କେନ୍ଦୁଝର,୩୦ା୯(ଡି.ଏନ୍.ଏ.): କେନ୍ଦୁଝର ଜିଲାରେ ଅବସ୍ଥାପିତ ଧରଣୀଧର ସ୍ବୟଂ ଶାସିତ ମହାବିଦ୍ୟାଳୟ ବହୁ ସମସ୍ୟା ଦେଇ ଗତି କରୁଛି। ବର୍ଷ ବର୍ଷ ଧରି ଏହି ମହାବିଦ୍ୟାଳୟରେ ଅତିଥି ଅଧ୍ୟାପକରେ ଶିକ୍ଷାଦାନ ହେଉଛି। ଅଧ୍ୟାପକ ସଙ୍କଟ ଲାଗି ରହୁଥିଲେ ମଧ୍ୟ ସରକାରଙ୍କ ଦୃଷ୍ଟି ପଡୁନାହଁି। ଏଥି ସକାଶେ ଅତୀତରେ ଅନେକ ଛାତ୍ର ଆନ୍ଦୋଳନ ଅନୁଷ୍ଠିତ ହୋଇଛି। ଦୁର୍ବଳ ଭିତ୍ତିଭୂମି ଯୋଗୁ ଜିଲାର ଗର୍ବ ଓ ଗୌରବ କୁହାଯାଉଥିବା ଧରଣୀଧର ସ୍ବୟଂ ଶାସିତ ମହାବିଦ୍ୟାଳୟ ଏକକ ବିଶ୍ୱବିଦ୍ୟାଳୟ ମାନ୍ୟତା ପାଇବାରେ ଅନ୍ତରାୟ ସୃଷ୍ଟି କରିଛି।
ଅନୁଯାୟୀ ଧରଣୀଧର ମହାବିଦ୍ୟାଳୟରେ ମୋଟ୍ ୮୦ଟି ଅଧ୍ୟାପକ ପଦ ମଧ୍ୟରୁ ୪୬ଜଣ ଥିବା ବେଳେ ୩୪ଟି ପଦବୀ ଫାଙ୍କା ପଡ଼ିଛି। ଯୁକ୍ତ ୩ ଓ ସ୍ନାତକୋତ୍ତର ଶ୍ରେଣୀ ପାଇଁ ଅଧ୍ୟକ୍ଷ ପଦ ମଧ୍ୟ ଖାଲିପଡ଼ିଛି। ନୃତତ୍ୱ ବିଭାଗରେ ୩ ଅଧ୍ୟାପକ ପଦବୀ ରହିଥିବା ବେଳେ ଜଣେ ଶିକ୍ଷାଦାନ କରୁଛନ୍ତି। ପ୍ରାଣୀ ବିଜ୍ଞାନ ବିଷୟରେ ୫ରୁ ୩, କେମେଷ୍ଟ୍ରି ବିଭାଗରେ ୭ରୁ ୨, କମ୍ପ୍ୟୁଟର ବିଭାଗରେ ୨ରୁ ଜଣେ, ବାଣିଜ୍ୟରେ ୧୦ ରୁ ୫, ଅର୍ଥନୀତିରେ ୫ରୁ ଜଣେ, ଇଂରାଜୀରେ ୮ ରୁ ୪ ପଦବୀ ଖାଲି ରହିଛି। ଏହା ବ୍ୟତୀତ ଗଣିତରେ ୪ ରୁ ୨, ଓଡ଼ିଆ ଭାଷାରେ ୬ ରୁ ୨, ଫିଜିକ୍ସରେ ୬ ରୁ ଗୋଟିଏ ପଦବୀ ଫାଙ୍କା ରହିଛି। ସବୁଠାରୁ ବଡ଼କଥା ହେଲା ଦର୍ଶନ ଶାସ୍ତ୍ରରେ ୩ଟି ପଦବୀରୁ ୩ ଟି ଯାକ ଫାଙ୍କା ରହିଛି। ଏଥି ସହ ଡେମନ୍ଷ୍ଟ୍ରେଟର, ଲାବୋରଟରୀ ଆଟେଣ୍ଡାଣ୍ଟ୍ ଓ ଷ୍ଟୋର କିପର ପଦବୀ କଥା ନ କହିଲେ ଭଲ। ଏପରିକି ରାତ୍ରି ଜଗୁଆଳୀ ପଦ ୪ଟି ମଧ୍ୟରୁ ୩ଟି ଖାଲି ରହିଛି। ନିୟମିତ ଅଧ୍ୟାପକ ଅଭାବ ଯୋଗୁଁ ଅତିଥି ଅଧ୍ୟାପକଙ୍କ ଦ୍ୱାରା ଶିକ୍ଷାଦାନ କରାଯାଉଛି। ଏପରିକି ମହାବିଦ୍ୟାଳୟର ୮୨ଟି ଅନୁମୋଦିତ ତୃତୀୟ ଓ ଚତୁର୍ଥ ଶ୍ରେଣୀ କର୍ମଚାରୀଙ୍କ ମଧ୍ୟରୁ ୫୮ ପଦବୀ ଫାଙ୍କା ରହିଛି। ମୁଖ୍ୟ କିରାଣୀ ମଧ୍ୟ ନାହାନ୍ତି।
ଏ ନେଇ କଲେଜ ଅଧ୍ୟକ୍ଷ ନରେନ୍ଦ୍ର ସାହୁଙ୍କୁ ପଚାରିବାରୁ ସେ କୁହନ୍ତି, ସରକାର ନିୟମିତ ଅଧ୍ୟାପକ ନିଯୁକ୍ତି ଦେଉନାହାନ୍ତି। ତେଣୁ ଅତିଥି ଅଧ୍ୟାପକରେ ପାଠପଢ଼ା ହେଉଛି। ତାଙ୍କୁ ଏକା ଯୁକ୍ତ ୨, ଯୁକ୍ତ ୩ ଓ ପୋଷ୍ଟ ଗ୍ରାଜୁଏସନ ସମ୍ଭାଳିବାକୁ ପଡୁଛି ବୋଲି ସେ କହିଥିଲେ।
