କେନ୍ଦୁଝର ୪ା୩(ନରେଶ ଚନ୍ଦ୍ର ପଟ୍ଟନାୟକ):ନିକଟରେ ବିଜେଡି ଛାଡିଥିବା ତେଲକୋଇ ବିଧାୟକ ତଥା ପୂର୍ବତନ ମନ୍ତ୍ରୀ ପ୍ରେମାନନ୍ଦ ନାଏକ ଭାଜପାରେ ଯୋଗଦେବେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଓଡ଼ିଶା ଗ୍ରସ୍ତର ଦିନକ ପୂର୍ବରୁ ସୋମବାର ସେ ଭାଜପାରେ ଯୋଗଦେବା ନେଇ ତେଲକୋଇରେ ରାଜନୀତି ସରଗରମ ହୋଇପଡ଼ିଛି।
ନିର୍ବାଚନମଣ୍ଡଳୀରୁ ୨୦୧୪ରେ କଂଗ୍ରେସରୁ ପ୍ରାର୍ଥୀ ହୋଇ ଏବଂ ୨୦୧୯ରେ ଭାଜପାରୁ ପ୍ରାର୍ଥୀ ହୋଇ ତାଙ୍କଠାରୁ ହାରିଥିବା ଧନୁର୍ଜୟ ସିଦ୍ଧୁଙ୍କୁ ଦଳ ପ୍ରାଧାନ୍ୟ ଦେବା ଏବଂ ତାଙ୍କୁ ଦଳୀୟ ସଂଗଠନ ଗୁରୁତ୍ୱ ଦିଆ ନ ଯିବାରୁ ଏବଂ ପରବର୍ତ୍ତୀ ସମୟରେ ଧନୁର୍ଜୟ ବିଜେଡିରେ ଯୋଗଦେଇ ସମାନ୍ତରାଳ ସଂଗଠନ ଚଳାଇବା ଆଦି କାରଣରୁ ଦଳରୁ ଇସ୍ତଫା ଦେଇଥିବା ପ୍ରେମାନନ୍ଦ କହିଥିଲେ।
ବିଜେଡି ଟିକେଟରୁ ତେଲକୋଇରୁ ଜିତିଥିବା ପ୍ରେମାନନ୍ଦ ୨୦୧୪ ନିର୍ବାଚନରେ ଟିକେଟ ପାଇ ନ ଥିଲେ। ୨୦୧୯ରେ ପୁଣି ବିଜେଡିରୁ ଟିକେଟ ପାଇ ଜିତିବା ପରେ ମନ୍ତ୍ରୀ ପଦ ପାଇଥିଲେ। ୨୦୨୪ ନିର୍ବାଚନରେ ବିଜେଡି ଧନୁର୍ଜୟଙ୍କୁୁ ପ୍ରାର୍ଥୀ କରିବା ଚର୍ଚ୍ଚା ହେଉଥିବାବେଳେ ପ୍ରେମାନନ୍ଦ ପଦ୍ମ ଧରିବାକୁ ନିଷ୍ପତ୍ତି ନେଇଥିବା କୁହାଯାଉଛି। ଜିଲା ବିଜେଡି ସଭାପତି ମାଧବ ସର୍ଦ୍ଦାର କହିଛନ୍ତି, ତାଙ୍କୁ ଦଳ ୨ଥର ବିଧାୟକ ଏବଂ ଥରେ ମନ୍ତ୍ରୀ କରିଥିଲା ା ସବୁ ପାଇଲା ପରେ ଏବେ ଦଳ ଛାଡିବା ଏବଂ ଭାଜପାରେ ମିଶିବା କାୈଣସି ଫରକ ପଡ଼ିବନାହିଁ। ପୂର୍ବତନ ବିଧାୟକ ଧନୁର୍ଜୟ କହିଛନ୍ତି, ତାଙ୍କୁ ଯେଉଁଭଳି ସମ୍ମାନ ଦେବା କଥା ଦେଇ ଆସିଥିଲା। ତାଙ୍କର ଭାଜପାରେ ମିଶିବା କିଛି ଫରକ ପଡିବ ନାହିଁ, ବରଂ ଲୋକଙ୍କ ତାଙ୍କ ପ୍ରତି ବିତୃଷ୍ଣା ଭାବ ଥିଲା। ଅନ୍ୟପକ୍ଷରେ ପ୍ରେମାନନ୍ଦଙ୍କ ନିଷ୍ପତ୍ତିକୁ ନେଇ ଭାଜପାରୁ ଆଶାୟୀ ଥିବା ଅନେକ ନେତାଙ୍କ ମନରେ ଛନକା ପଶିଛି। ବର୍ତ୍ତମାନ ତେଲକୋଇରେ ଭାଜପାର ସ୍ଥିତି ଭଲ ଥିବାବେଳେ ଦଳ ଠିକ୍ ନିଷ୍ପତ୍ତି ନ ନେଲେ ପୁଣି ଦଳ ମଧ୍ୟରେ ବିବାଦ ଘନୀଭୂତ ହେବ ବୋଲି ରାଜନୈତିକ ସମୀକ୍ଷକମାନେ ମତବ୍ୟକ୍ତ କରୁଛନ୍ତି। ଧନୁର୍ଜୟ ସିଦ୍ଧୁ ଭାଜପା ଦଳ ଛାଡିବା ପରେ ବହୁ ଆଗରୁ ଦଳ ପାଇଁ କାମ କରିଆସୁଥିବା ଆଶାୟୀମାନେ ଆଶ୍ୱସ୍ତ ହୋଇଥିଲେ। ପ୍ରେମାନନ୍ଦ ଲୋକଙ୍କ ସୁବିଧା ଅସୁବିଧା ବୁଝିନାହାନ୍ତି କିମ୍ବା ସାଂଗଠନିକ କାର୍ଯ୍ୟରେ ସାମିଲ ହୋଇ ନ ଥିବାରୁ ତାଙ୍କ ପ୍ରତି ଅସନ୍ତୋଷ ଲାଗିରହିଥିବା ବେଳେ ତେଲକୋଇ ନିର୍ବାଚନକୁ ଭାଜପା ତାଙ୍କ ଜରିଆରେ ବିଜେଡି ଗଡକୁ ହାତେଇବା ସେତେଟା ସୁବିଧା ଜନକ ହେବ ନାହିଁ ବୋଲି କୁହାଯାଉଛି ା
