ବିନିକା,୯ା୫(ଡି.ଏନ.ଏ.): ସୁବର୍ଣ୍ଣପୁର ଜିଲା ବିନିକା ବ୍ଲକ ଅନ୍ତର୍ଗତ ଫୁଲମୁଠି ଗଁାର ଜିବର୍ଦ୍ଧନ କର୍ଣ୍ଣଙ୍କ ହାତୀ ଆକ୍ରମଣରେ ମୃତ୍ୟୁ ଘଟିଥିଲା। ଘଟଣାକୁ ଇତିମଧ୍ୟରେ ୫ବର୍ଷ ୬ମାସ ବିତିଛି। ହେଲେ ସେହି ସମୟରେ ଜିଲା ପ୍ରଶାସନ ଦେଇଥିବା ଲିଖିତ ପ୍ରତିଶ୍ରୁତି ଅନୁଯାୟୀ ଜିବର୍ଦ୍ଧନଙ୍କ ସ୍ତ୍ରୀ ଜୟନ୍ତୀ କର୍ଣ୍ଣ(୩୫)ଙ୍କୁ ଅଦ୍ୟାବଧି ସରକାରୀ ଚାକିରି ମିଳିନାହିଁ । ଫଳରେ ୩ଝିଅଙ୍କ ସହ ସେ ଦୁର୍ବିଷହ ଜୀବନ ବିତାଉଛନ୍ତି। ସ୍ଥାନୀୟ ପ୍ରଶାସନଠାରୁ ଆରମ୍ଭ କରି ଜିଲା ପ୍ରଶାସନ ଏପରିକି ବିଧାୟକ, ମନ୍ତ୍ରୀଙ୍କୁ ଭେଟି ଅଭିଯୋଗ କରିଛନ୍ତି। ଏପରିକି ବିନିକାରେ ବିଭିନ୍ନ ସମୟରେ ହୋଇଥିବା ଜିଲାପାଳଙ୍କ ଜନ ଶୁଣାଣିରେ ଜଣାଇଲେ ମଧ୍ୟ କେବଳ ମିଳିଛି ପ୍ରତିଶ୍ରୁତି ବୋଲି ଜୟନ୍ତୀ କହିଛନ୍ତି।
୨୦୧୭ ନଭେମ୍ବର ୨୭ତାରିଖ ରାତ ପ୍ରାୟ ୯ଟାରେ ଘରର ଏକମାତ୍ର ରୋଜଗାରକ୍ଷମ ବ୍ୟକ୍ତି ଜିବର୍ଦ୍ଧନ କାମ ସାରି ଗଁାକୁ ଫେରୁଥିବା ବେଳେ ହାତୀପଲ ହାବୁଡ଼ରେ ପଡ଼ିଥିଲେ। ହାତୀ ଆକ୍ରମଣରେ ତାଙ୍କର ମୃତ୍ୟୁ ହୋଇଯାଇଥିଲା। ଅନୁକମ୍ପାମୂଳକ ସହାୟତା ସାଙ୍ଗକୁ ପରିବାର ଭରଣ ପୋଷଣ ପାଇଁ ମୃତକଙ୍କ ସ୍ତ୍ରୀଙ୍କୁ ଯୋଗ୍ୟତା ଅନୁସାରେ ଚାକିରି ଦେବାକୁ ଦାବି କରି ୨୮ତାରିଖରେ ଶତାଧିକ ଲୋକେ ବିନିକା-ସୋନପୁର ମୁଖ୍ୟରାସ୍ତା ଅବରୋଧ କରିିଥିଲେ। ସ୍ଥାନୀୟ ପ୍ରଶାସନ ଓ ଅଞ୍ଚଳବାସୀଙ୍କ ଉପସ୍ଥିତିରେ ତତ୍କାଳୀନ ସୋନପୁର ଉପଜିଲାପାଳ ବଳରାମ ମଲ୍ଲିକ ବିନିକାରେ ଆଦର୍ଶ ବିଦ୍ୟାଳୟ ଖୋଲିଲେ ଜୟନ୍ତୀଙ୍କୁ ଅଗ୍ରାଧିକାର ଭିତ୍ତିରେ ନିଯୁକ୍ତି ମିଳିବ ବୋଲି ଲିଖିତ ପ୍ରତିଶ୍ରୁତି ଦେଇଥିଲେ। ହେଲେ ବିନିକାରେ ଆଦର୍ଶ ବିଦ୍ୟାଳୟ ଖୋଲିବାର ୪ବର୍ଷ ବିତି ଯାଇଥିଲେ ମଧ୍ୟ ଜୟନ୍ତୀଙ୍କୁ କର୍ମ ସଂସ୍ଥାନ ଦିଆଯାଇନାହିଁ। ଏପରିସ୍ଥଳେ ୩ଝିଅ ଗାୟତ୍ରୀ(୧୬), ଧରିତ୍ରୀ(୧୩) ଓ ଅନନ୍ୟା(୮)ଙ୍କ ଲାଳନ ପାଳନ ସହ ତାଙ୍କର ଭବିଷ୍ୟତ ଗଠନ ନେଇ ଚିନ୍ତାରେ ପଡିଛନ୍ତି ଜୟନ୍ତୀ। ବିଧବା ଭତ୍ତା ଓ ପିଡିଏସ୍ ଚାଉଳ ମିଳୁଛି। ମାତ୍ର ତାହା ଅଭାବକୁ ପୂରଣ କରି ପାରୁନାହିଁ। ସୋମବାର ବହୁ ଆଶା ରଖି ଜୟନ୍ତୀ ୩ଝିଅଙ୍କୁ ସାଥିରେ ଧରି ବିନିକାଠାରେ ଅନୁଷ୍ଠିତ ଜିଲାପାଳଙ୍କ ଅଭିଯୋଗ ଶୁଣାଣି ଶିବିରକୁ ଆସି ତାଙ୍କ ସମସ୍ୟା ଓ ପ୍ରଶାସନ ପକ୍ଷରୁ ପ୍ରତିଶ୍ରୁତି ସମ୍ପର୍କରେ ଜଣାଇଥିଲେ। ହେଲେ ପ୍ରଶାସନିକ ଅଧିକାରୀମାନେ ଋଣ ନେଇ ସ୍ବାବଲମ୍ବୀ ହେବାକୁ ଜୟନ୍ତୀଙ୍କୁ ପରାମର୍ଶ ଦେଇଥିଲେ। ପରେ ତାଙ୍କ ଅଭିଯୋଗ ପତ୍ରକୁ ଜିଲା ଶିକ୍ଷା ଅଧିକାରୀ(ଡିଇଓ)ଙ୍କ ପାଖକୁ ପଠାଇ ଦେଇଥିଲେ। ଏହାପରେ ଜୟନ୍ତୀ ଓ ୩ଝିଅଙ୍କ ସହ ନିରାଶ ହୋଇ ଘରକୁ ଫେରୁଥିବା ଦେଖିବାକୁ ମିଳିଥିଲା। ଜିଲା ପ୍ରଶାସନ ସହୃଦୟତାର ସହ ଜୟନ୍ତୀଙ୍କୁ ଥଇଥାନ କରିବା ଦିଗରେ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି।
