ଜଙ୍ଗଲୀ ଜନ୍ତୁଙ୍କ ମନର ପରିଭାଷାକୁ ପଢ଼ିପାରୁଥିବା ଏକ କାଳ୍ପନିକ ଚରିତ୍ର ‘ଟାର୍ଜନ’, ଯାହାକୁ ନେଇ ବିଭିନ୍ନ ଭାଷାରେ ନିର୍ମାଣ କରାଯାଇଛି ଏକାଧିକ ସିନେମା। ଏସବୁ ଚଳଚ୍ଚିତ୍ର ଦର୍ଶକଙ୍କ ମନରେ ଛାଡ଼ିଛି ସ୍ବତନ୍ତ୍ର ଛାପ। ହେଲେ ଭିଏଟ୍ନାମର ‘ହୋ ଭାନ୍ ଲାଙ୍ଗ୍’ଙ୍କ ଜୀବନଶୈଳୀ ‘ଟାର୍ଜନ’ଙ୍କଠାରୁ କୌଣସି ଗୁଣରେ କମ୍ ନୁହେଁ। ଘଞ୍ଚ ଜଙ୍ଗଲ ମଧ୍ୟରେ ଦୀର୍ଘ ୪୧ ବର୍ଷର ରହଣି ଭିତରେ ଜଙ୍ଗଲୀ ପରିବେଶରେ ନିଜକୁ ସମ୍ପୂର୍ଣ୍ଣ ଖାପଖୁଆଇ ସାରିଛନ୍ତି ଲାଙ୍ଗ୍। ଜଙ୍ଗଲର ହିଂସ୍ର ମାଂସାଶୀ ପ୍ରାଣୀ ଭଳି କଞ୍ଚା ମାଂସ ତାଙ୍କର ଅତି ପସନ୍ଦ।
ହାନୋଇ: ଭିଏଟ୍ନାମର ଘଞ୍ଚ ଜଙ୍ଗଲ ଭିତରେ ଦୀର୍ଘ ୪୧ ବର୍ଷ ବିତାଇଥିବା ‘ହୋ ଭାନ୍ ଲାଙ୍ଗ୍’ଙ୍କ ଜୀବନଶୈଳୀ ଯେତିକି ରୋଚକ, ସେତିକି ଆଶ୍ଚର୍ଯ୍ୟଜନକ ତାଙ୍କର ପ୍ରବୃତ୍ତି। ସମାଜଠାରୁ ଦୂରରେ ବାପା, ଭାଇଙ୍କ ସହିତ ସେ ଜଙ୍ଗଲରେ କାଟିଛନ୍ତି ଶୈଶବ, ବାଲ୍ୟାବସ୍ଥା ଏବଂ ଯୌବନ। ଜଙ୍ଗଲୀ ଫଳ, ମହୁ, ମାଂସକୁ ଆହାର ଭାବେ ଗ୍ରହଣ କରି ବନ୍ୟପ୍ରାଣୀଙ୍କ ସହ ବିତାଇଛନ୍ତି ସମୟ। ଏଭଳି ଜଣେ ଭିନ୍ନ ମଣିଷଙ୍କୁ ଠାବ କରାଯିବା ପରେ ଭିଏତ୍ନାମବାସୀଙ୍କ ଆଖିରେ ସେ ପାଲଟି ଯାଇଛନ୍ତି ସତସତିକା ଟାର୍ଜନ।
୧୯୭୨ରେ ଭିଏଟ୍ନାମ ଯୁଦ୍ଧରେ ହୋଇଥିବା ବୋମାବର୍ଷଣରେ ହୋ ଭାନ୍ ଲାଙ୍ଗ୍ ହରାଇଥିଲେ ନିଜର ମା’, ଭାଇ ଏବଂ ଉଭଣୀଙ୍କୁ । ହେଲେ ଏଥିରୁ ସୌଭାଗ୍ୟବଶତଃ ବର୍ତ୍ତିଯାଇଥିଲେ ଲାଙ୍ଗ୍, ତାଙ୍କ ବାପା ଏବଂ ଭାଇ। ଜୀବନ ବିକଳରେ ୩ଜଣ ଟେ-ଟ୍ରାର ଘଞ୍ଚ ଜଙ୍ଗଲକୁ ପଳାୟନ କଲେ ଏବଂ ସେଠାରେ ରହିବା ଆରମ୍ଭ କଲେ। ଦୀର୍ଘ ୪୧ ବର୍ଷ ଭିତରେ ବନ୍ୟଜନ୍ତୁଙ୍କଠାରୁ ନିଜକୁ ସୁରକ୍ଷିତ ରଖିବା ସହିତ ଜଙ୍ଗଲରୁ ହିଁ ଦୈନନ୍ଦିନ ଜୀବନଯାପନ ପାଇଁ ଆବଶ୍ୟକ ସାମଗ୍ରୀ ପ୍ରସ୍ତୁତ କରିଥିଲେ।
୨୦୧୩ରେ ‘ହୋ ଭାନ୍ ଲାଙ୍ଗ୍’ଙ୍କୁ ଜଙ୍ଗଲରୁ ଠାବ କରାଯାଇଥିଲା। ସେତେବେଳେ ଯଦିଓ ସେ ବଡ଼ ହୋଇସାରିଥିଲେ, ତଥାପି ପୃଥିବୀରେ ତାଙ୍କ ବ୍ୟତୀତ ଅନ୍ୟ କେହି ମଣିଷ ଅଛନ୍ତି ବୋଲି ତାଙ୍କୁ ଜଣା ନ ଥିଲା। କେବଳ ଜୀବଜନ୍ତୁ ଏବଂ ତାଙ୍କ ପରିବାର ଭିତରେ ଏ ବିଶାଳକାୟ ପୃଥିବୀ ସୀମିତ ବୋଲି ଧାରଣା ଥିଲା। ପରେ ବହୁ ପ୍ରୟାସ ସତ୍ତ୍ୱେ ତାଙ୍କୁ ଜଙ୍ଗଲରୁ ଉଦ୍ଧାର କରି ଏକ ଗ୍ରାମରେ ଥଇଥାନ କରାଯାଇଥିଲା। ଉକ୍ତ ଗ୍ରାମରେ ୮ ବର୍ଷର ରହଣି କାଳରେ ତାଙ୍କ ଚାଲିଚଳଣିରେ ସାମାନ୍ୟ ପରିବର୍ତ୍ତନ ଆସିଲାଣି। ୨୦୧୫ରେ ଆଲଭାରୋ ସେରେଜୋ ନାମକ ଜଣେ ବ୍ୟକ୍ତି ଉକ୍ତ ଅଞ୍ଚଳ ଗସ୍ତ କରିବା ସମୟରେ ଲାଙ୍ଗ ଏବଂ ତାଙ୍କ ପରିବାର ସଦସ୍ୟଙ୍କ ବିଷୟରେ ଜାଣିବାକୁ ପାଇଥିଲେ। ଏହାପରେ ଭିଏଟ୍ନାମର ଟାର୍ଜନଙ୍କ ବିଷୟରେ ଗଣମାଧ୍ୟମରେ ବିସ୍ତୃତ ତଥ୍ୟ ପ୍ରଚାରିତ ହୋଇଥିଲା।
ସାମାଜିକ ସ୍ରୋତରୁ ଦୀର୍ଘବର୍ଷ ଧରି ଦୂରରେ ରହିବା ଭିତରେ ଲାଙ୍ଗ୍ଙ୍କ ମସ୍ତିଷ୍କର ବିକାଶ ହୋଇପାରିନାହିଁ। ତାଙ୍କ ବ୍ୟବହାର ଛୋଟ ପିଲା ଭଳି। ଆଜି ବି ସେ ଜଣେ ଅବୋଧ ଶିଶୁ ଭଳି ବ୍ୟବହାର କରୁଛନ୍ତି। ଠିକ୍ ଭାବେ କଥା କହିପାରୁନାହାନ୍ତି। ଠାରରେ ଭାବ ବିନିମୟ କରିବାକୁ ପସନ୍ଦ କରୁଛନ୍ତି। ଏପରି କି ଦାମ୍ପତ୍ୟ ଜୀବନ ବିଷୟରେ ତାଙ୍କର କୌଣସି ଧାରଣା ନାହିଁ। ଭାଇଙ୍କ ନିର୍ଦ୍ଦେଶରେ ସେ ଅତ୍ୟଧିକ ପ୍ରତିକ୍ରିୟାଶୀଳ ହୋଇଉଠୁଛନ୍ତି। ଆଖି ସାମ୍ନାରେ ଥିବା ଲୋକଙ୍କୁ ଅତର୍କିତ ଆକ୍ରମଣ କରୁଛନ୍ତି। ତାଙ୍କ ବାପାଙ୍କ ମାନସିକ ସ୍ବାସ୍ଥ୍ୟ ବିଗିଡ଼ିଯାଇଛି। ଏବେ ବି ସେ ଅତୀତରେ ବଞ୍ଚତ୍ଛନ୍ତି। ଭିଏଟ୍ନାମ ଯୁଦ୍ଧ ଏବେ ବି ଶେଷ ହୋଇ ନ ଥିବା ତାଙ୍କର ଧାରଣା ରହିଛି।
