ମେଲବୋର୍ନ,୨୫।୭(ଏପି): ବର୍ଷର ପ୍ରଥମ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ଅଷ୍ଟ୍ରେଲିଆନ୍ ଓପନ୍ ଆୟୋଜନ ନେଇ ଏବେଠାରୁ ଆୟୋଜକମାନେ ଯୋଜନା ସ୍ଥିର କଲେଣି। ଏହି ଟୁର୍ନାମେଣ୍ଟର ଆଗାମୀ ୨୦୨୧ ସଂସ୍କରଣ ଅଳ୍ପ ଦର୍ଶକଙ୍କ ଗହଣରେ ଓ ସମ୍ପୂର୍ଣ୍ଣ ଜୈବ ସୁରକ୍ଷିତ ପରିବେଶରେ ଖେଳାଯିବ ବୋଲି ଆୟୋଜକମାନେ ସୂଚନା ଦେଇଛନ୍ତି। ଟେନିସ୍ ଅଷ୍ଟ୍ରେଲିଆ ମୁଖ୍ୟ କ୍ରେଗ୍ ଟିଲେ ଏବେ ୟୁଏସ୍ ଓପନ୍ ଓ ବିଳମ୍ବିତ ଫ୍ରେଞ୍ଚ୍ ଓପନ୍ କିପରି ଆୟୋଜନ ହେବ ତାହା ଉପରେ ଲକ୍ଷ୍ୟ ରଖିଛନ୍ତି।
ଜାନୁୟାରୀରେ ଖେଳାଯିବାକୁ ଥିବା ଏହି ଟୁର୍ନାମେଣ୍ଟ କିପରି ଆୟୋଜନ ହେବ ସେ ନେଇ ଯୋଜନା ଆରମ୍ଭ ହୋଇଛି ବୋଲି ସେ ସୂଚନା ଦେଇଛନ୍ତି। ସାମାଜିକ ଦୂରତ୍ୱ ନିୟମକୁ ଦୃଷ୍ଟିରେ ରଖି ଷ୍ଟାଡିୟମରେ ସିଟ୍ ସଂଖ୍ୟା କମାଯିବ। ଜୈବ ସୁରକ୍ଷିତ ପରିବେଶ ସୃଷ୍ଟି କରାଯିବ ଓ ଏଥିପାଇଁ ବିଦେଶୀ ଦର୍ଶକଙ୍କୁ ଆସିବାକୁ ଅନୁମତି ଦିଆଯିବ ନାହିଁ ବୋଲି ସେ ସ୍ପଷ୍ଟ କରିଛନ୍ତି। ଗତବର୍ଷ ନୋଭାକ ଜୋକୋଭିଚ୍ ଓ ସାଫିଆ କେନିନ୍ ଯଥାକ୍ରମେ ପୁରୁଷ ଓ ମହିଳା ସିଙ୍ଗଲ୍ସ ଟ୍ରଫ୍ରି ହାସଲ କରିବାର ୬ ସପ୍ତାହ ପରେ ବିଶ୍ୱ ସ୍ବାସ୍ଥ୍ୟ ସଂଗଠନ ମାର୍ଚ୍ଚ ୧୨ ପର୍ଯ୍ୟନ୍ତ କରୋନ ଭାଇରସ୍କୁ ମହାମାରୀ ଘୋଷଣା କରି ନ ଥିଲା।
ଏଥର ମେଲବୋର୍ନ ପାର୍କରେ ଦର୍ଶକ ସଂଖ୍ୟା ପ୍ରାୟ ଅଧା ହେବ। ଆଷ୍ଟ୍ରେଲିଆରେ ପହଞ୍ଚିବା ପରେ ବିଦେଶୀ ଖେଳାଳିମାନଙ୍କୁ କ୍ୱାରାଣ୍ଟାଇନ୍ରେ ରହିବାକୁ ପଡିବ। ଏହାପରେ ସେମାନଙ୍କର କୋଭିଡ୍-୧୯ ଟେଷ୍ଟ ହେବ। ଖେଳାଳିମାନେ ଜୈବ ସୁରକ୍ଷିତ ହୋଟେଲରେ ରହିବେ ଓ ଭେନ୍ୟୁକୁ ସୁରକ୍ଷିତ ଭାବେ ଯିବା ଆସିବା କରିବେ ବୋଲି କୁହାଯାଇଛି। ଚଳିତ ସପ୍ତାହରେ ଆମେ ଏ ସଂକ୍ରାନ୍ତରେ ନିଷ୍ପତ୍ତି ନେଇଛୁ ବୋଲି ଟିଲେ କହିଛନ୍ତି। ଟେନିସ ଅଷ୍ଟ୍ରେଲିଆ ଫୁଲ୍ ଟାଇମ୍ ଟୁର୍ନାମେଣ୍ଟର ଷ୍ଟାଫ୍ ସଂଖ୍ୟା ୪୫୦କୁ କମାଇଛି। ଆସନ୍ତା ଜାନୁୟାରୀ ୧୮ ତାରିଖର ଆରମ୍ଭ ହେବାକୁ ଥିବା ଅଷ୍ଟ୍ରେଲିଆନ ଓପନ୍ରେ ଖେଳାଳି, ସପୋର୍ଟ ଷ୍ଟାଫ୍ଙ୍କ ସହ ମୋଟ ୨,୫୦୦ ଲୋକ ଷ୍ଟାଡିୟମରେ ଉପସ୍ଥିତ ରହିବେ। ଯଦି ପରସ୍ଥିତିରେ ଉନ୍ନତି ହୁଏ ଓ ୟୁଏସ୍ ଓପନ, ଫ୍ରେଞ୍ଚ୍ ଓପନ ଭଲରେ ଆୟୋଜନ ହୁଏ ତେବେ ଖେଳାଳିମାନେ ଆତ୍ମବିଶ୍ୱାସ ଲାଭ କରିବେ ବୋଲି ଟିଲେ ଆଶା ବ୍ୟକ୍ତ କରିଛନ୍ତି।
ଏହି ମହାମାରୀ କାରଣରୁ ଓ୍ବିମ୍ବେଲଡନ ଟେନିସ ଟୁର୍ନାମେଣ୍ଟକୁ ବାତିଲ କରାଯାଇଛି। ସେହିପରି ଫ୍ରେଞ୍ଚ୍ ଓପନ୍କୁ ସେପ୍ଟେମ୍ବର ୨୭ରୁ ଅକ୍ଟୋବର ୧୧ ତାରିଖକୁ ଘୁଞ୍ଚାଇ ଦିଆଯାଇଛି। ସେହିପରି ୟୁଏସ୍ ଓପନ ଅଗଷ୍ଟ ୩୧ରୁ ଆରମ୍ଭ ହୋଇ ସେପ୍ଟେମ୍ବର ୧୩ ତାରିଖରେ ଶେଷ ହେବ।
