ମେଲବୋର୍ନ, ୨୮ା୫ (ପି.ଟି.): ଆସନ୍ତା ମାସରେ ହେବାକୁଥିବା ଟି୨୦ ବିଶ୍ୱକପ୍ ଲାଗି ଅଷ୍ଟ୍ରେଲିଆର ଓ୍ବାର୍ମଅପ୍ ମ୍ୟାଚ ବେଳେ ଦଳରେ ଖେଳାଳି ଅଭାବ ପରିଲକ୍ଷିତ ହେବ। ତେଣୁ ଦଳ ସପୋର୍ଟ ଷ୍ଟାଫ୍ଙ୍କୁ ଫିଲ୍ଡର ଭାବେ ବ୍ୟବହାର କରିବାକୁ ବାଧ୍ୟ ହୋଇପାରେ। ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଏବଂ ଆଇସିସି ଇଭେଣ୍ଟ ମଧ୍ୟରେ ସମୟ ବ୍ୟବଧାନ କମ୍ ରହିଥିବାରୁ ଏହି ପରିସ୍ଥିତି ଉପୁଜିଛି। ଅଷ୍ଟ୍ରେଲିଆ ବୁଧବାର ନାମ୍ବିଆ ଏବଂ ଶୁକ୍ରବାର ଓ୍ବେଷ୍ଟଇଣ୍ଡିଜ ବିପକ୍ଷରେ ଓ୍ବାର୍ମଅପ୍ ଖେଳିବାର କାର୍ଯ୍ୟକ୍ରମ ରହିଛି। ଆଇପିଏଲ୍ ଖେଳୁଥିବା ଅଷ୍ଟ୍ରେଲିଆ ଖେଳାଳିମାନେ ପ୍ଲେ-ଅଫ୍ ପରେ ସାମୟିକ ଛୁଟିରେ ସ୍ବଦେଶ ଫେରିଯାଇଛନ୍ତି। ଦୁଇଟି ଓ୍ବାର୍ମଅପ୍ ମ୍ୟାଚ ପାଇଁ ସମ୍ଭବତଃ ୮ଜଣ ଖେଳାଳି ଉପଲବ୍ଧ ହୋଇପାରନ୍ତି। ଅଧିନାୟକ ମିଚେଲ ମାର୍ଶ ନାମ୍ବିଆ ବିପକ୍ଷ ମ୍ୟାଚ ଖେଳିବେ କି ନା ତାହା ସ୍ପଷ୍ଟ ହୋଇ ନାହିଁ। ସେ ହାମଷ୍ଟ୍ରିଙ୍ଗ ଇଞ୍ଜୁରିରୁ ସମ୍ପୂର୍ଣ୍ଣ ମୁକ୍ତି ପାଇଛନ୍ତି କି ନା ତାହା ଜଣାପଡ଼ି ନାହିଁ। ରବିବାର ରାତିରେ କୋଲକାତା ନାଇଟ ରାଇଡର୍ସ ଓ ସନରାଇଜର୍ସ ହାଇଦ୍ରାବାଦ ମଧ୍ୟରେ ଆଇପିଏଲ୍ ଫାଇନାଲ ଖେଳାଯାଇଥିଲା। ଏହି ଦୁଇଟି ଦଳରେ ଅଷ୍ଟ୍ରେଲିଆର ୩ଜଣ ଖେଳାଳି ଖେଳୁଥିଲେ। ସେମାନେ ହେଲେ ଟ୍ରାଭିସ ହେଡ୍, ପ୍ୟାଟ କୁମିନ୍ସ ଏବଂ ପ୍ଲେୟର ଅଫ୍ ଦି ମ୍ୟାଚ ମିଚେଲ ଷ୍ଟାର୍କ। ଏହି ୩ ଜଣଙ୍କ ବ୍ୟତୀତ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁର ଅଂଶ ବିଶେଷ ଥିବା କାମେରନ ଗ୍ରୀନ୍ ଓ ଗ୍ଲେନ ମାକ୍ସଓ୍ବେଲ ସପ୍ତାହ ଶେଷର ବାର୍ବାଡୋସଠାରେ ଦଳ ସହିତ ଯୋଗ ଦେବେ। ଅନ୍ୟପକ୍ଷରେ ଲକ୍ଷ୍ନୌ ସୁପର ଜାଏଣ୍ଟ୍ସ ତରଫରୁ ଖେଳିଥିବା ମାର୍କସ ଷ୍ଟୋଇନିସ ନାମ୍ବିଆ ବିପକ୍ଷ ଅଭ୍ୟାସ ମ୍ୟାଚ ପରେ ତ୍ରିନିଦାଦରେ ପହଞ୍ଚତ୍ବେ। ରିଜର୍ଭ ଖେଳାଳି ଜେକ୍ ଫ୍ରେଜର-ମ୍ୟାକ୍ଗ୍ରୁକ୍ ଜୁନ୍ ୫ରେ ଓମାନ ବିପକ୍ଷରେ ପ୍ରଥମ ମ୍ୟାଚ ପରେ ଦଳରେ ଯୋଗ ଦେବେ। ଆଇପିଏଲ୍ରେ ବହୁ ଦିନ ଧରି ଖେଳିବା ପରେ ସେମାନେ କ୍ଳାନ୍ତ ହୋଇପଡ଼ିଛନ୍ତି। ସେମାନଙ୍କୁ ଆଗକୁ ଟି୨୦ ବିଶ୍ୱକପ୍ରେ ମଧ୍ୟ ବହୁ ମ୍ୟାଚ ଖେଳିବାକୁ ହେବ। ତେଣୁ ଏହା ମଧ୍ୟରେ ସେମାନେ ପରିବାର ସହିତ କିଛି ସମୟ ବିତାଇ ସତେଜ ହେବାକୁ ଚାହଁୁଛନ୍ତି। ଆଇସିସି ନିୟମାନୁସାରେ ଓ୍ବାର୍ମଅପ୍ ମ୍ୟାଚଗୁଡ଼ିକରେ ପଡ଼ିଆକୁ ଓହ୍ଲାଉଥିବା ଖେଳାଳିମାନେ ପ୍ରତିନିଧିତ୍ୱ କରୁଥିବା ଦେଶର ହେବା ଆବଶ୍ୟକ। ଅର୍ଥାତ୍ ଆଣ୍ଡ୍ର୍ୟୁ ମ୍ୟାକଡୋନାଲ୍ଡ, ବ୍ରାଡ୍ ହଜ୍, ଜର୍ଜ ବେଲି (ସମସ୍ତେ ପୂର୍ବତନ ଅନ୍ତର୍ଜାତୀୟ କ୍ରିକେଟର)ଙ୍କ ଭଳି ସପୋର୍ଟ ଷ୍ଟାଫ୍ ଏବଂ ଆଣ୍ଡ୍ରେ ବୋରୋଭେକ୍ (ଜଣେ ପୂର୍ବତନ ପ୍ରଥମ ଗ୍ରେଡ୍ ଉଇକେଟକିପର)ଙ୍କୁ ପଡ଼ିଆକୁ ଓହ୍ଲାଇବାକୁ ପଡ଼ିପାରେ।
