ କାରଖାନା ଧୂଅଁା, ଗ୍ୟାସ୍ ନିର୍ଗତ ହୋଇ ବାୟୁ ମଣ୍ଡଳ ପ୍ରଭାବିତ ଯୋଗୁ କାଜୁ ଉତ୍ପାଦନ ହ୍ରାସ ପାଉଛି। ଫଳରେ ପୂର୍ବ ଅପେକ୍ଷା ନିଲାମଧାରୀମାନଙ୍କ କ୍ଷତିଗ୍ରସ୍ତ ଯୋଗୁ ନିଲାମରୁ ମୁହଁ ଫେରାଇ ନେଲେଣି ବୋଲି ସ୍ଥାନୀୟ ନିଲାମଧାରୀମାନେ କହିଛନ୍ତି। ଅପରପକ୍ଷରେ ଏହି ୩ ମୌଜାରେ କାଜୁ ଜଙ୍ଗଲ ସୁରକ୍ଷା ପାଇଁ ନିଗମ ପକ୍ଷରୁ ସେଭଳି ଆଖିଦୃଶିଆ ସୁରକ୍ଷା ବ୍ୟବସ୍ଥା କଡାକଡି କରାଯାଉନାହିଁ। ସ୍ଥାନୀୟ ଲୋକମାନେ ଦିନ ଦ୍ୱିପ୍ରହରରେ କାଠ ହାଣି ନେବା ସହ ବହୁ ଶହ ଟ୍ରିପ୍ ବାଲି ଖୋଳି ନେଉଥିବା ନଜରକୁ ଆସୁଛି। ପ୍ରଶାସନ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଉ ନ ଥିବା ଅଭିଯୋଗ ସ୍ଥାନୀୟ ଲୋକମାନେ କରିଛନ୍ତି। ସେହିପରି ମହାନଦୀ ପାଶର୍ବରେ ବାହାକୁଦ କାଜୁ ଜଙ୍ଗଲରେ ୫ ହଜାର କାଜୁ ଗଛ ଥିଲା। ହେଲେ ସାମୁଦ୍ରିକ ଢେଉ ମାଡ଼ରେ ୫ ଶହରୁ ଅଧିକ ଗଛ ମହାନଦୀ ଗର୍ଭକୁ ଚାଲିଗଲାଣି ବୋଲି ପରିବେଶପ୍ରେମୀ ସୁବାସ ସ୍ବାଇଁ କହିଛନ୍ତି। ୨ ବର୍ଷ ହେବ ନିଲାମ ହେଉ ନ ଥିବା ସ୍ଥାନୀୟ ନିଲାମଧାରୀମାନେ ଅଭିଯୋଗ କରିଛନ୍ତି। ଜଙ୍ଗଲରେ ଗଛ ନାହିଁ କି ବଉଳ ଦେଖିବାକୁ ମିଳୁନାହିଁ ବୋଲି ସ୍ଥାନୀୟ ଲୋକମାନେ ଅଭିଯୋଗ କରିଛନ୍ତି। ତେବେ କାଜୁ ନିଗମ ଆଞ୍ଚଳିକ କାର୍ଯ୍ୟାଳୟ ଚଣ୍ଡିଖୋଲ ଥିବାରୁ ଦାୟିତ୍ୱରେ ଥିବା ଅଧିକାରୀଙ୍କ ପ୍ରତିକ୍ରିୟା ମିଳିିପାରିନାହିଁ। ଏ ସମ୍ପର୍କରେ ମହାକାଳପଡ଼ା ତହସିଲଦାର ରବିନାରାୟଣ ଆଚାର୍ଯ୍ୟଙ୍କୁ ପଚାରିବାରେ ମହାନଦୀ ପାର୍ଶ୍ୱ କାଜୁ ଜଙ୍ଗଲ କ୍ଷୟ ହେବା ନେଇ ନଜରକୁ ଆସିଛି। ସ୍ଥାନୀୟ ରାଜସ୍ବ ନିରୀକ୍ଷକଙ୍କୁ ଏହାର ତଦନ୍ତ କରିବାକୁ ନିର୍ଦ୍ଦେଶ ଦିଆଯାଇଛି ବୋଲି ସେ କହିଛନ୍ତି।
Dharitri – Odisha’s No.1 Odia Daily
