କୁଚିଣ୍ଡା,୧୫।୨(ବିରଞ୍ଚି ଦର୍କା): ସମ୍ବଲପୁର ଜିଲା ବାମରା ନିକଟସ୍ଥ ନୁଁନୁନିଆମୁଣ୍ଡା ସ୍ଥିତ ଲାଠ ଶୀତଳ ଭଣ୍ଡାରରେ ରଵିବାର ସକାଳେ ସର୍ଟସର୍କିଟ ଯୋଗୁଁ ଅଗ୍ନିକାଣ୍ଡ ହୋଇଛି । ଏଥିରେ କୋଟି କୋଟି ଟଙ୍କାର ସମ୍ପତି ନଷ୍ଟ ହୋଇଯାଇଛି । ନିଆଁକୁ ଆୟତ୍ତ କରିବା ପାଇଁ ୬ ଘଣ୍ଟା ପରେ ଝାରସୁଗୁଡାରୁ ରୋବର୍ଟ ଆସି ନିଆଁ ଲିଭାଇବା ପାଇଁ ପ୍ରୟାସ ଜାରି ରଖିଛି।
ଗୋବିନ୍ଦପୁର, ଲଇକେରା ଓ କିର୍ମିରାରୁ ଅଗ୍ନିଶମ ବିଭାଗର ଟିମ୍ ଆସି ନିଆଁ ଲିଭା ପ୍ରୟାସ ଜାରି ରଖିଥିଲେ ହେଁ ଦୀର୍ଘ ୭ଘଣ୍ଟା ପରେ ବି ନିଆଁ ହୁତୁ ହୁତୁ ହୋଇ ଜଳୁଥିବା ଦେଖାଯାଇଛି । ପ୍ରାୟ ୭୦ ପ୍ରତିଶତ ନିଆଁ ଆୟତ୍ତ ହୋଇଥିବା ବେଳେ ଖବର ଲେଖାଯିବା ପର୍ଯ୍ୟନ୍ତ ଏଵେବି ନିଆଁଲିଭା କାର୍ଯ୍ୟ ଜାରି ରହିଛି । ଫଳରେ କୁଚିଣ୍ଡା ଉପଖଣ୍ଡର ସର୍ବ ବୃହତ ଶୀତଳ ଭଣ୍ଡାରରେ ଚାଷୀମାନଙ୍କ ଗଛିତ ଥିଵା ଲଙ୍କା, ଆମ୍ବ ଟାକୁଆ, ମହୁଲ ଆଦି ପୋଡି ସମ୍ପୂର୍ଣ୍ଣ ନଷ୍ଟ ହୋଇଯାଇଛି ।
ଶୀତଳ ଭଣ୍ଡାର ମାଲିକ ଅନୁଭବ ଲାଠ ସମ୍ପୂର୍ଣ୍ଣ ଭାବେ ଭାଙ୍ଗି ପଡିଛନ୍ତି ଏବଂ ୫କୋଟିରୁ ଉର୍ଦ୍ଧ୍ବ ଟଙ୍କାର କ୍ଷତି ହୋଇଥିବା କହିଛନ୍ତି । ସୂଚନାଯୋଗ୍ୟ ଯେ, ୫୦୦୦ ମେଟ୍ରିକ ଟନ୍ କ୍ଷମତା ବିଶିଷ୍ଟ ଶୀତଳ ଭଣ୍ଡାର ପ୍ରାୟ ୧୦ କୋଟି ଟଙ୍କା ବ୍ୟୟରେ ନିର୍ମିତ ହୋଇଥିଲା। ହେଲେ ଶୀତଳ ଭଣ୍ଡାର ସହ ଗଛିତ ଥିଵା କଞ୍ଚାମାଲ ଓ ଅନ୍ୟାନ୍ୟ ଆସବାବ ପତ୍ର, ଯନ୍ତ୍ରପାତି ସମେତ ୧୩ କୋଟିରୁ ଉର୍ଦ୍ଧ୍ବ ଟଙ୍କାର ସମ୍ପତ୍ତି ନଷ୍ଟ ହୋଇଛି ।
