ନୂଆଦିଲ୍ଲୀ,୧୦।୬: ଆଇସିସି ବିଶ୍ୱ ଟେଷ୍ଟ ଚମ୍ପିୟନଶିପ୍ରେ ଭାରତ ନ୍ୟୁଜିଲାଣ୍ଡ୍ ମ୍ୟାଚ୍ ପୂର୍ବରୁ ଟିମ୍ ଇଣ୍ଡିଆ ପାଇଁ ଖୁସି ଖବର ଆସିଛି। ଆଇସିସି ପକ୍ଷରୁ ଟେଷ୍ଟ୍ ର଼୍ୟାଙ୍କିଙ୍ଗ୍ ଜାରି କରାଯାଇଛି। ଏହି ତାଲିକାରେ ଟପ୍ ୧୦ ବ୍ୟାଟ୍ସ୍ ମ୍ୟାନ୍ଙ୍କ ମଧ୍ୟରେ ଟିମ୍ ଇଣ୍ଡିଆର ୩ ଜଣ ରହିଛନ୍ତି। ସେମାନଙ୍କ ମଧ୍ୟରେ ରହିଛନ୍ତି ଟିମ୍ ଇଣ୍ଡିଆର ଅଧିନାୟକ ବିରାଟ କୋହଲି, ରିଶଭ୍ ପନ୍ତ ଏବଂ ରୋହିତ ଶର୍ମା। ସେହିପରି ଟପ୍ ୧୦ ବୋଲରଙ୍କ ମଧ୍ୟରେ ଟିମ୍ ଇଣ୍ଡିଆର ରବିଚନ୍ଦ୍ରନ ଅଶ୍ୱିନ ସ୍ଥାନ ପାଇଛନ୍ତି। ତାଲିକାରେ ନ୍ୟୁଜିଲାଣ୍ଡ୍ର ଅଧିନାୟକ କେନ୍ ଓ୍ବିଲମ୍ସନ୍ ୮୯୫ ରେଟିଂ ଅଙ୍କ ସହିତ ଶୀର୍ଷରେ ରହିଛନ୍ତି। ବିରାଟ କୋହଲି ୮୧୪ ରେଟିଂ ଅଙ୍କ ସହିତ ପଞ୍ଚମ ସ୍ଥାନରେ ରହିଛନ୍ତି। ରିଶଭ୍ ପନ୍ତ ୭୪୭ ରେଟିଂ ଅଙ୍କ ସହିତ ତାଲିକାର ଷଷ୍ଠ ସ୍ଥାନରେ ଅଛନ୍ତି। ଅପରପକ୍ଷରେ ରୋହିତ ଶର୍ମା ଅଷ୍ଟମରେ ରହିଛନ୍ତି।
ସେହିପରି ଟପ୍ ୧୦ ବୋଲରଙ୍କ ତାଲିକାରେ ୮୫୦ ରେଟିଂ ଅଙ୍କ ସହିତ ଟିମ୍ ଇଣ୍ଡିଆର ରବିଚନ୍ଦ୍ରନ ଅଶ୍ୱିନ ଦ୍ୱିତୀୟ ସ୍ଥାନରେ ରହିଛନ୍ତି। ଏହି ତାଲିକାରେ ଅଷ୍ଟ୍ରେଲିଆର ପେସ୍ ବୋଲର ପେଟ୍ କମିନ୍ସ୍ ୯୦୮ ରେଟିଂ ଅଙ୍କ ସହିତ ଶୀର୍ଷରେ ରହିଛନ୍ତି।
ଅଲ୍ରାଉଣ୍ଡର ର଼୍ୟାଙ୍କିଙ୍ଗ୍ରେ ଟପ୍ ୧୦ ମଧ୍ୟରେ ଟିମ୍ ଇଣ୍ଡିଆର ରବୀନ୍ଦ୍ର ଜାଡ଼େଜା ୩୮୬ ଅଙ୍କ ସହିତ ଦ୍ୱିତୀୟ ସ୍ଥାନରେ ରହିଛନ୍ତି। ସେହିପରି ରବିଚନ୍ଦ୍ରନ ଅଶ୍ୱିନ ୩୫୩ ଅଙ୍କ ସହିତ ଚତୁର୍ଥ ସ୍ଥାନରେ ରହିଛନ୍ତି। ସୂଚନାଯୋଗ୍ୟ, ଜୁନ୍ ୧୮ରୁ ଭାରତ ନ୍ୟୁଜିଲାଣ୍ଡ୍ ମ୍ୟାଚ୍ ଆରମ୍ଭ ହେବ।
