ଭୁବନେଶ୍ୱର,୨୪।୫(ବ୍ୟୁରୋ):ହାତରେ ଧରିଥିଲେ ଖଣ୍ଡା ଓ ଷ୍ଟିଲ୍ ପାଇପ। ହାବୁଡ଼ରେ ଯାହା ପଡୁଥିଲା ହାଣୁଥିଲେ, ଭାଙ୍ଗୁ ଥିଲେ। ସ୍ଥାନୀୟ ଲୋକ ଓ କମିଶନରେଟ ପୋଲିସକୁ ଇଙ୍ଗିତ କରି ଧମକ ବି ଦେଉଥିଲେ। ଫଳରେ ଭୟରେ ପ୍ରାଣ ବିକଳରେ ବ୍ୟବସାୟୀ ଓ ଲୋକେ ଦୌଡିଥିଲେ। ମଞ୍ଚେଶ୍ୱର ଥାନା ଅନ୍ତର୍ଗତ ରୟାଲ +୨ ସାଇନ୍ସ କଲେଜ ଆଗରେ ରବିବାର ମଧ୍ୟାହ୍ନରେ ଏଭଳି ଘଟଣା ଦେଖିବାକୁ ମିଳିଥିଲା। ଭାଇଗିରି ଦେଖାଇବାକୁ ସ୍ପଷ୍ଟ ଦିବାଲୋକରେ ଅଧଘଣ୍ଟା ଧରି ଆତଙ୍କ ଖେଳାଉଥିବା ୨ ଅଭିଯୁକ୍ତଙ୍କୁ ଶେଷରେ ଗିରଫ କରିଛି ପୋଲିସ। ଅଭିଯୁକ୍ତଦ୍ୱୟ ହେଲେ ମଞ୍ଚେଶ୍ୱର ଥାନା ଅଞ୍ଚଳ ପଳାଶୁଣିର ରାକେଶ ରଞ୍ଜନ ମହାନ୍ତି (୩୫) ଓ ଜଗନ୍ନାଥ କଲୋନୀର ଅଜିତ ଗିରି ଓରଫ ବାଦଲ (୨୧)। ସେମାନଙ୍କଠାରୁ ଗୋଟିଏ ଖଣ୍ଡା, ଷ୍ଟିଲ୍ ପାଇପ ଓ ୨ ମୋବାଇଲ ଜବତ କରାଯାଇଛି। ଏଥିସହ ପୋଲିସ ମାମଲା (ନଂ.୧୬୭ /୨୨) ରୁଜୁ କରି ସୋମବାର ସେମାନଙ୍କୁ କୋର୍ଟ ଚାଲାଣ କରିଛି।
ରବିବାର ଦିନ ପ୍ରାୟ ୧୨ଟା ୩୦ ହେବ। ରୟାଲ +୨ ସାଇନ୍ସ କଲେଜ ନିକଟ ପ୍ରଭାତ ମଲ୍ଲଙ୍କ ଚା ଦୋକାନରେ ଗ୍ରାହକମାନେ ଚା’ ପିଉଥିଲେ। ଏହି ସମୟରେ ଅଭିଯୁକ୍ତ ରାକେଶ ଓ ସହଯୋଗୀ ଅଜିତ ମଦ୍ୟପାନ କରି ଏକ କାରରେ ଆସି ସେଠାରେ ପହଞ୍ଚତ୍ଥିଲେ। ସେମାନେ କାର୍ରୁ ଫିଲ୍ମ ଷ୍ଟାଇଲରେ ଓହ୍ଲାଇ ଏକ ଷ୍ଟିଲ୍ ପାଇପ୍ରେ ପ୍ରଭାତଙ୍କୁ ଆକ୍ରମଣ କଲେ। ଏଥିସହ ଦୋକାନ ଆଗରେ ଥିବା କାଚ ଥଣ୍ଡା ବୋତଲଗୁଡିକୁ ଭାଙ୍ଗି ଉତ୍ପାତ କରିଥିଲେ। ଅଭିଯୁକ୍ତଙ୍କୁ ଏଭଳିକାଣ୍ଡ ଦେଖି ଦୋକାନରେ ଚା ପିଉଥିବା କେତେଜଣ ଲୋକ ଏହାକୁ ବିରୋଧ କରିବାରୁ ସେମାନେ ଖରାପ ଭାଷାରେ ଗାଳିଗୁଲଜ କରି ସେଠାରୁ ପଳାଇଥିଲେ। ଏହାର ୧୫ ମିନିଟ ପରେ ସେମାନେ ପୁଣି ଉକ୍ତ କାରରେ ଆସିଥିଲେ। କେହି କିଛି ବୁଝିବା ପୂର୍ବରୁ ଗାଡିରୁ ବଡ଼ ଖଣ୍ଡା ବାହାର କରି ଗୋଡାଇ ଗୋଡାଇ ଆକ୍ରମଣ କରିଥିଲେ। ଫଳରେ କେତେଜଣ ଆହତ ଅବସ୍ଥାରେ ଜୀବନ ବଞ୍ଚାଇବାକୁ ଦୌଡ଼ି ପଳାଇଥିଲେ। ଏହାପରେ ଅଭିଯୁକ୍ତ ଦ୍ୱୟ ଦୋକାନର ଶଟର ଓ ସମ୍ମୁଖରେ ଥିବା ଏକ ବାଇକକୁ ଖଣ୍ଡାରେ ଚୋଟ ପରେ ଚୋଟ ପକାଇଥିଲେ। ଅଭିଯୁକ୍ତ ରାକେଶ ନିଜକୁ ବଡ ଗୁଣ୍ଡା ଓ ଭୁବନେଶ୍ୱରର ଡନ୍ ବୋଲି କହୁଥିଲେ। ମୋ ରାଜୁତି ଚାଲିବ, କେହି କିଛି କରିପାରିବେ ନାହିଁ କହି ଖରାପ ଭାଷାରେ ଗାଳିଗୁଲଜ କରୁଥିଲେ। ଖବର ପାଇ ପିସିଆର ପୋଲିସ ପହଞ୍ଚତ୍ ଅଭିଯୁକ୍ତଦ୍ୱୟଙ୍କୁ କାବୁ କରିବାକୁ ଚେଷ୍ଟା କରିଥିଲା। ହେଲେ ସେମାନେ ପୋଲିସକୁ ମଧ୍ୟ ଆକ୍ରମଣ କରିଥିଲେ। ବହୁ କଷ୍ଟରେ ପୋଲିସ ସେମାନଙ୍କୁ କାବୁ କରି ଥାନାକୁ ନେଇଥିଲା।
