ପୁରୁଷୋତ୍ତମପୁର,୨୧ା୫(ସବିତା ମିଶ୍ର): ଚଳିତବର୍ଷ ଯୁକ୍ତଦୁଇ ଓ ଯୁକ୍ତତିନି ପରୀକ୍ଷାରେ ଗଞ୍ଜାମ ଜିଲା ପୁରୁଷୋତ୍ତମପୁର ତାରାତାରିଣୀ କଲେଜକୁ ବଡ଼ ସଫଳତା ମିଳିଛି। ଅଧ୍ୟକ୍ଷ ଡଃ ପ୍ରଦୀପ କୁମାର ସାହୁ ଓ ଅଧ୍ୟାପକ ଡଃ ଶ୍ରୀରାମ ମିଶ୍ରଙ୍କ ପ୍ରତ୍ୟକ୍ଷ ତଦାରଖ ଯୋଗୁ ଏଭଳି ଗୌରବ ମିଳିଥିବାର ଜଣାପଡ଼ିଛି। କଲେଜରେ ଯୁକ୍ତଦୁଇ ବିଜ୍ଞାନରେ ୮୯.୮୬ ପ୍ରତିଶତ ରେଜଲ୍ଟ ରହିଥିବା ବେଳେ କଳାରେ ୯୮.୩୯ ପ୍ରତିଶତ ରେଜଲ୍ଟ ରହିଛି।
ସେହିପରି ଯୁକ୍ତତିନି କଳାରେ ୯୫ ପ୍ରତିଶତ ରେଜଲ୍ଟ ରହିଥିବା ବେଳେ ବିଜ୍ଞାନରେ ୯୬ ପ୍ରତିଶତ ରହିଛି। ଯୁକ୍ତଦୁଇ ବିଜ୍ଞାନରେ ଝିଅଙ୍କୁ ପଛରେ ପକାଇ ପୁଅମାନେ ବାଜିମାତ କରିଛନ୍ତି। ବିଜ୍ଞାନରେ ସମୁଦାୟ ୩୦୬ ଜଣ ପରୀକ୍ଷା ଦେଇଥିବା ବେଳେ ୨୭୮ଜଣ ପାସ୍ କରିଛନ୍ତି। ମୋଟ୍ ୬୦୦ ମାର୍କରୁ ୧୩ ଜଣ ୫୦୦ରୁ ଊର୍ଦ୍ଧ୍ୱ ମାର୍କ ରଖି ପାସ୍କରିଛନ୍ତି। ପ୍ରଥମ ଶ୍ରେଣୀରେ ୧୮୮ ଜଣ, ଦ୍ୱିତୀୟ ଶ୍ରେଣୀରେ ୭୧ ଜଣ, ତୃତୀୟ ଶ୍ରେଣୀରେ ୧୨ ଜଣ ଓ କମ୍ପାର୍ଟମେଣ୍ଟରେ ୪ଜଣ ପାସ୍ କରିଛନ୍ତି। ସେଥିମଧ୍ୟରୁ ଶୁଭମ୍ ବାଡ଼ତ୍ୟା ୫୭୫ ମାର୍କରଖି ୯୬% ହାସଲ କରିଥିବା ବେଳେ କାର୍ତ୍ତିକେୟ ମହାନ୍ତି ୯୪% ହାସଲ କରିଛନ୍ତି। ସେହିପରି କଳାରେ ୩୧୨ ଜଣ ପରୀକ୍ଷା ଦେଇଥିବା ବେଳେ ୩୦୭ ଜଣ ପାସ୍ କରିଛନ୍ତି। ସେଥିମଧ୍ୟରୁ ୫ଜଣ ୯୦ ପ୍ରତିଶତରୁ ଅଧିକ ମାର୍କ ରଖିଛନ୍ତ। ପ୍ରଥମଶ୍ରେଣୀରେ ୧୩୩ ଜଣ, ଦ୍ୱିତୀୟ ଶ୍ରେଣୀରେ ୭୬ ଜଣ ଓ ତୃତୀୟ ଶ୍ରେଣୀରେ ୯୮ଜଣ ପାସ୍ କରିଛନ୍ତି। ସ୍ମୃତି ବେହେରା ୫୨୬ ମାର୍କ ରଖିଥିବା ବେଳେ ପୂଜାଗୌଡ଼ ୫୧୬ ଓ ରୁକ୍ମିଣୀ ପଣ୍ଡା ୫୧୦ ମାର୍କରଖି କଲେଜ ପାଇଁ ଗୌରବ ଆଣିଛନ୍ତି। ଯୁକ୍ତତିନିସ୍ତରରେ ବ୍ରହ୍ମପୁର ବିଶ୍ୱବିଦ୍ୟାଳୟ ପରୀକ୍ଷାରେ କଳାରେ ୭୬.୬୮ ପ୍ରତିଶତ ରେଜଲ୍ଟ ରହିଥିବା ବେଳେ ବିଜ୍ଞାନରେ ୬୭.୬୪ ପ୍ରତିଶତ ରହିଛି। ଶିକ୍ଷାବିଭାଗର ଛାତ୍ରୀ ବର୍ଷାରାଣୀ ଦାଶ ବିଶ୍ୱବିଦ୍ୟାଳୟସ୍ତରରେ ତୃତୀୟ ସ୍ଥାନରେ ରହିଥିବା ବେଳେ ସ୍ବପ୍ନା ରାଉଳ ଦଶମ ସ୍ଥାନରେ ରହିଛନ୍ତି ଏବଂ ଓଡ଼ିଆ ବିଭାଗର ଛାତ୍ରୀ ନିର୍ଜଳୀ ବେହେରା ନବମ ସ୍ଥାନରେ ରହି କଲେଜ ପାଇଁ ଗୌରବ ଆଣିଛନ୍ତି। ଏହି କୃତୀ ଛାତ୍ରୀଛାତ୍ରଙ୍କୁ କଲେଜ ପକ୍ଷରୁ ଗୁରବାର ସମ୍ବର୍ଦ୍ଧିତ କରାଯାଇ ସେମାନଙ୍କ ଭବିଷ୍ୟତ ଉଜ୍ଜ୍ବଳ ଲାଗି କାମନା କରିଛନ୍ତି କଲେଜ କର୍ତ୍ତୃପକ୍ଷ।