ହିଞ୍ଜିଳିକାଟୁ,୨୬ା୯(ଡି.ଏନ୍.ଏ.): ଗଞ୍ଜାମ ଜିଲା ହିଞ୍ଜିଳିକାଟୁ ବ୍ଲକ ଓ ପୌର ପ୍ରଶାସନ ପକ୍ଷରୁ ସମ୍ଭାବ୍ୟ ବାତ୍ୟା ଗୁଲାବ ମୁକାବିଲା ନିମନ୍ତେ ସତର୍କତା ପ୍ରକାଶ ପାଇଛି। ରବିବାର ଛତ୍ରପୁର ଉପଜିଲାପାଳ ପ୍ରିୟରଞ୍ଜନ ପୃଷ୍ଟି, ବିଡିଓ ସୁବ୍ରତ କୁମାର ଜେନା, ତହସିଲଦାର ପ୍ରଭାତ କୁମାର ପରିଡ଼ା ପ୍ରମୁଖ ଘୋଡ଼ାହାଡ଼ ନଦୀ କୂଳିଆ ବଳରାମପୁର ଗ୍ରାମରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି। ସେହିପରି ପୌରାଞ୍ଚଳର ବିଭିନ୍ନ ତଳିଆ ଅଞ୍ଚଳରେ ପୌର ନିର୍ବାହୀ ଅଧିକାରୀ ଡ. ମନୋରଞ୍ଜନ ସାହୁ, ବିଡିଓ ଜେନା, ଆଇଆଇସି ଅଭିମନ୍ୟୁ ଦାଶ ଓ ଅନ୍ୟ ପୌର କର୍ମଚାରୀ ବୁଲି ସ୍ଥିତି ଅନୁଧ୍ୟାନ କରିଛନ୍ତି। ପୂର୍ବାହ୍ନରୁ ଅଞ୍ଚଳରେ ବର୍ଷା ଲାଗି ରହିଛି। ବ୍ଲକ ନଦୀ କୂଳିଆ ବଳରାମପୁର, ସିଙ୍ଗିପୁର, ବୁରୁପୋଡ଼ା, ହିଞ୍ଜିଳିକାଟୁ, ଖଣ୍ଡରା,ଚାନ୍ଦୁଲି,ଖରିଡ଼ା,ଶିକିରି, ଗିରିଆ, ଆଲପୁର,ନନ୍ଦିକ, ପୁଟିଆପଦର ପ୍ରଭୃତି ଗ୍ରାମରେ ତଳିଆ ଓ ପାଣି ଜମି ରହିବା ସ୍ଥାନଗୁଡ଼ିକୁ ନ ଯିବା ପାଇଁ ପ୍ରଶାସନ ପକ୍ଷରୁ ଲୋକଙ୍କୁ ସତର୍କ କରାଇ ଦିଆଯାଇଛି।
ସନ୍ଧ୍ୟା ସୁଦ୍ଧା ପବନ ଓ ବର୍ଷା ପ୍ରଭାବ ଦେଖି ତଳିଆ ଅଞ୍ଚଳର ଲୋକମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯିବ ବୋଲି ବିଡିଓ ସୁବ୍ରତ କୁମାର ଜେନା କହିଛନ୍ତି। ସେହିପରି ପୌର ପ୍ରଶାସନ ପକ୍ଷରୁ ଲୋକଙ୍କ ସୁବିଧା ପାଇଁ ହେଲ୍ପ ଲାଇନ ନମ୍ବର ଜାରି ହୋଇଛି। ନଦୀ ତଳୁଆ ଓ କେନାଲ ନିକଟବର୍ତ୍ତୀ ଅଞ୍ଚଳରେ ରହୁଥିବା କିଛି କଚ୍ଚା ଘର ଉପରେ ସତର୍କ ଦୃଷ୍ଟି ରଖାଯାଇଛି। ପବନର ବେଗ ଦେଖି ଆବଶ୍ୟକ ପଡ଼ିଲେ ଲୋକଙ୍କୁ ସୁରକ୍ଷିତ ସ୍ଥାନାନ୍ତର ପାଇଁ ସଜାଗ ରହିଥିବା ପୌର ନିର୍ବାହୀ ଅଧିକାରୀ ଡ. ମନୋରଞ୍ଜନ ସାହୁ କହିଛନ୍ତି।
