ହାଇଦ୍ରାବାଦ,୨୧ା୧: ପୁଣିଥରେ ତେଲେଙ୍ଗାନାରେ ବହୁ ସଂଖ୍ୟକ ବୁଲା କୁକୁରଙ୍କୁ ହତ୍ୟା କରାଯାଇଛି । ହାଇଦ୍ରାବାଦରୁ ମାତ୍ର ୫୦ କିଲୋମିଟର ଦୂର ରଙ୍ଗାରେଡ୍ଡି ଜିଲ୍ଲାରେ ୧୦୦ କୁକୁରଙ୍କୁ ବିଷ ଦେଇ ହତ୍ୟା କରାଯାଇଥିବା ଅଭିଯୋଗ ହୋଇଛି । ପ୍ରକାଶଥାଉକି, ପୂର୍ବରୁ ତେଲେଙ୍ଗାନାରେ ହିଁ ୫୦୦ କୁକୁରଙ୍କୁ ହତ୍ୟା କରାଯାଇଥିବା ଏକ ମାମଲା ରିପୋର୍ଟ ହୋଇଥିଲା।
ତେଲେଙ୍ଗାନା ପୋଲିସ ସନ୍ଦେହ କରୁଛି ଯେ କୁକୁରଗୁଡ଼ିକୁ ବୃତ୍ତିଗତ ହତ୍ୟାକାରୀମାନେ ହତ୍ୟା କରିଛନ୍ତି । ଗାଁର ସରପଞ୍ଚ ଏବଂ ତାଙ୍କ ସହଯୋଗୀଙ୍କ ନିର୍ଦ୍ଦେଶରେ ୧୦୦ କୁକୁରଙ୍କୁ ବିଷ ଦିଆଯାଇଥିବା ଅଭିଯୋଗ ହୋଇଛି । ଏହି ଘଟଣାରେ ପୋଲିସ ସରପଞ୍ଚଙ୍କ ସମେତ ତିନି ଜଣଙ୍କୁ ଗିରଫ କରିଛି ।
ଏହି ଘଟଣା ସମ୍ପର୍କରେ ଷ୍ଟ୍ରେ ଆନିମଲ୍ ଫାଉଣ୍ଡେସନ୍ ଅଫ୍ ଇଣ୍ଡିଆର ମୁଦାବତ ପ୍ରୀତି ପୋଲିସରେ ଅଭିଯୋଗ କରିଛନ୍ତି । ପୋଲିସ ପିସିଏ (ପଶୁମାନଙ୍କ ପ୍ରତି ନିଷ୍ଠୁରତା ନିବାରଣ) ଆଇନର ଧାରା ୩(୫) ଏବଂ ଧାରା ୧୧(୧)(a)(i)ଅନୁଯାୟୀ ତିନି ଜଣଙ୍କ ବିରୁଦ୍ଧରେ ମାମଲା ରୁଜୁ କରିଛି । ଏଥିରେ ସରପଞ୍ଚ, ଜଣେ ୱାର୍ଡ ସଦସ୍ୟ ଏବଂ ଗ୍ରାମ ସଚିବ ଅନ୍ତର୍ଭୁକ୍ତ ।
ଏହି ଘଟଣା ଜାନୁଆରୀ ୧୯ ତାରିଖରେ ଘଟିଛି । ପୋଲିସ ସନ୍ଦେହ କରୁଛି ଯେ କୁକୁରମାନଙ୍କୁ ବିଷ ଦିଆଯାଇ ସେମାନଙ୍କ ମୃତଦେହ ଗାଁ ବାହାରେ ପୋତି ଦିଆଯାଇଥିଲା। ଏସଏଚଓ ନନ୍ଦେଶ୍ୱର ରେଡ୍ଡିଙ୍କ ଅନୁଯାୟୀ, “ଆମେ ଏହି ଘଟଣାର ଗମ୍ଭୀରତାର ସହ ତଦନ୍ତ କରୁଛୁ । ଆମେ କୁକୁରମାନଙ୍କୁ ପୋତି ଦିଆଯାଇଥିବା ସ୍ଥାନ ଖୋଜିବାକୁ ଚେଷ୍ଟା କରୁଛୁ।”
ପ୍ରୀତି କୁହନ୍ତି ଯେ ଗାଁରୁ ହଠାତ୍ ଅନେକ କୁକୁର ଗାଏବ ହୋଇଗଲେ । ଯେତେବେଳେ ଗାଁ ଲୋକଙ୍କୁ ଏ ବିଷୟରେ ପଚରାଗଲା, ସେମାନେ ପରସ୍ପର ବିରୋଧୀ ବୟାନ ଦେଲେ, ଯାହା ଫଳରେ ସନ୍ଦେହ ବିଶ୍ୱାସରେ ପରିଣତ ହେଲା। ଆମେ ସନ୍ଦେହ କଲୁ ଯେ କୁକୁରମାନଙ୍କୁ ବିଷାକ୍ତ ଇଞ୍ଜେକ୍ସନ ଦେଇ ହତ୍ୟା କରାଯାଇଛି । ୱାର୍ଡ ସଦସ୍ୟ ଆଦୁଲପୁରମ ଗୌତମ ପ୍ରକାଶ କରିଛନ୍ତି ଯେ କୁକୁରମାନଙ୍କୁ ପ୍ରଥମେ ଆନାସ୍ଥେସିଆ ଇଞ୍ଜେକ୍ସନ ଦିଆଯାଇଥିଲା ଏବଂ ତା’ପରେ ଏକ ବିଷାକ୍ତ ପଦାର୍ଥ ଇଞ୍ଜେକ୍ସନ ଦିଆଯାଇଥିଲା, ଯାହା ଫଳରେ ସେମାନଙ୍କ ମୃତ୍ୟୁ ଘଟିଥିଲା।
Dharitri – Odisha’s No.1 Odia Daily
