ନୂଆଦିଲ୍ଲୀ,୨୯ା୪: ବିଶ୍ୱର ଆତଙ୍କବାଦର ମୂଳୋତ୍ପାଟନ ଲାଗି ମିଳିତ ଭାବେ କାର୍ଯ୍ୟ କରିବାକୁ ହେବ ବୋଲି ସାଂଘାଇ ସହଯୋଗ ସଂଗଠନ (ଏସ୍ସିଓ) ପ୍ରତିରକ୍ଷା ମନ୍ତ୍ରୀ ସମ୍ମିଳନୀରେ ଭାରତର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ କହିଛନ୍ତି। ଏଥିସହିତ ଆତଙ୍କବାଦକୁ ସମର୍ଥନ ଯୋଗାଉଥିବା ରାଷ୍ଟ୍ରଗୁଡ଼ିକୁ ଉତ୍ତରଦାୟୀ କରାଯାଉ ବୋଲି ସେ ପାକିସ୍ତାନର ନାଁ ନ ନେଇ କହିଥିଲେ। ଆତଙ୍କବାଦୀଙ୍କୁ ଆଶ୍ରୟ ଦେଉଥିବା ରାଷ୍ଟ୍ର କେବଳ ଅନ୍ୟମାନଙ୍କ ପାଇଁ ବିପଦ ସୃଷ୍ଟି କରୁନାହିଁ, ନିଜ ପାଇଁ ମଧ୍ୟ ବିପଦକୁ ଡାକି ଆଣୁଛି ବୋଲି ପ୍ରତିରକ୍ଷା ମନ୍ତ୍ରୀ କହିଥିଲେ। ଶୁକ୍ରବାର ଅନୁଷ୍ଠିତ ଏସ୍ସିଓ ବୈଠକରେ ରାଜନାଥ ଅଧ୍ୟକ୍ଷତା କରି କହିଥିଲେ, ଭାରତ ଆଞ୍ଚଳିକ ସହଯୋଗର ଏକ ମଜଭୂତ ଢାଞ୍ଚା ପରିକଳ୍ପନା କରିଛି, ଯେଉଁଥିରେ ସବୁ ସଦସ୍ୟ ରାଷ୍ଟ୍ରଙ୍କ ବୈଧ ସ୍ବାର୍ଥକୁ ଧ୍ୟାନ ଦେଇ ସେମାନଙ୍କ ସାର୍ବଭୌମତ୍ୱ ଏବଂ ଆଞ୍ଚଳିକ ସଂହତି ପ୍ରତି ପାରସ୍ପରିକ ସମ୍ମାନ ରହିବ। ବୈଠକରେ ଚାଇନା ପ୍ରତିରକ୍ଷା ମନ୍ତ୍ରୀ ଲି ଶାଙ୍ଗଫୁ ଉପସ୍ଥିତ ଥିଲେ।
