ନ୍ୟୁୟର୍କ,୧୩ା୯(ପି.ଟି):ୟୁଏସ୍ ଓପନ ଟେନିସ ପୁରୁଷ ସିଙ୍ଗଲ୍ସ ଟାଇଟଲ ହାତେଇ ନେଇଛନ୍ତି ସ୍ପେନର କାର୍ଲୋସ୍ ଅଲକାରାଜ୍ ଗାର୍ଫିଆ। ରବିବାର ରାତିରେ ଖେଳା ଯାଇଥିବା ଫାଇନାଲରେ ନରଓ୍ବେ କାସ୍ପର ରୁଡ୍ଙ୍କୁ ୪ସେଟ୍ ବିଶିଷ୍ଟ ମୁକାବିଲାରେ ହରାଇବା ସହିତ ମାତ୍ର ୧୯ ବର୍ଷରେ ଏଟିପି ର଼୍ୟାଙ୍କିଙ୍ଗର ପ୍ରଥମ ସ୍ଥାନକୁ ଉନ୍ନୀତ ହୋଇଛନ୍ତି। ୩ ଘଣ୍ଟା ୫୧ ମିନିଟ ଧରି ଏହି ମ୍ୟାଚଟି ଚାଲିଥିବା ବେଳେ ୬-୪, ୨-୬, ୭-୬ (୧) ଓ ୬-୩ରେ ଏହି ମ୍ୟାଚକୁ ଜିତି ନେଇଥିଲେ ଅଲକାରାଜ୍। କ୍ରମାଗତ ଦ୍ୱିତୀୟ ଗ୍ରାଣ୍ଡସ୍ଲାମ ଫାଇନାଲରେ ପ୍ରବେଶ କରିଥିଲେ ହେଁ ବିଜୟୀ ହେବାରେ ଅସମର୍ଥ ରହିଛନ୍ତି ୨୩ ବର୍ଷୀୟ ନରଓ୍ବେ ଖେଳାଳି। ଜୁନ୍ ମାସରେ ଫ୍ରେଞ୍ଚ ଓପନ ଫାଇନାଲରେ ପ୍ରବେଶ କରିଥିବା ବେଳେ ରାଫେଲ ନାଡାଲଙ୍କ ନିକଟରୁ ସେ ପରାଜିତ ହୋଇଥିଲେ। ୧୯ ବର୍ଷରେ ୟୁଏସ୍ ଓପନ ଫାଇନାଲରେ ପହଞ୍ଚି ପିଟ୍ ସାମ୍ପ୍ରାସଙ୍କ ୧୯୯୦ ମସିହା ରେକର୍ଡର ସମକକ୍ଷ ହୋଇଛନ୍ତି ଅଲ୍କାରାଜ୍ ।୧୯୯୦ ମସିହାରେ ୧୯ ବର୍ଷ ବୟସରେ ସାମ୍ପ୍ରାସ ୟୁଏସ୍ ଓପନ ଜିତିଥିଲେ। ୧୯୭୩ରେ ଏଟିପି ର଼୍ୟାଙ୍କିଙ୍ଗ ବ୍ୟବସ୍ଥା ଆରମ୍ଭ ହେବା ପରଠାରୁ ସର୍ବକନିଷ୍ଠ ଖେଳାଳି ଭାବରେ ସେ ୧ ନମ୍ବର ମାନ୍ୟତା ହାସଲ କରିଛନ୍ତି। ପ୍ରଥମ ସେଟକୁ ବିଶ୍ୱ ମାନ୍ୟତାରେ ୩ ନମ୍ବର ସ୍ଥାନରେ ଥିବା ଅଲ୍କାରାଜ୍ ଜିତିଥିବା ବେଳେ ଦ୍ୱିତୀୟ ସେଟକୁ ଜିତି ନେଇ ପ୍ରତ୍ୟାବର୍ତ୍ତନ କରିଥିଲେ ୨୩ ବର୍ଷୀୟ ରୁଡ୍। ତେବେ ତୃତୀୟ ସେଟରେ ୬-୫ରେ ପଛୁଆ ରହିଥିବା ବେଳେ ଅଲକାରାଜ୍ କିନ୍ତୁ ଚମତ୍କାର ପ୍ରତ୍ୟାବର୍ତ୍ତନ କରିଥିଲେ। ରୁଡଙ୍କ ସର୍ଭିସ୍ ରହିଥିଲେ ମଧ୍ୟ ଏହାକୁ ବ୍ରେକ କରି ସେଟକୁ ସମାନ୍ତର ସ୍ଥିତିକୁ ଆଣିଥିଲେ। ସଫ୍ଟହ୍ୟାଣ୍ଡ ଭଲିର ଉପଯୋଗ ସହିତ ଏହି ସେଟକୁ ଟାଇବ୍ରେକରକୁ ନେଇ ଜିତିଥିଲେ। ସେହିପରି ୪ର୍ଥ ସେଟକୁ ଜିତି ନିଜ କ୍ୟାରିୟରର ପ୍ରଥମ ଗ୍ରାଣ୍ଡସ୍ଲାମ ଟାଇଟଲ ହାସଲ କରିବାରେ ସମର୍ଥ ହୋଇଥିଲେ। ପୂର୍ବରୁ ସେମି ଫାଇନାଲରେ ଅଲ୍କାରାଜ୍ ଆମେରିକାର ଫ୍ରାନ୍ସେସ ଟିଆଫୋଙ୍କୁ ପରାଜିତ କରିଥିବା ବେଳେ ୫୫ ଶଟ୍ ରାଲି ମ୍ୟାଚରେ ରୁଷିଆର କାରେନ୍ ଖାଚାନୋଭଙ୍କୁ ପରାସ୍ତ କରିଥିଲେ କାସ୍ପର ରୁଡ୍।
କ୍ରେଜିକୋଭା-ସିନିକୋଭାଙ୍କୁ ଡବଲ୍ସ: ଚେକ୍ ରିପବ୍ଲିକ୍ର ବାର୍ବୋରା କ୍ରେଜିକୋଭା ଓ କାଟେରିନା ସିନିକୋଭାଙ୍କ ଯୋଡି ହାତେଇଛି ୟୁଏସ୍ ଓପନ ମହିଳା ଡବଲ୍ସ ଟାଇଟଲ। ବିଶ୍ୱ ମାନ୍ୟତାର ୩ ନମ୍ବର ସ୍ଥାନରେ ରହିଥିବା ଏହି ଯୋଡି ୩-୬, ୭-୫ ଓ ୬-୧ ସେଟରେ ଅଣସିଡେଡ ଆମେରିକୀୟ ଯୋଡି କେଟି ମ୍ୟାକନେଲି ଓ ଟେଲର ଟାଉନସେଣ୍ଡଙ୍କୁ ପରାସ୍ତ କରିଥିଲେ। ପ୍ରଥମ ସେଟରେ ଚେକ୍ ରିପବ୍ଲିକ୍ ଯୋଡି ପରାଜିତ ହୋଇଥିଲେ। ତେବେ ପରବର୍ତ୍ତୀ ଦୁଇ ସେଟରେ ନିଜ ଅଭିଜ୍ଞତାର ଉପଯୋଗ କରି ଅଣସିଡେଡ ଯୋଡିଙ୍କୁ ପରାସ୍ତ କରିଥିଲେ କ୍ରେଜିକୋଭା-ସିନିକୋଭା।
