ନୂଆଦିଲ୍ଲୀ, ୬।୨(ପି.ଟି.): ବିବାଦୀୟ କୃଷି ଆଇନକୁ ପ୍ରତ୍ୟାହାର କରାଯାଇ ତାହା ସ୍ଥାନରେ ବିସ୍ତୃତ ବିଚାର ବିମର୍ଶ କରି ନୂଆ ଆଇନ ଅଣାଯାଉ ବୋଲି ଶୁକ୍ରବାର ରାଜ୍ୟ ସଭାରେ ଶିବସେନା, ଶିରୋମଣି ଅକାଳୀ ଦଳ, ଏନ୍ସିପି, ସମାଜବାଦୀ ପାର୍ଟି ଏବଂ ବାମଦଳଗୁଡ଼ିକ ଦାବି କରିଥିଲେ। ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବର ଆଲୋଚନା ବେଳେ ବିରୋଧୀ ସଦସ୍ୟମାନେ ସରକାରଙ୍କ ଉପରେ ବର୍ଷିଥିଲେ। ଚାଷୀ ଆନ୍ଦୋଳନକୁ ସରକାର ଜାତୀୟତା ବିରୋଧୀ କହି ଏହାକୁ ଭଣ୍ଡୁର କରିବା ପାଇଁ ଉଦ୍ୟମ ଚଳାଇଥିବାରୁ ବିରୋଧୀ ଦଳଗୁଡ଼ିକ ଏହାର ସମାଲୋଚନା କରିଥିଲେ। କେହି ସତ କଥା କହିଲେ ତାଙ୍କୁ ଦେଶଦ୍ରୋହୀ କୁହାଯାଇ ସେମାନଙ୍କ ବିରୋଧରେ ମାମଲା ରୁଜୁ କରାଯାଉଥିବା ଶିବସେନା ଏମ୍ପି ସଞ୍ଜୟ ରାଉତ୍ କହିଥିଲେ। ଚାଷୀ ନିଜ ହକ୍ ପାଇଁ ଆନ୍ଦୋଳନ କରୁଥିବାବେଳେ ସେମାନଙ୍କୁ ଜାତୀୟତା ବିରୋଧୀ କିମ୍ବା ଖଲିସ୍ଥାନୀ ଭାବେ ନାମିତ କରାଯାଉଛି। ସରକାର ଚାଷୀଙ୍କ ଦାବି ଶୁଣନ୍ତୁ ଓ କୃଷି ଆଇନ ପ୍ରତ୍ୟାହାର କରିନିଅନ୍ତୁ ବୋଲି ଶିବସେନା ଏମ୍ପି ଦାବି କରିଥିଲେ।
ସରକାର ଫସଲର ସର୍ବନିମ୍ନ ସହାୟକ ମୂଲ୍ୟ (ଏମ୍ଏସ୍ପି) ବଢ଼ାଇବା ସହ ଚାଷୀଙ୍କ ଆୟ ଦୁଇଗୁଣା କରିଥିବା ଦାବି କରୁଛନ୍ତି, ଯାହା ସମ୍ପୂର୍ଣ୍ଣ ମିଛ ବୋଲି ବରିଷ୍ଠ କଂଗ୍ରେସ ନେତା ମଲ୍ଲିକାର୍ଜୁନ ଖାର୍ଗେ କହିଥିଲେ। ପ୍ରଧାନମନ୍ତ୍ରୀ ଫସଲ ବୀମା ଯୋଜନାକୁ ସେ ପୁଞ୍ଜିପତି ମୁନାଫା ଯୋଜନା ଭାବେ ଅଭିହିତ କରିଥିଲେ।
ଅନ୍ୟପକ୍ଷରେ କୃଷିମନ୍ତ୍ରୀ ନରେନ୍ଦ୍ର ସିଂ ତୋମାର କହିଛନ୍ତି, କୃଷି ଆଇନକୁ ବିରୋଧ କରି ଏହାକୁ କଳା ଆଇନ କହୁଥିବା ଲୋକେ ସେଥିରେ କ’ଣ କଳା ରହିଛି, ତାହା କହିବା ପାଇଁ ପ୍ରସ୍ତୁତ ନୁହନ୍ତି। କୃଷି ଆଇନ ବିରୋଧରେ ଆନ୍ଦୋଳନ ଚଳାଇଥିବା କୃଷକ ସଂଗଠନର ନେତାମାନେ ଏହାର ବ୍ୟବସ୍ଥା ଉପରେ ଆଲୋଚନା କରିବା ଉଚିତ। ସମସ୍ୟା ଦର୍ଶାଇଲେ ଏହାର ସମାଧାନ ହୋଇପାରିବ। କିନ୍ତୁ ଆଇନରେ କ’ଣ ସମସ୍ୟା ସେମାନେ ଦେଖାଇ ପାରୁନାହାନ୍ତି ବୋଲି ତୋମାର ରାଜ୍ୟ ସଭାରେ କହିଥିଲେ। ଆନ୍ଦୋଳନ କେବଳ ଗୋଟିଏ ରାଜ୍ୟରେ ସୀମିତ ରହିଛି। ଚାଷୀମାନଙ୍କୁ ଉସୁକାଯାଉଥିବା କୃଷିମନ୍ତ୍ରୀ କହିଥିଲେ। କଂଗ୍ରେସ ପକ୍ଷରୁ ସଦ୍ୟ ପ୍ରକାଶିତ ପୁସ୍ତକକୁ ନେଇ ମନ୍ତ୍ରୀ ସମାଲୋଚନା କରିଥିଲେ। ଚାଷ ପାଇଁ ପାଣି ଦରକାର ଏହା ସମସ୍ତେ ଜାଣନ୍ତି। କେବଳ କଂଗ୍ରେସ ରକ୍ତ ବ୍ୟବହାର କରି ଚାଷ କରିପାରେ ବୋଲି ସେ କହିଥିଲେ। ସରକାର ଆଇନରେ ସଂଶୋଧନ ପାଇଁ ପ୍ରସ୍ତାବ ଦେବା ଅର୍ଥ ଆଇନ ତ୍ରୁଟିପୂର୍ଣ୍ଣ ନୁହେଁ। କୃଷି ଆଇନକୁ ସମର୍ଥନ କରି ତୋମାର କହିଥିଲେ, ଚାଷୀ ଯେତେବେଳେ ଚାହିଁବେ ଚୁକ୍ତିନାମାରୁ ଓହରିଯାଇପାରିବେ, ଏଥିପାଇଁ କୌଣସି ଜରିମାନା ବ୍ୟବସ୍ଥା ନାହିଁ।
